امریکا میں جنگل میں لکڑتے جمع کرنے کے دوران بچھڑنے والا بچہ دو دن بعد واپس اپنے خاندان سے مل گیا۔
آٹھ سالہ بچہ امریکی ریاست مشی گن کے دور دراز جنگلات دو دن تک برف کھاکر اور ایک درخت کے نیچے چھپ کر زندہ رہا۔
8 سالہ نانتے نیمی ہفتے کے روز اپنے خاندان کے ساتھ پورکیپائن ماؤنٹینز اسٹیٹ پارک میں اپنے اہل خانہ کے ساتھ کیمپنگ کیلئے گیا تھا۔
جنگل میں کھانا پکانے کیلئے لکڑیاں جمع کرنے کے دوران بچہ اپنے خاندان سے الگ ہوگیا جس کی تلاش میں درجنوں افراد 2 دن تک جنگل کا چپہ چپہ چھانتے رہے۔
بچہ پیر کو اپنے کیمپ سے دو میل دور ایک درخت کے نیچے سے ملا۔ نانتے نیمی کا کہنا ہے کہ دو دن تک جسم میں پانی کی کمی کو پورا کرنے کیلئے جنگل میں پڑنے والی صاف برف کھا کر گزارا کیا اور جانوروں سے بچنے کیلئے ایک درخت کے نیچے پناہ لے لی تھی۔
پولیس کا کہنا تھا کہ یہ پہاڑی علاقہ آبادی سے بہت دور ہے جہاں بہت سا پانی کھڑا ہوتا ہے اور برفباری کے باعث کئی سڑکیں گزرنے کے قابل نہیں رہتیں۔ پولیس نے 40 میل تک بچے کی تلاش کیلئے آپریشن میں اس کو ڈھونڈ لیا۔