اسلام آباد: وزیر دفاع خواجہ محمد آصف نے نومئی کے واقعات کی وجہ سے پاکستان تحریک انصاف پر پابندی عائد کرنے کاعندیہ دیدیا ہے۔
خواجہ آصف نے کہا کہ تحریک انصاف پر پابندی کا جائزہ لیا جا رہا ہے، پی ٹی آئی پر پابندی لگانے کا فیصلہ کیا گیا تو یہ پی ڈی ایم کا مشترکا فیصلہ ہوگا جس کے لیے پارلیمنٹ سے رجوع کیا جائے گا۔
ان کا کہنا ہے کہ عمران خان نے 9 اپریل کے بعد جتنے بھی اقدامات کیے ہیں اس کا ان کو خود نقصان ہوا، ہم عمران خان کو کوئی نقصان نہیں پہنچا سکے، ان کے اپنے اقدامات کی وجہ سے انہیں نقصان ہو رہا ہے۔
خواجہ آصف نے کہا کہ ملک میں عسکری تنصیبات پر حملہ کرنا عمران خان کا آخری حربہ تھا اور نومئی کو جو کچھ ہوا وہ اتفاق نہیں بلکہ منصوبہ بندی کے تحت کیا گیا، 9 مئی جیسے واقعات کی ماضی میں مثال نہیں ملتی۔
انہوں نے کہا کہ عمران خان معصوم بننے کی کوشش نہ کریں،عمران خان نے ایک جوا کھیلا جو وہ ہار گئے ہیں اب حیلے بہانے کر کے مذاکرات کرنا چاہتے ہیں، ہم پر کوئی بین الاقوامی دباؤ نہیں۔
وزیر دفاع نے کہا کہ کل شہداء کی تکریم کا دن منایا جائے گا، پی ٹی آئی نے ریاست کو چیلنج کیا ، ریاست کی اساس پر حملہ کیا گیا، کون سا جرم ہے جو 9 مئی کو نہیں ہوا۔
عمران خان کہتے ہیں کہ 9 مئی کے واقعات کا انہیں علم نہیں تھا، وہ اب کہہ چکے ہیں کہ اگر انہیں دوبارہ گرفتار کیا گیا تو دوبارہ ری ایکشن آئے گا۔عمران خان کا ہر حربہ ناکام ہوا، ان کے گھناؤنے عزائم تھے جو کسی بھارتی کے ہو سکتے ہیں پاکستانی کے نہیں۔
عمران خان نے جتنے بھی اقدامات کیے ہیں بھارت میں خوشی منائی گئی، بھارت جو پاکستان کے ساتھ نہیں کر سکا وہ عمران خان نے کیا۔