ایشیا کی سب سے بڑی مویشی منڈی کراچی میں سج چکی ہے۔ 40 ہزار سے زائد جانور اس وقت منڈی میں موجود ہیں اور مزید جانوروں کی آمد کچھ دنوں میں ہو جائے گی۔ اس سال منڈی کراچی سپر ہائی وے کی جگہ منڈی ناردرن بائی پاس پر لگائی گئی ہے۔
اگر آپ بھی منڈی جانے کے خواہشمند ہیں تو آپ کو جمالی پل سے تقریباً 7 کلومیٹر کے بعد ٹریفک سائن بورڈ سے اُلٹے ہاتھ کی جانب مڑنا ہوگا اور اس کے بعد بھی مزید 10 کلومیٹر کا فاصلہ طے کرنا ہوگا۔
انتظامیہ کے مطابق راستے میں 8 مقامات پر پولیس کی چوکیاں قائم کی گئی ہیں جبکہ رات میں روشنی کا بھی انتظام کیا گیا ہے۔
منڈی میں خریداروں کے علاوہ فیملیز اور شوقین افراد کی آمد کا سلسلہ بھی شروع ہوگیا ہے۔
منڈی شہر سے دور سنسان جگہ قائم کی گئی ہے، اس لیے چوروں لٹیروں کی آمد کا سلسلہ اور وارداتیں بھی جاری ہیں، لہٰذا منڈی جانے والے افراد سے گزارش ہے اپنے مال کی حفاظت کا کوئی خاطرخواہ انتظام کرکے جائیں۔
قیمتوں کا احوال:
اس وقت منڈی میں 70 ہزار سے لے کر 20 لاکھ تک کی قیمت کے جانور موجود ہیں۔ اس مرتبہ پچھلے سال کے مقابلے جانور کی قیمتوں میں 10 سے 20 ہزار روپے تک کا اضافہ ہوا ہے۔ لیکن ایک اچھا اور صحت مند جانور ڈیڑھ لاکھ سے کم دستیاب نہیں ہے۔