پاکستان کے سب سے بڑے شہر کراچی میں سائنسی مقابلوں میں کامیاب ننھے طلبہ نے ناسا کے خلائی کیمپ میں حصہ لیا۔
امریکی حکومت کی مالی اعانت سے کراچی کے تین اسکولوں سے تعلق رکھنے والے 24 طلبہ امریکی خلائی و راکٹ سینٹر کی خلائی کیمپ میں حصہ لے رہے ہیں۔ یہ خلائی کیمپ امریکی ریاست الاباما کے شہر ہنٹس ول میں واقع ہے۔
امریکا دنیا بھر کے نوجوانوں کےلئے جامع سٹیم تعلیم ، سبز ٹیکنالوجیز اور انٹرپرینیورشپ کی حوصلہ افزائی کرتا ہے۔ امریکا کی طرف سے طویل عرصہ سے مختلف تعلیمی پروگراموں کے ذریعے پاکستان میں اسٹیم تعلیم فروغ کیلئے مسلسل تعاون جاری ہے جس میں 2011ء اور 2015ء میں پاکستانی طالب علموں کو خلائی کیمپ بھیجنا بھی شامل ہے۔
یہ امریکی گرانٹ 100 پاکستانی اساتذہ کیلئے اسٹیم کی تربیت اور میگنیفائی سائنس سینٹر میں ایک ہزار سے زائد طلباء کے تعلیمی دورے اور سائنس پروجیکٹ کے اختتامی مقابلے سمیت حصوں پر مشتمل ہے۔
طلبہ کیلئے اس سرگرمی کاانعقاد امریکی قونصلیٹ اور داؤد فاؤنڈیش کے تعاون سے کیا گیا جس کا مقصد 50 اسکولوں میں سائنس، ٹیکنالوجی، انجینئرنگ اور ریاضی کی تعلیم کو فروغ دینا ہے۔
امریکا کی جانب سے گرانٹ دینے کا مقصد اسٹیم تعلیم کو فروغ دینا اور کراچی کے اسکولوں کی حوصلہ افزائی کرنا ہے تاکہ وہ عملہ کی تربیت کیلئے مزید وسائل مختص کریں اور تربیت کے مزید بہتر نتائج حاصل ہوں۔
پروگرام کے منتظمین کا کہنا ہے کہ اس کے نتیجے میں طلباء کو سائنس کے شعبوں میں کیریئر بنانے کی ترغیب ملے گی، صنعت، تعلیمی اداروں اور تحقیق میں اسٹیم گریجویٹس کی بڑھتی ہوئی طلب کو پورا کرنے میں مدد حاصل ہوگی۔