سندھ بھر میں امن و امان کے پیش نظر 9 اور 10محرم کو صوبے بھر میں موٹرسائیکل کی ڈبل سواری پر پابندی عائد کردی گئی۔
محکمہ داخلہ سندھ نے ڈبل سواری پرپابندی سے متعلق نوٹیفکیشن جاری کردیا جس کے صوبے میں 9 اور 10محرم کو موٹر سائیکل کی ڈبل سواری پرپابندی ہوگی، ڈبل سواری پرپابندی کے حکم سے خواتین، بچوں، معذور افراد اور بزرگوں کو استثنیٰ ہوگا۔
محکمہ داخلہ سندھ کی جانب سے صوبے میں اسلحہ ساتھ لےکر چلنے کے تمام اجازت نامے بھی معطل کردیےگئے ہیں جبکہ صوبے میں محرم سے متعلق اجتماعات کے علاوہ ہر قسم کے جلسے جلوسوں پر بھی پابندی عائد کی گئی ہے۔
یاد رہے کہ پاکستان میں آج سے محرم الحرام کا آغاز ہوچکا ہے اور سندھ میں امن و امان کی صورتحال برقرار رکھنے کیلئے محکمہ داخلہ کی جانب سے ہنگامی اقدامات اٹھائے جارہے ہیں۔
سندھ میں امن و امان کے قیام کیلئے ہزاروں پولیس اور رینجرز اہلکار تعینات کئے جارہے ہیں جبکہ بڑی تعداد میں زیرتربیت پولیس اہلکاروں کو بھی میدان میں اتارا جارہا ہے۔
ملک میں نو اور 10 محرم کو مرکزی جلوس کی سیکورٹی کیلئے جلوس کی گزرگاہ پر درجنوں اہلکار ڈیوٹی انجام دینگے جبکہ بلند عمارتوں پر اسنائپرز بھی تعینات کئے جائینگے۔