جیمز ویب اسپیس ٹیلی اسکوپ نے ایک دم توڑتے ستارے کے آخری مراحل کی حیران کن تصاویر کھینچ کر اربوں سال بعد سورج کے ساتھ بھی ایسا ہی عمل ہونے کی پیشگوئی کردی ہے۔
جیمز ویب اسپیس ٹیلی اسکوپ کی ان تصاویر میں جگمگاتی گیس کے اسٹرکچر رِنگ نیبولا کو دکھایا گیا ہے۔ ماہرین کے مطابق رِنگ نیبولا اس وقت بنتا ہے جب ایک دم توڑتا ستارہ اپنے مادے کا بیشتر حصہ خلا میں خارج کرتا ہے اور اس سے مختلف رنگوں سے جگمگاتا ہوا ایک ہالہ بن جاتا ہے۔
ان تصاویر میں نیبولا کے اوپری اسٹرکچر کے علاوہ اندرونی حصے کو بھی دکھایا گیا ہے جبکہ یہ دم توڑتا ستارہ زمین سے 26 سو نوری برسوں کے فاصلے پر واقع تھا۔
سائنسدانوں کا کہنا ہے کہ سورج جیسے ستاروں کی زندگی کا اختتام ان کی جانب سے مادے کے اخراج سے ہوتا ہے، جس سے یہ خوبصورت نیبولا بنتے ہیں جو ریڈی ایشن سے جگمگاتے ہیں۔ کئی ارب سال بعد ہمارے سورج کے ساتھ بھی ایسا ہی ہوگا۔
ماہرین کا کہنا ہے کہ انہیں نیبولا اسٹرکچر بننے کے پیچیدہ عمل کے بارے میں کافی کچھ جاننے کا موقع ملے گا۔