ایشیا کپ کے سپرفور مرحلے میں پاکستان اور انڈیا کا میچ بارش کی نذر ہونے کے بعد آج پیر کو ایک مرتبہ پھر سے ریزرو ڈے یعنی اضافی دن پر میچ خراب موسم کی وجہ سے تاخیر کا شکار ہے۔
اتوار کو کولمبو میں کھیلے گئے میچ میں انڈیا نے 24.1 اوورز میں دو وکٹوں کے نقصان پر 147 رنز بنائے تھے تاہم میچ میں بارش نے رکاوٹ ڈال دی جس کے باعث اتوار کو یہ مقابلہ جاری نہیں رہا سکا۔اگر کولمبو کے آج کے موسم کی بات کی جائے تو شائقینِ کرکٹ کے لیے خبر کوئی اچھی نہیں ہے کیونکہ میچ کے بارش سے متاثر ہونے کے قوی امکانات ہیں۔موسم کی خبروں کی ویب سائٹ ’ایکیو ویدر‘ کے مطابق پیر کی دوپہر میں کولمبو پر بادل چھائے رہیں گے جبک دن کے وقت چھ گھٹنے بارش ہونے کا امکان ہے۔اسی طرح رات کے وقت کولمبو میں دو گھنٹے بارش برسنے کا امکان ہے جبکہ آسمان بادلوں سے بھرا رہے گا۔دوسری جانب ویب سائٹ ’ویدر ڈاٹ کام‘ کے مطابق کولمبو میں پیر کو دوپہر دو بجے بارش ہونے کے 90 فیصد امکانات ہیں جبکہ شام کے بعد بارش ہونے کے 80 فیصد امکانات ہیں۔یہاں ایک بات یاد رہے کہ اگر دونوں روایتی حریفوں کے درمیان میچ بارش کے بعد منسوخ ہو جاتا ہے تو دونوں ٹیموں کو ایک ایک پوائنٹ دے دیا جائے گا جس کے بعد پوائنٹس ٹیبل پر پاکستان کے تین جبکہ انڈیا کا ایک پوائنٹ ہوگا۔خیال رہے پاکستان اور انڈیا کے درمیان میچ پیر کو ریزرو ڈے پر پاکستانی وقت کے مطابق 2 بج کر 30 منٹ پر شروع ہوگا۔اس سے قبل دو ستمبر کو پاکستان اور انڈیا کے درمیان پالیکیلے میں کھیلا گیا ایشیا کپ کا گروپ میچ بھی بارش کے باعث بغیر کسی نتیجے کے منسوخ کر دیا گیا تھا۔