پاکستان ڈرامہ انڈسٹری کی معروف ماڈل واداکارہ کرن اشفاق حسین ڈار کا کہنا ہے کہ ہمارے معاشرے میں طلاق صرف لڑکی کی ہوتی ہے، لوگ اُس لڑکی اور اُس کی فیملی سے ہی پوچھتے ہیں۔ لڑکے سے کوئی نہیں پوچھتا کہ تم نے طلاق کیوں دی۔
رواں ماہ لاہورمیں پیپلز پارٹی کے سیاسی مشیر حمزہ علی چوہدری سے دوسری شادی کے بعد ٹک ٹاکر کنول آفتاب کے پوڈکاسٹ شومیں شریک ہوئیں جہاں عمران اشرف سے طلاق سے متعلق اہم انکشافات کیے ہیں۔
کرن اشفاق نے کہا کہ عمران اشرف سے شادی کے دوران مجھے بہت سے مسائل کا سامنا کرنا پڑا ، میری خراب ازدواجی زندگی کی وجہ سے میرے والدین 5 سال تک سکون کی نیند نہیں سوئے۔
انہوں نے کہا کہ ہمارے معاشرے میں طلاق صرف لڑکی کی ہوتی ہے، لوگ اُس لڑکی اور اُس کی فیملی سے ہی پوچھتے ہیں۔ لڑکے سے کوئی نہیں پوچھتا کہ تُم نے طلاق کیوں دی، میری طلاق کے بعد بھی یہی سب کچھ ہوا، لوگوں نے میرے والد اور بھائیوں سے پوچھا، باتیں بنائیں۔
سوشل میڈیا پر تبصرے کرتے ہوئے صارفین نے مجھے تنقید کا نشانہ بنایا لیکن عمران اشرف سے کسی نے نہیں پوچھا۔’میرے والدین میرے لیے پریشان رہتے تھے جبکہ میری والدہ نے مجھے کہہ دیا تھا کہ کرن برداشت کرو، کچھ بھی ہوجائے اپنا گھر بسانا ہے۔میری طلاق نیوز چینل اور سوشل میڈیا کی زینت بن گئی، میری دونوں بہنوں کو بھی اپنے سسرال میں باتیں سننی پڑیں۔
کرن اشفاق نے کہا کہ ’میں طلاق کے بعد ملائیشیا چلی گئی تھی جس پربھی لوگوں نے تنقید کی اور کہا کہ عدت نہیں کی تو میں یہاں بتاتی چلوں کہ میری طلاق اکتوبر میں نہیں بلکہ زبانی طور پر اگست کے آخر میں ہوچکی تھی۔ عمران اشرف نے خود مجھے طلاق دی تھی کیونکہ میں خلع نہیں لینا چاہتی تھی۔ پھر ہم دونوں نے اکتوبر میں سوشل میڈیا پر اپنی طلاق کا اعلان کیا تھا۔
اپنی دوسری شادی سے متعلق کرن اشفاق نے کہا کہ ’میں نے طلاق کے بعد سوچ لیا تھا کہ جب تک میرا بیٹا 10 سال کا نہیں ہوجاتا تب تک دوسری شادی نہیں کروں گی کیونکہ طلاق نے میری ذہنی صحت کو بُری طرح متاثر کیا تھا، مجھے دماغی دورے پڑنا شروع ہوگئے تھے۔
ایک رات تہجد میں والد کو روتا ہوا دیکھا تو میں نے دوسری شادی کے لیے ہاں کردی لیکن والد سے یہی شرط رکھی تھی کہ لڑکا کراچی کا ہونا چاہیے کیونکہ میں اپنے بیٹے سے دور نہیں رہ سکتی تھی۔
عمران اشرف اور کرن اشفاق کی شادی 2018 میں ہوئی تھی۔ 2022 میں دونوں نے اپنی راہیں جدا کرلی تھیں، جس کا باضابطہ اعلان کرن اشفاق نے اپنے سوشل میڈیا اکاؤنٹ پر کیا تھا۔