آسٹریلیا میں خاتون کو ہوٹل کے کمرے میں ہیر ڈرائر استعمال کرنا مہنگا نہیں بلکہ بہت مہنگا پڑ گیا، چھوٹی سی غلطی نے خاتون کو لاکھوں کا نقصان کروادیا۔
آسٹریلین ہوٹل نے ہیئر ڈرائر استعمال کرنے پر خاتون سے 1400 آسٹریلوی ڈالرز جرمانہ وصول کیا جو کہ تقریباً 2 لاکھ 63 ہزار روپے کے قریب بنتے ہیں۔
واقعہ کچھ یوں ہوا کہ آسٹریلوی خاتون نووٹیل پرتھ لینگلے کے کنگز پارک میں کنسرٹ دیکھنے کے لیے ہوٹل میں ٹھہری ہوئی تھیں، غسل کے بعد خاتون نے ہیئر ڈرائر سے بال سکھائے جس سے ہوٹل کا فائر الارم بج اُٹھا۔
خطرے کی گھنٹیاں بجتے ہی ہوٹل میں بھگدڑ مچ گئی اور لوگوں نے کمرے خالی کرنا شروع کردیئے، ایئر فائٹر نے دروازے پر دستک دیکر خاتون کو خطرے سے آگاہ کیا اور فوراً کمرہ چھوڑنے کی ہدایت کی۔
فائر فائٹر خاتون کو نکال کر خود کمرے میں داخل ہوا تو وہاں کچھ نہیں تھا۔ پوچھنے پر خاتون نے بتایا کہ وہ ہیئر ڈرائر استعمال کر رہی تھیں۔ہوٹل نے خاتون کی غلطی پرفائر ڈپارٹمنٹ کے لیے کال آؤٹ فیس کے طور پر 1400 ڈالر جرمانہ عائد کردیا۔
خاتون نے کہا یہ چارج تو آسٹریلیا کے محکمہ فائر بریگیڈ کے چارجز سے بھی زیادہ ہے۔اسے کم کیا جائے لیکن ہوٹل انتظامیہ نے انکار کردیا ۔سوشل میڈیا پر خبر وائرل ہونے کے بعد ہوٹل منیجر نے خاتون نے کو اضافی چارج واپس کر دیا۔