سیئول۔12جنوری (اے پی پی):جنوبی کوریا نے کہا کہ شمالی کوریا کے رہنما کِم جونگ اُن کی دھمکی ان کی اپنی انتظامیہ کو نقصان پہنچائے گی۔
ٹی آر ٹی کے مطابق جنوبی کوریا کی وزارت خارجہ نےکہا کہ ہماری حکومت شمالی کوریا کی ہر اشتعال انگیز کارروائی کا جواب دے گی۔انہوں نے کہا کہ کِم جونگ اُن کی جنوبی کوریا کو ختم کرنے کی دھمکی ہمارے نزدیک محض لفظوں کا کھیل ہے جو جلد یا بدیر خود شمالی کوریا انتظامیہ کے لئے نقصان کا باعث بنے گی۔واضح رہے کہ شمالی کوریا کے رہنما کِم جونگ ان نے بعض فیکٹریوں کے دورے کے دوران بیان میں کہا تھا کہ اگر جنوبی کوریا نے شمالی کوریا کے خلاف اسلحے کی طاقت استعمال کرنے یا پھر شمالی کوریا کی سلامتی و خودمختاری کو نقصان پہنچانے کی کوشش کی تو ہم اپنے پاس موجود تمام سازوسامان کو استعمال کریں گے اور جنوبی کوریا کو ختم کرنے سے گریز نہیں کریں گے۔