ٹورنٹو۔13جنوری (اے پی پی):کینیڈا کی ایئر کینیڈا کی فلائٹ کے کیبن ڈور سے مسافر نے چھلانگ لگا دی۔دی نیو یارک پوسٹ کے مطابق 8 جنوری کو ٹورنٹو پیئرسن انٹرنیشنل ایئرپورٹ پردبئی جانے والی اس پرواز کے روانہ ہونے سے قبل اس مسافر نے معمول کے مطابق بوئنگ 747 پر بورڈنگ کی لیکن وہ سیٹ پر نہ بیٹھا اور اس کے بعد اُس نے کیبن ڈور سے چھلانگ لگا دی۔
ایئرلائن کے حکام نے گلوبل نیوز کو بتایا کہ اس واقعہ کے بعد پِیل ریجنل پولیس سمیت باقی ایمرجنسی سروسز کو کال کر دی ۔ایئر کینیڈا کی ویب سائٹ کے مطابق اس واقعہ کے بعد بوئنگ 747 کی روانگی چھ گھنٹے تک تاخیر کا شکار رہی۔ اس دوران عملے نے چھلانگ لگانے والے مسافر کی دیکھ بھال کی اور معاملے کی تفتیش کی۔واقعہ کے بعد ابھی تک اس بات کا علم نہیں ہو سکا کہ چھلانگ لگانے والے مسافر کو کتنی چوٹیں آئی ہیں اور اسے گرفتار کیا گیا ہے یا نہیں۔واضح رہے کچھ روز قبل ایئر کینیڈا کی ایک اور فلائٹ میں 16 برس کے مسافر کا اپنے گھر والوں کے ساتھ جھگڑا کرنے کا واقعہ بھی پیش آیا تھا جس کے باعث وہ پرواز تین گھنٹوں تک ایئرپورٹ پر رکی رہی تھی۔