جدہ ۔15جنوری (اے پی پی):سعودی عرب کی طرف سے غزہ کی امداد کے لیے پانچواں بحری جہاز مصر کی پورٹ سعید پہنچ گیا ہے۔سبق ویب سائٹ کے مطابق بحری جہاز میں 500 ٹن امدادی سامان موجود ہے جس میں غذائی مواد کے علاوہ ، سلیپنگ بیگز، کمبل، ادویہ اور آکسیجن کے 300 سلنڈر موجود ہیں۔
جدہ بندرگاہ سے روانہ ہونے والا پانچواں بحری جہاز غزہ میں فلسطینیوں کی فضائی اور بحری امداد کا حصہ ہے جس میں کنگ سلمان سینٹر برائے انسانی امداد کے تحت سعودی و غیر ملکی حصہ ڈال رہے ہیں۔واضح رہے کہ سعودی عرب میں غزہ کی امداد کے لیے عوامی عطیات مہم بھی جاری ہے۔