دنیا کے کئی ملکوں میں سردی کی شدت میں اضافہ ہو رہا ہے، کئی ممالک میں برف باری کے باعث جما دینے والی سردی کا راج ہے، کینیڈامیں بھی درجہ حرارت مسلسل گر رہا ہے، یہاں سردی کا یہ عالم ہے کہ کھولتا ہوا پانی بھی سکینڈز میں برف بن جاتا ہے۔
کینیڈا کے صوبے البرٹا میں پارہ منفی 43 ڈگری تک گر چکا ہے اورکھولتا پانی ہوا میں جاتے ہی برف بن رہا ہے جبکہ شدید سردی کے باعث فرائی پین میں انڈا تلنے سے قبل ہی جم گیا، نوڈلز بھی جم گئے۔
ہفتے کے آخر میں، البرٹا ، برٹش کولمبیا ، ساسکیچیوان اور شمال مغربی علاقوں میں سردی کے کئی سابقہ ریکارڈ ٹوٹ گئے ہیں ۔ ماہرین موسمیات کا کہنا ہے کہ آرکٹک کی سرد ہوا جنوب کی طرف بڑھنے کی وجہ سے ملک کا بیشتر حصہ گہرے انجماد کا سامنا کر رہا ہے۔
ماہرین کا کہنا ہے کہ موجودہ شدید سردی کی لہر جس کی اس ہفتے ملک کے کچھ حصوں میں جاری رہنے کی توقع ہے شدید ترین ہے جس نے کینیڈین شہریوں کو گھروں تک محدود کردیا ہے۔