شہد کی مکھی کاٹ لے تو بہت زیادہ تکلیف ہوتی ہے، اس لئے ہر انسان کی کوشش ہوتی ہے کہ شہد کی مکھی سے دور ہی رہیں، اگر شہد کی مکھیاں یا دیگر خطرناک مکھیاں حملہ کر دیں تو فوری ڈاکٹر سے رجوع کرنا چاہیے کیونکہ شہد کی مکھی کے کاٹنے سے موت بھی ہوسکتی ہے، یہی وجہ ہے کہ بھارتی حکومت نے شہد کی مکھی کے کاٹنے یا ٹڈی کے حملے کی زد میں آنے والے شخص کو معاوضہ دینے کا اعلان کر دیا ہے۔
معاوضہ دینے کی تجویزبھارت کی ریاست اتراکھنڈ کے وزیر اعلیٰ پشکر سنگھ دھامی کی جانب سے دی گئی کیونکہ ماضی قریب میں شہد کی مکھیوں اور ٹڈیوں کے حملے کی وجہ سے کئی اموات رپورٹ ہوئیں۔
گزشتہ سال شہد کی مکھیوں اور ٹڈیوں کے حملوں سے کسانوں اور ان کے مویشیوں کی اموات ہوئی تھیں۔ صرف سال 2022 میں سات افراد ہلاک ہوئے تھے۔
اتراکھنڈ کے وزیر جنگلات سبودھ انیال نے بتایا کہ شہد کی مکھیوں اور ٹڈیوں کے حملے سے ہلاکتیں ہوئیں جبکہ کئی لوگ زخمی بھی ہیں۔ریاست نے اسی کو مدِ نظر رکھتے ہوئے متاثرین کیلئے معاوضے کا اعلان کیا تاکہ وہ اپنا علاج کروا سکیں۔
حکومتی اعلان کے مطابق حملے میں معمولی طور پر زخمی شخص کو 15 ہزار روپے معاوضہ دیا جائے گا جبکہ شدید زخمی کی صورت میں 1 لاکھ روپے کی رقم فراہم کی جائے گی۔ ہلاک ہونے والے کے لواحقین کو 6 لاکھ روپے ادا کیے جائیں گے۔