ریاض ۔2فروری (اے پی پی):سعودی ولی عہد و شہزادہ محمد بن سلمان بن عبدالعزیز آل سعود نے پبلک انویسٹمنٹ فنڈ کی ایک اورکمپنی ’ آلات‘ کے قیام کی منظوری جاری کردی ۔ایس پی اےکے مطابق شہزادہ محمد بن سلمان پبلک انویسٹمنٹ فنڈ کے بورڈ آف ڈائریکٹرز کے چیئرمین بھی ہیں نے کہا کہ نئی کمپنی سے براہ راست 39 ہزار ملازمتوں کے مواقع میسر آئیں گے جبکہ اس سے 2030 تک تیل کے ماسوا مجموعی پیداوار میں اس کا براہ راست حصہ 35 بلین ریال تک پہنچ جائے گا۔
ولی عہد نے کہا کہ لانچ کی جانے والی نئی کمپنی ’آلات‘ کے تحت مملکت میں صاف توانائی کی پیداوار پر توجہ دی جائے گی ۔ انہوں نے کہا کہ نئی قائم کی جانے والی کمپنی سے مملکت میں جدت طرازی اور صنعتی ترقی کو فروغ ملے گا۔ آلات‘ کمپنی کا قیام پبلک انویسٹمنٹ فنڈ کی حکمت عملی کے مطابق ہے جس سے بین الاقوامی صنعتی کمپنیوں کو مملکت کی معیشت اور یہاں کے منفرد جغرافیائی محل وقوع اور تکنیکی شعبے میں سرمایہ کاری کے مواقع میسر آئیں گے۔علاوہ ازیں مختلف صنعتوں اور دیگر ترجیحی شعبوں سے متعلق امور کے حوالے سے مقامی سطح پر بھی مزید بہتری آئے گی۔کمپنی کے قیام کا مقصد مملکت کی معیشت کو متنوع بنانا اور پائیدار ترقی حاصل کرنا ہے جو سعودی عرب کے ویژن 2030 کے اہداف کے مطابق ہے۔