اسلام آباد۔12مئی (اے پی پی):وفاقی وزیر برائے منصوبہ بندی احسن اقبال نے سلطان اذلان شاہ ہاکی کپ کے فائنل میں پاکستانی ٹیم کو بہترین کھیل پیش کرنے پر خراج تحسین پیش کیا ہے ۔اپنے بیان میں وفاقی وزیر نے کہا کہ پاکستانی ہاکی ٹیم نے فائنل میں جاپان کے خلاف بہترین کھیل کا مظاہرہ کرکے قوم کا سر فخر سے بلند کردیا، 13سال بعد قومی ہاکی ٹیم کی اذلان شاہ ٹورنامنٹ کے فائنل میں رسائی خود ایک بڑی کامیابی ہے۔انہوں نے کہا کہ فائنل کے دوران پاکستان کے کھلاڑیوں نے پیشہ وارانہ صلاحیتوں کا مظاہرہ کیا، پاکستانی کھلاڑیوں نے محدود فنڈز کے باجود تمام ٹورنامنٹ میں جس کھیل کا مظاہرہ کیا وہ ثابت کرتا ہے کہ اس ملک کی مٹی میں بہت ٹیلنٹ موجود ہے۔وفاقی وزیر نے کہا کہ ہم ملک میں سپورٹس کی بحالی کی طرف بھرپور توجہ دے رہے ہیں،امید ہے کہ ہمارے ہاکی پلیرز اپنے کھوئے ہوئے شاندار ماضی کو دوبارہ واپس لائیں گے۔انہوں نے کہا کہ ہم پرامید ہیں کہ پاکستانی ہاکی ٹیم مستقبل میں عالمی ٹورنامنٹس میں بہتر کارکردگی کا مظاہرہ کرے گی۔