عالمی شہرت یافتہ پرتگالی فٹبالر کرسٹیانو رونالڈو کی نئی سوشل میڈیا پوسٹ نے ان کے چاہنے والوں کو تشویش میں مبتلا کردیا ہے۔
فوٹو اینڈ ویڈیو شیئرنگ ایپ انسٹا گرام پر معروف فٹبالر کرسٹیانو نے ایک ویڈیو شیئر کی ہے جس میں اُنہیں ایک اسٹوڈیو میں بار بار اپنی ویڈیو ریکارڈ کرنے کی کوشش کرتے ہوئے دیکھا جا سکتا ہے۔
ان کی جانب سے شیئر کی گئی ویڈیو کے بیک گراؤنڈ میں ایک وائس اوور آرٹسٹ کو یہ کہتے ہوئے سنا جا سکتا ہے کہ ’ایسا تب کیا جاتا ہے جب آپ رونالڈو کو نئے پروجیکٹ کی معلومات شیئر کرنے سے روکیں‘۔
عالمی شہرت یافتہ فٹبالر کی یہ ویڈیو دیکھنے کے بعد دنیا بھر میں موجود ان کے چاہنے والوں (مداحوں) نے مختلف قسم کی قیاس آرائیاں کرنا شروع کر دی ہیں۔
کچھ مداحوں ماننا ہے کہ یہ پروجیکٹ فٹبال سے ریٹائرمنٹ کے بعد کرسٹیانو کا کوئی نیا ہدف ہوسکتا ہے۔
بعض کا خیال ہے کہ اگر یہ پروجیکٹ فٹ بال سے ریٹائرمنٹ کے بعد ان کے اگلے ہدف کے بارے میں ہوتا تو وہ اتنا مسکرا نہیں رہے ہوتے۔
کچھ مداح کہہ رہے ہیں کہ وہ اپنا پوڈ کاسٹ شروع کرنے جا رہے ہیں یا پھر یہ ویڈیو کسی برانڈ کے میڈیا سے جُڑے کسی پروجیکٹ کا حصّہ ہے۔