سندھ حکومت کا کراچی والوں کے لیے بڑی خوشخبری: شہر میں ڈبل ڈیکر بسیں جلد دوڑتی نظر آئیں گی!
سینئر وزیر شرجیل انعام میمن کی صدارت میں ہونے والے اجلاس میں فیصلہ کیا گیا ہے کہ کراچی کی پبلک ٹرانسپورٹ کو جدید خطوط پر استوار کرنے کے لیے 50 نئی بسیں خریدی جائیں گی، جن میں ڈبل ڈیکر بسیں بھی شامل ہوں گی۔
اگرچہ ابھی یہ تو واضح نہیں کیا گیا کہ ڈبل ڈیکر بسیں شہر کی سڑکوں پر کب لائی جاسکیں گی لیکن شرجیل میمن نے ماس ٹرانزٹ اتھارٹی اور دیگر متعلقہ حکام کو ہدایات دی ہیں کہ بسوں کی خریداری کے عمل کو تیز کیا جائے، تاکہ شہریوں کو آرام دہ اور کم قیمت سفر کی سہولت جلد از جلد فراہم کی جا سکے۔
انہوں نے مزید کہا کہ یہ اقدام عوام کی بڑھتی ہوئی سفری ضروریات کو پورا کرنے اور شہر کی ٹرانسپورٹ سروسز کو عالمی معیار کے مطابق بنانے کے لیے اٹھایا جا رہا ہے۔
ساتھ ہی، سینئر وزیر نے پیپلز بس سروس کے اسٹیشنز کی تعمیراتی کام کو بھی تیزی سے مکمل کرنے کی ہدایت کی ہے تاکہ شہریوں کو بہترین سفری تجربہ فراہم کیا جا سکے۔
کراچی کی سڑکیں، جدید بسیں، اور شہر کا نیا منظرنامہ – سب کچھ آنے والے دنوں میں بدلنے والا ہے!