نیشنل الیکٹرک پاور ریگولیٹری اتھارٹی (نیپرا) نے ایک اور نوٹیفکیشن جاری کرتے ہوئے بجلی کی قیمت میں 20 پیسے فی یونٹ اضافہ کر دیا ہے۔ یہ اضافہ رواں مالی سال کی پہلی سہ ماہی ایڈجسٹمنٹ کے تحت کیا گیا ہے، جس سے بجلی صارفین پر 1 ارب 18 کروڑ 70 لاکھ روپے کا نیا بوجھ پڑے گا۔
یہ اضافی رقم دسمبر 2024 کے بلوں میں صرف ایک ماہ کے لیے وصول کی جائے گی۔ تاہم، اچھی خبر یہ ہے کہ لائف لائن اور پری پیڈ صارفین کو اس اضافے سے استثنیٰ حاصل ہوگا۔ مزید برآں، ونٹر پیکج کے تحت بجلی کے اضافی استعمال پر بھی یہ ایڈجسٹمنٹ لاگو نہیں ہوگی۔
یاد رہے کہ گذشتہ مالی سال کی آخری سہ ماہی ایڈجسٹمنٹ کا اطلاق ختم ہو چکا ہے، جو ایک روپے 74 پیسے فی یونٹ وصول کی گئی تھی۔