نائیجیریا کے شمال وسطی علاقے میں دو شہروں کو ملانے والی شاہراہ پر ایک پیٹرول ٹینکر کے حادثے کے بعد لگنے والی آگ کے باعث کم از کم 70 افراد ہلاک ہو گئے ہیں۔امریکی نیوز ایجنسی ایسوسی ایٹڈ پریس کے مطابق نائیجیریا کی ایمرجنسی ریسپانس ایجنسی نے بتایا ہے یہ حادثہ سنیچر کی صبح ریاست کے علاقے سلیجا کے قریب بڑی سڑک پر ہوا۔نیشنل ایمرجنسی منیجمنٹ ایجنسی کے ترجمان حسینی عیسیٰ نے ایسوسی ایٹڈ پریس کو بتایا حادثے کے بعد ٹینکر سڑک پر آگ کی لپیٹ میں آ گیا، ٹینکر سے پٹرول منتقل کرنے کے لیے جنریٹر کا استعمال کیا گیا جو دھماکے کا سبب بنا۔ٹینکر حادثے کے بعد قریبی علاقے کے لوگ پٹرول سمیٹنے کے لیے اکٹھے ہوئے تھے جن میں راہگیر بھی موجود تھے کہ اچانک آگ بھڑک اٹھی۔ایندھن منتقلی کے دوران لگنے والی آگ کے شعلوں سے جھلسنے کے باعث 70 افراد ہلاک ہوگئے۔براعظم افریقہ کے سب سے زیادہ آبادی والے ملک نائیجیریا میں سامان کی ترسیل کے لیے مؤثر ریل نظام نہ ہونے کی وجہ سے شہروں کو ملانے والی بڑی شاہراہوں پر اکثر خطرناک قسم کے ٹرک حادثات پیش آتے ہیں۔
نائیجیریا میں سامان کی ترسیل کے لیے مؤثر ریل نظام موجود نہیں۔ فائل فوٹو اے ایف پی
گذشتہ سال ستمبر میں ریاست نائیجر میں ایک پیٹرول ٹینکر مویشی لے جانے والے دوسرے ٹرک سے ٹکرا گیا تھا جس کے نتیجے میں آگ لگنے سے کم از کم 48 افراد جاں بحق ہو گئے تھے۔
نائیجیریا کے فیڈرل روڈ سیفٹی کور کی جانب سے مہیا کئے جانے والے اعداد و شمار کے مطابق 2020 میں پیٹرول ٹینکر کے 1531 حادثات پیش آئے، جن میں 535 افراد جاں بحق اور 1142 زخمی ہوئے۔