لاہور کی مقامی عدالت نے مشہور ٹک ٹاکر رجب بٹ کو جنگلی حیات کے قوانین کی خلاف ورزی پر انوکھی سزا سنا دی۔ رجب بٹ، جو اپنی شادی پر دوست سے شیر کا بچہ تحفے میں لینے کی وجہ سے گرفتار ہوئے تھے، کو 50 ہزار روپے جرمانہ اور منفرد کمیونٹی سروس کی سزا دی گئی ہے۔

عدالتی فیصلے کے مطابق رجب بٹ کو ایک سال تک ہر ماہ جانوروں کے حقوق پر وی لاگز تیار کرنے کا پابند بنایا گیا ہے۔ ان ویڈیوز میں جانوروں کے تحفظ اور ان کے حقوق پر روشنی ڈالی جائے گی، جو ان کے تمام سوشل میڈیا پلیٹ فارمز پر شیئر کی جائیں گی۔

وی لاگز اپلوڈ کرنے سے قبل رجب بٹ کو پروبیشن آفیسر کی اجازت لینی ہوگی، اور یہ ویڈیوز ہر ماہ کے پہلے ہفتے میں شائع کی جائیں گی۔

عدالت نے محکمہ وائلڈ لائف کو ہدایت دی ہے کہ وہ رجب بٹ کو جانوروں کے حقوق کے حوالے سے معلومات اور مواد فراہم کریں تاکہ وی لاگز معلوماتی اور معیاری ہوں۔

ذاتی حاضری لازمی

فیصلے کے مطابق، پروبیشن آفیسر کی جانب سے طلب کیے جانے پر رجب بٹ کو ذاتی طور پر حاضر ہونا ہوگا، اور اگر وہ عدالت کے فیصلے پر عمل نہ کریں تو پروبیشن آفیسر عدالت کو رپورٹ کرے گا۔

رجب بٹ کی گرفتاری کا پس منظر

یاد رہے کہ وائلڈ لائف کی ٹیم نے گزشتہ ماہ چوہنگ کے قریب ایک نجی ہاؤسنگ سوسائٹی میں کارروائی کرتے ہوئے رجب بٹ کو گرفتار کیا تھا۔ وہ اپنی شادی کے موقع پر ایک دوست سے تحفے میں ملنے والے شیر کے بچے کو رکھے ہوئے تھے، جو جنگلی حیات کے قوانین کی خلاف ورزی ہے۔

یہ فیصلہ نہ صرف رجب بٹ کے لیے ایک سبق ہے بلکہ جانوروں کے تحفظ کے حوالے سے معاشرے میں شعور اجاگر کرنے کا ایک منفرد طریقہ بھی۔ اب دیکھنا یہ ہے کہ ٹک ٹاکر رجب بٹ اپنے وی لاگز کے ذریعے عوام کو کتنا متاثر کرتے ہیں اور جانوروں کے حقوق کی حمایت میں کیا کردار ادا کرتے ہیں۔