پاکستان کرکٹ بورڈ (پی سی بی) کے چیئرمین محسن نقوی نے امریکی کرکٹ بورڈ (یو ایس اے کرکٹ) کے چیف ایگزیکٹیو افسر جوناتھن اٹکیسن سے واشنگٹن میں ملاقات کی۔
پی سی بی کی جانب سے منگل کو جاری ہونے والے بیان کے مطابق ملاقات میں محسن نقوی اور جوناتھن اٹکیسن نے پاکستان، امریکہ اور کینیڈا کے مابین ایک سہ فریقی سیریز کرانے پر تبادلہ خیال کیا۔
ملاقات میں دونوں ممالک کی مردوں اور خواتین کی کرکٹ ٹیموں کے درمیان سیریز کرانے کے حوالے سے بات چیت کی گئی۔
چیئرمین پی سی بی محسن نقوی نے امریکی کرکٹ کے سی ای او کو کھلاڑیوں کی ڈویلپمنٹ اور کوچز کی ٹریننگ کی ہر ممکن معاونت کی یقین دہانی کروائی۔
پاکستان کرکٹ بورڈ کے چیئرمین نے کہا کہ پاکستان اور امریکہ کے درمیان کرکٹ کو فروغ دینے کے بے پناہ مواقع موجود ہیں، اس مقصد کے لیے دونوں ممالک کے حکام کو مل کر کام کرنا چاہیے۔
محسن نقوی نے جوناتھن اٹکیسن کو چیمپئنز ٹرافی کے میچز دیکھنے کے لیے پاکستان کے دورے کی دعوت بھی دی. امریکی کرکٹ بورڈ کے چیف ایگزیکٹو افسر نے چیئرمین پی سی بی کی دعوت پر ان کا شکریہ ادا کیا۔
اس ملاقات میں پاکلستان سپر لیگ (پی ایس ایل) کے چیف ایگزیکٹیو افسر سلمان نصیر بھی موجود تھے۔