امریکی صدر ڈونلڈ ٹرمپ نے واشنگٹن ڈی سی میں حادثے کے بعد ایک پریس بریفنگ کے دوران بتایا ہے کہ مسافر طیارے اور ہیلی کاپٹر کے تصادم اور اس کے بعد دریا میں کریش ہونے کے باعث ہلاک ہونے والوں میں روسی باشندوں کے علاوہ دیگر غیر ملکی بھی شامل ہیں۔
امریکی صدر ڈونلڈ ٹرمپ نے واشنگٹن ڈی سی میں حادثے کے بعد ایک پریس بریفنگ کے دوران بتایا ہے کہ مسافر طیارے اور ہیلی کاپٹر کے تصادم اور اس کے بعد دریا میں کریش ہونے کے باعث ہلاک ہونے والوں میں روسی باشندوں کے علاوہ دیگر غیر ملکی بھی شامل ہیں۔
خیال رہے کہ حکام کے مطابق حادثے میں امدادی کارروائیوں کے نتیجے میں 28 لاشیں نکال لی گئی ہیں لیکن کسی بھی شخص کے زندہ ملنے کی امید نہیں اور تلاش اور بچاؤ کی کارروائی اب ’ریکوری آپریشن‘ کی شکل اختیار کر رہا ہے۔
ڈونلڈ ٹرمپ نے پریس بریفنگ کے دوران کہا کہ 'آپ کے طرح ہمارے دل بھی ٹوٹ چکے ہیں' اور 'ہم آپ کے آنسو صاف کرنے کے لیے یہاں موجود ہیں۔'
انھوں نے کہا کہ یہ ہماری قوم کے لیے 'تکلیف کی گھڑی ہے' اور پورا ملک سوگوار ہے۔
خیال رہے کہ یہ حادثہ بدھ کی شب اس وقت پیش آیا جب کنساس سے آنے والا امریکن ایئرلائنز کا طیارہ واشنگٹن کے رونلڈ ریگن نیشنل ایئرپورٹ کے قریب امریکی فوج کے ایک بلیک ہاک ہیلی کاپٹر سے ٹکرا گیا۔
امریکی ذرائع ابلاغ کا کہنا ہے کہ تصادم کے بعد جہاز کے کئی ٹکڑے ہو گئے جو ہیلی کاپٹر سمیت دریائے پوٹومک میں جا گرے۔ اس تصادم میں ہیلی کاپٹر کا بیشتر حصہ سلامت رہا۔
حادثے کا شکار ہونے والے مسافر بردار طیارے میں عملے کے ارکان سمیت 64 افراد سوار تھے۔امریکی محکمہ دفاع کے مطابق فوجی ہیلی کاپٹر ورجینیا کے فورٹ بیلوائر اڈے سے اڑا تھا اور اس پر تین فوجی سوار تھے۔
ٹرمپ کا مزید کہنا تھا کہ انھیں کچھ 'ٹیپس' سنائی گئی ہیں، یہاں وہ بظاہر ایئر ٹریفک کنٹرول کی ریکارڈنگز کے بارے میں بات کر رہے تھے۔ انھوں نے بتایا کہ مسافر طیارہ 'سب کچھ ٹھیک کر رہا تھا' اور معمول کے راستے پر تھا لیکن 'کسی وجہ سے' ہیلی کاپٹر بھی اسی بلندی پر تھا اور 'ایک ایسے اینگل پر اڑ رہا تھا جو بہت ہی غلط تھا۔'
انھوں نے کہا کہ 'ہیلی کاپٹر کے تناظر سے پائلٹ کا مسئلہ تھا'، انھوں نے یہ نہیں بتایا کہ یہ 'مسئلہ' کیا تھا۔ تاہم انھوں نے مزید کہا کہ 'رات کے وقت مطلع صاف تھا۔'
صدر کا مزید کہنا تھا کہ مزید ٹیپس بھی ریلیز کی جائیں گی جن میں حادثے کی ویڈیوز بھی ہوں گی۔
ٹرمپ نے کہا کہ 'ہیلی کاپٹر کے پاس یہ صلاحیت تھی کہ وہ اس جگہ رک جاتا، اوپر چلا جاتا، نیچے جاتا یا مڑ جاتا، لیکن جس طرف یہ مڑا وہ ظاہر ہے درست موڑ نہیں تھا۔'
ان کا مزید کہنا تھا کہ 'ہیلی کاپٹر غلط وقت پر غلط جگہ پر موجود تھا۔'
انھوں نے کہا کہ اس بارے میں خبردار کیا گیا تھا لیکن یہ سب 'بہت دیر سے کیا گیا تھا'۔ انھوں نے کہا بہت پہلے خبردار کر دیا جانا چاہیے تھا۔
انھوں نے اس بریفنگ کے دوران سابق وزرائے اعظموں جو بائیڈن اور باراک اوباما کو تنقید کا نشانہ بناتے ہوئے ان پر الزام عائد کیا کہ انھوں نے ٹریفک کنٹرول کی نوکریوں کے لیے ایسے لوگوں کو بھرتی کیا جو 'معمولی ذہانت' کے حامل تھے اور اس نوکری کے لیے 'بہترین ذہانت' کی ضرورت ہوتی ہے۔
انھوں نے کہا کہ اس واقعے کی جامع تحقیقات کروائی جائیں گی تاکہ 'یہ معلوم ہو سکے کہ یہ حادثہ کیسے ہوا اور آئندہ کبھی ایسا کوئی حادثے پیش نہ آئے۔'
اس حادثے کے فوراً بعدامدادی سرگرمیوں کا سلسلہ شروع کر دیا گیا جو رات بھر جاری رہا۔ حکام کے مطابق امدادی سرگرمیوں میں 300 کارکنوں نے حصہ لیا جنھیں سرد موسم کی وجہ سے مشکلات کا سامنا رہا۔
ریسکیو حکام کے مطابق اب تک 28 افراد کی لاشیں نکالی جا چکی ہیں جن میں سے 27 طیارے جبکہ ایک ہیلی کاپٹر کا مسافر تھا۔
واشنگٹن ڈی سی میں فائر اینڈ ایمرجنسی سروسز ڈپارٹمنٹ کے سربراہ جان ڈونیلی کا کہنا ہے کہ امدادی کارکنوں کی پہلی ترجیح طیارہ حادثے میں زندہ بچ جانے والوں کی تلاش ہے لیکن یہ واضح نہیں کہ کوئی زندہ بچا ہے کہ نہیں۔ 'ہمیں نہیں معلوم کہ کوئی زندہ بچ سکا ہے یا نہیں'۔
ان کا کہنا تھا کہ 'جمعرات کی صبح ہی علم ہو گا کہ امدادی آپریشن کہاں پہنچا ہے اور تب ہم صورتحال کا دوبارہ جائزہ لیں گے۔'
جان ڈونیلی کا یہ بھی کہنا ہے کہ جہاں امدادی کارکنوں کی پہلی ترجیح زندہ بچ جانے والوں کی تلاش ہے وہیں وہ حادثے کے ثبوت محفوظ رکھنے میں نیشنل ٹرانسپورٹیشن سیفٹی بورڈ کی مدد بھی کر رہے ہیں۔
انھوں نے بتایا کہ امدادی کارروائیوں کا عمل ایک انتہائی پیچیدہ آپریشن ہے اور جائے حادثہ پر حالات انتہائی خراب ہیں۔
ان کا کہنا تھا کہ 'وہاں ہوا چل رہی ہے۔ سخت سردی کی وجہ سے دریا کا پانی نہ صرف ٹھنڈا ہے بلکہ اس میں برف کے ٹکڑے بھی ہیں اور وہاں بہت زیادہ روشنی نہیں ہے۔ یہ غوطہ خوروں کے لیے بہت سخت حالات ہیں'۔
امریکی میڈیا کا کہنا ہے کہ جہاز کے کچھ حصے پانچ سے آٹھ فٹ گہرے پانی میں ڈوبے ہوئے ہیں جبکہ غوطہ خور جہاز کے دو بلیک باکسز میں سے ایک ڈھونڈنے میں کامیاب ہو گئے ہیں۔
ہیلی کاپٹر نیچے یا اوپر کیوں نہیں ہوا، مڑا کیوں نہیں؟
ادھر امریکی صدر ڈونلڈ ٹرمپ نے کہا ہے کہ بظاہر یہ ایک ایسا حادثہ تھا جس سے بچا جا سکتا تھا۔
سوشل میڈیا پلیٹ فارم ٹروتھ سوشل پر جاری بیان میں انھوں نے لکھا کہ ’یہ ایک بری صورت حال ہے اور ایسا لگتا ہے کہ اس سے بچا جا سکتا تھا۔‘
ان کا کہنا تھا کہ ’ہیلی کاپٹر کافی دیر تک سیدھا مسافر طیارے کی جانب جاتا رہا۔ موسم بالکل صاف تھا، طیارے کی لائٹیں جل رہی تھیں۔ ہیلی کاپٹر نیچے یا اوپر کیوں نہیں ہوا، مڑا کیوں نہیں؟‘
انھوں نے سوال کیا کہ ’کنٹرول ٹاور نے ہیلی کاپٹر کو بتایا کیوں نہیں کہ کیا کرنا ہے بجائے اس کے کہ سوال کرے کہ کیا انھوں نے جہاز کو دیکھا؟‘
خیال رہے کہ امریکی خبر رساں ادارے سی این این کے مطابق فضائی حادثے سے چند لمحے قبل ایک ایئر ٹریفک کنٹرولر کو ہیلی کاپٹر کے پائلٹ سے پوچھتے سنا جا سکتا ہے کہ کیا اسے امریکن ایئرلائنز کا طیارہ دکھائی دے رہا ہے۔
ایئر ٹریفک کنٹرول کی جانب سے دوسری وارننگ کے چند سیکنڈ بعد ہی بلیک ہاک ہیلی کاپٹر امریکن ایئر لائنز کے طیارے سے ٹکرا گیا۔ آڈیو میں ہیلی کاپٹر کی جانب سے کوئی جواب سنائی نہیں دے رہا ہے۔
ایئر ٹریفک کنٹرول کی یہ آڈیو لائیو اے ٹی سی نامی ایک ویب سائٹ نے جاری کی ہے۔
لائیو اے ٹی سی 1200 سے زیادہ ہوائی اڈوں کی مواصلات پر نظر رکھتی ہے۔ بی بی سی کی جانب سے اس آڈیو کی آزادانہ ظور پر تصدیق نہیں کی جا سکی ہے۔
سی بی ایس ٹی وی کے مطابق امریکی حکام نے اس حادثے کی تحقیقات کا آغاز کر دیا ہے اور ان کی توجہ اس سوال پر مرکوز ہے کہ طیارے سے ٹکرانے والا ہیلی کاپٹر حادثے کے وقت اس مقام اور اونچائی پر کیوں موجود تھا۔
’بیوی نے کہا 20 منٹ میں اتر رہے ہیں‘
امریکی صدر ڈونلڈ ٹرمپ نے کہا ہے کہ بظاہر یہ ایک ایسا حادثہ تھا جس سے بچا جا سکتا تھا۔حامد رضا ریگن واشنگٹن انٹرنیشنل ایئر پورٹ پر انتظار کر رہے تھے کہ کب ریاست کنساس میں وچیٹا سے اڑنے والی پرواز اترے گی۔
اس جہاز میں ان کی اہلیہ بھی سوار تھیں۔ حادثے کی خبر آنے کے بعد بی بی سی کے امریکہ میں پارٹنر سی بی ایس نیوز کے ایک مقامی پارٹنر سے بات کرتے ہوئے حامد رضا نے بتایا کہ ان کی اہلیہ نے فون پر ٹیکسٹ پیغام بھیج کر بتایا تھا کہ ’میں 20 منٹ میں پہنچنے والی ہوں۔‘
اور طیارہ ایئر پورٹ کے قریب پہنچ بھی چکا تھا جب ایری شلمین کی اس پر نظر پڑی۔
وہ ایئرپورٹ سے ملحقہ جارج واشنگٹن پارک وے پر گاڑی چلا رہے تھے جب پہلی نظر میں ان کو سب کچھ ٹھیک لگا۔ انھوں نے این بی سی واشنگٹن سے بات کرتے ہوئے بتایا کہ ’طیارہ بلکل ٹھیک اڑ رہا تھا جب اچانک دائیں جانب مڑا تو اس کے نیچے سے جیسے چنگاریاں نکل رہی تھیں۔‘
اس وقت ان کو احساس ہو گیا تھا کہ ’کچھ بہت غلط ہونے والا ہے۔‘ ایری کے مطابق ایئر پورٹ کے قریب رہنے کی وجہ سے وہ اکثر طیاروں کو لینڈ ہوتے دیکھتے ہیں اور اس تجربے کی بنیاد پر ان کو معلوم ہے کہ رات کے وقت طیارے کا نچلا حصہ روشن نہیں ہونا چاہیے۔
انھوں نے بتایا کہ وہ چنگاریاں ’کسی بڑی موم بتی جیسی‘ تھیں جو طیارے کے ’اگلے حصے سے پچھلے حصے تک جا رہی تھیں۔‘
ایری کا کہنا تھا کہ انھوں نے مڑ کر سڑک کی جانب دیکھا کہ شاید انھیں دھماکہ یا کریش کے کوئی ثبوت دکھائی دیں لیکں انھیں کسی دھماکے کی آواز نہیں سنائی دی۔ ’مجھے کچھ نہیں دکھا، سب کچھ ایک دم نارمل تھا۔‘
آسمان پر ’سفید شعلہ‘
ایری نے این بی سی کو بتایا کہ انھیں شک ہوا کہ کہیں انھوں نے کوئی خواب تو نہیں دیکھا۔ ’اگر یہ اتنا ہی خوفناک حادثہ تھا تو مجھے بعد میں کچھ دکھائی کیوں نہیں دیا۔‘
ان کا کہنا تھا کہ جب وہ آگے گئے تو انھیں امدادی کارروائیوں میں حصہ لینے والے جاتے دکھائی دیے۔
جمی مازیو ایئر پورٹ کے قریب ہی موجود ایک پارک میں اپنی گرل فرینڈ کے ساتھ رات کا کھانا کھا رہے تھے جب انھوں نے فضا میں ایک ’سفید شعلہ‘ دیکھا۔
وہ بتاتے ہیں کہ ان کو اس وقت تک کچھ سمجھ نہیں آیا جب تک ایمرجنسی حکام نے موقع پر پہنچ کر کام شروع نہیں کیا۔
