"شادی کے بعد اپنی بیوی کو چھپا تو نہیں سکتے، لوگ ان سے نفرت کریں گے چاہے کچھ بھی ہو کیوں کہ وہ اعلیٰ ڈیجیٹل تخلیق کاروں میں سے نہیں ہے۔" یہ بات پاکستانی یوٹیوبر رجب بٹ نے حالیہ انٹرویو میں کہی، جس پر انہیں سوشل میڈیا پر شدید تنقید کا سامنا ہے۔ رجب بٹ، جو کہ اپنے فیملی ولاگنگ کے لیے مشہور ہیں، نے ڈکی بھائی کے دفاع میں یہ بیان دیا اور اس کے ساتھ ساتھ سوشل میڈیا پر ہونے والی تنقید پر بھی کھل کر بات کی۔
رجب بٹ نے اپنی شادی پر ہونے والی تنقید کا بھی جواب دیا، جس میں ان کی مہنگی شادی، اسراف اور نمود و نمائش کو شدید کڑی نظروں سے دیکھا گیا۔ "جب میں نے اپنی شادی کی ویڈیوز پوسٹ کیں تو لوگوں نے کہا کہ میں اپنی بیوی کو دکھا کر فالوورز حاصل کر رہا ہوں، لیکن کیا ہم اپنی بیوی کو چھپائیں؟" رجب نے اپنی بات جاری رکھتے ہوئے کہا۔ انہوں نے مزید کہا کہ شادی کے دوران ان کے دوستوں نے جو پیسہ خرچ کیا، وہ ان کے ارمانوں کا حصہ تھا، اور وہ انہیں روک نہیں سکتے تھے۔
رجب بٹ نے یہ بھی واضح کیا کہ وہ اس مقام تک پہنچنے کے لیے دن رات محنت کرتے رہے ہیں، اور یہ کامیابی انہوں نے صفر سے شروع کرکے حاصل کی ہے۔ "میں وہ نہیں تھا جو خود پر پیسے پھینک رہا تھا، لیکن میرے دوستوں نے شادی پر جو خرچ کیا وہ ان کی خوشی تھی، اور میں انہیں اس میں شریک ہونے سے نہیں روک سکتا تھا۔"
ان کا کہنا تھا کہ سوشل میڈیا پر ان کی محنت اور کامیابی پر جو تنقید کی جاتی ہے، وہ اسے سمجھتے ہیں، مگر وہ چاہتے ہیں کہ اس کے بجائے لوگوں کو ان کی محنت کی حوصلہ افزائی کرنی چاہیے۔ رجب بٹ نے اپنے شائقین سے درخواست کی کہ انہیں بلاوجہ تنقید کا نشانہ بنانے کے بجائے، ان کی کامیابیوں پر توجہ دی جائے۔