اسلام آباد: عالمی مالیاتی ادارے (آئی ایم ایف) کی مینجنگ ڈائریکٹر نے کہا ہے کہ پاکستانی معیشت ترقی کی سمت میں آگے بڑھ رہی ہے۔
وزیر اعظم شہباز شریف سے آئی ایم ایف کی منیجنگ ڈائریکٹر نے ملاقات کی۔ ملاقات میں آئی ایم ایف پروگرام اور حکومتی اصلاحات سے متعلق امور پر تبادلہ خیال کیا گیا۔
اس موقع پر وزیر اعظم شہباز شریف نے کہا کہ مالیاتی نظم و ضبط کو برقرار رکھنے کی کوشش کریں گے۔ اور ادارہ جاتی اصلاحات کے نفاذ کے لیے اقدامات کر رہے ہیں۔
وزیر اعظم شہباز شریف نے توسیعی فنڈ سہولت کے تحت پیشرفت کی اہمیت کو بھی اجاگر کرتے ہوئے کہا کہ فنڈ سہولت نے معیشت کو مستحکم کرنے میں کلیدی کردار ادا کیا ہے۔ ٹیکس اصلاحات اور شعبہ توانائی کی بہتر کارکردگی کے لیے کوششیں جاری ہیں۔
یہ بھی پڑھیں: اسلام آباد ہائیکورٹ نے ججز ریپریزنٹیشن سے متعلق فیصلہ جاری کر دیا
آئی ایم ایف مینجنگ ڈائریکٹر نے پروگرام مؤثر طریقے سے نافذ کرنے میں حکومتی کوششوں کی تعریف کرتے ہوئے کہا کہ پاکستانی معیشت ترقی کی سمت میں آگے بڑھ رہی ہے۔
انہوں نے کہا کہ پاکستان میں افراط زر میں کمی ہوئی ہے۔ اور پاکستان ترقی کی راہ پر گامزن ہے۔
آئی ایم ایف مینجنگ ڈائریکٹر نے اصلاحاتی ایجنڈے پر عملدرآمد کے لیے وزیر اعظم کے عزم کی تعریف کی۔