چیمپئنز ٹرافی کے ہائی وولٹیج میچ میں پاکستان کی پوری ٹیم بھارت کے خلاف 241 رنز پر آؤٹ ہوگئی۔ دبئی انٹرنیشنل کرکٹ اسٹیڈیم میں کھیلے جارہے اس میچ میں قومی ٹیم کے کپتان محمد رضوان نے بھارت کے خلاف ٹاس جیت کر بیٹنگ کا فیصلہ کیا۔ پاکستان کی پوری ٹیم 49 اعشاریہ 4 اوورز میں 241 رنز بنا کر آؤٹ ہوگئی۔
پاکستان کو پہلا نقصان 41 رنز پر بابر اعظم کی صورت میں اٹھانا پڑا جو 23 رنز بناکر ہاردک پانڈیا کی گیند کا شکار بنے، اس کے بعد امام الحق 10 رنز بناکر رن آؤٹ ہوگئے۔
محمد رضوان 46 رنزبناکرآؤٹ ہوئے جبکہ سعود شکیل 62 رنزبناکر پویلین لوٹے، طیب طاہر 4 اور سلمان آغا 19 رنز بنا کر آؤٹ ہوئے۔
ان کے بعد آنے والے شاہین آفریدی بغیر کوئی رن بنائے آؤٹ ہوئے، نسیم شاہ نے 14 رنز کی اننگز کھیلی، خوشدل شاہ نے 38 اور حارث رؤف نے 8 رنز بنائے۔
ٹاس کے موقع پر گفتگو کرتے ہوئے قومی ٹیم کے کپتان محمد رضوان نے کہا کہ ہماری ٹیم آج کے میچ میں اچھی کارکردگی دکھائے گی، ٹیم میں ایک تبدیلی ہے ، فخرزمان کی جگہ امام الحق کو شامل کیا گیا ہے۔
محمد رضوان نے کہا کہ اسکور بورڈ پر اچھا ٹوٹل سجائیں گے۔
پاکستان کی پلیئنگ الیون میں بابراعظم ، امام الحق ، سعود شکیل ، محمد رضوان، آغا سلمان، طیب طاہر، خوشدل شاہ، ابرار احمد ، نسیم شاہ ، شاہین آفریدی اور حارث رؤف شامل ہیں۔
خیال رہے کہ ٹورنامنٹ میں رہنے کے لیے پاکستان کو بھارت کے خلاف یہ میچ جیتنا ضروری ہے، ہارنے کی صورت میں پاکستان ٹورنامنٹ سے باہر ہوسکتا ہے۔
اس سے قبل پاکستان نیوزی لینڈ کے خلاف اپنا افتتاحی میچ ہار چکا ہے جب کہ بھارتی ٹیم کو افغانستان کے خلاف کامیابی ملی تھی۔
پاکستانی پلیئنگ الیون
بھارت کے خلاف اہم ترین میچ میں پاکستان ٹیم اوپنر امام الحق، بابراعظم، سعود شکیل، کپتان محمد رضوان، طیب طاہر، سلمان علی آغا، خوشدل شاہ، شاہین شاہ آفریدی، نسیم شاہ، حارث رؤف اور ابرار احمد پر مشتمل ہے۔
بھارتی پلیئنگ الیون
بھارتی ٹیم میں کپتان روہت شرما، شھبمن گل، ویرات کوہلی، شریاس ایئر، اکشر پٹیل، کے ایل راہول، ہردک پانڈیا، روندرا جدیجہ، ہرشت رانا، محمد شامی اور کلدیپ یاودیو شامل ہیں۔
مجھے لگتا ہے پاکستان یہ میچ ضرور جیتے گا، محسن نقوی
قبل ازیں چیئرمین پی سی بی محسن نقوی نے دبئی کرکٹ اسٹیڈیم میں گفتگو کرتے ہوئے کہا کہ مجھے لگتا ہے پاکستان یہ میچ ضرور جیتے گا، قومی کرکٹ ٹیم پوری طرح تیار اور فارم میں ہے، ایک سوال پر انہوں نے کہا کہ پاکستان جیت جائے یہی بڑا انعام ہے۔
واضح رہے کہ قومی ٹیم کو اگلے مرحلے میں رسائی کے لیے آج بھارت کو لازمی شکست دینا ہوگی، میچ میں جیت یقینی بنانے کے لیے رضوان الیون نے گزشتہ روز بھرپور تیاریاں کیں اور آپشنل ٹریننگ سیشن میں بھی حصہ لیا۔
تاہم بابر اعظم کی طبیعت ناساز ہوگئی، زکام کے باعث آنکھوں سے پانی بہنے لگا، آپشنل ٹریننگ کا حصہ بھی نہ بن سکے، ذرائع کے مطابق دوا لینے کے بعد بابراعظم کی طبعیت پہلے سے بہتر ہوگئی ہے۔
ہیڈکوچ عاقب جاوید نے میچ کا دباؤ ہونے کا اعتراف کرتے ہوئے کہا ہے کہ پریشر نہ ہو تو پاک بھارت میچ کی خوبصورتی ختم ہوجائے گی، سارے شائقین کو اسٹیڈیم سے باہر نکال دیں پھر بھی پاک بھارت میچ کا دباؤ رہے گا۔
ہیڈ کوچ نے پریس کانفرنس میں پاکستانی فاسٹ باؤلرز کو میچ ونر قرار دیتے ہوئے کہا کہ شاہین شاہ آفریدی اور نسیم شاہ سے کافی امیدیں ہیں، انہوں نے کہا کہ بھارت کے خلاف موقع ہے، کھلاڑی نام کماسکتے ہیں۔
دریں اثنا پاکستان کرکٹ ٹیم کے فاسٹ بالرز شاہین شاہ آفریدی ، نسیم شاہ اور حارث رؤف نے پاکستان اور بھارت کے میچ کو سب سے بڑا مقابلہ قرار دے دیا۔
چیمپئنز ٹرافی میں پاکستان کا پلڑا بھاری
ریکارڈز کی بات کی جائے تو چیمپئنز ٹرافی میں پاکستان کو بھارت پر سبقت حاصل ہے، چیمپئنز ٹرافی میں دونوں ٹیمیں اب تک 5 مرتبہ مدمقابل آئی ہیں جن میں 3 میچ پاکستان اور 2 بھارت جیتا ہے۔
روایتی حریفوں کے درمیان دبئی میں اب تک 2 ون ڈے میچز کھیلے جاچکے ہیں اور دونوں میں بھارت ہی کامیاب رہا، دونوں ون ڈے 2018 میں کھیلے گئے تھے جبکہ 3 ٹی ٹوئنٹی میچز میں 2 پاکستان اور ایک بھارت کے نام رہا۔
دبئی کرکٹ اسٹیڈیم میں ٹیموں کی مجوعی کارکردگی کی بات کی جائے تو پاکستان نے دبئی میں اب تک 22 ون ڈے کھیلے ہیں اور صرف 8 ہی کامیابی حاصل کرسکا ہے جبکہ بھارت اب تک اس گراونڈ پر ون ڈے کرکٹ میں ناقابل شکست ہے۔