چیمپئنز ٹرافی اب اختتام کی جانب گامزن ہے اور سیمی فائنل لائن اپ مکمل ہوگئی ہے پی سی بی نے شائقین کرکٹ کے لیے بڑا اعلان کیا ہے۔
آئی سی سی چیمپئنز ٹرافی پاکستان کی میزبانی میں جاری ہے۔ میگا ایونٹ سے پاکستان کے باہر ہونے پر مایوس شائقین کرکٹ کے لیے بڑی خوشخبری ہے تاہم یہ خوشخبری خاص شائقین کرکٹ کے لیے ہی ہے۔
پاکستان کرکٹ بورڈ نے بارش سے متاثرہ ان میچوں کے ٹکٹوں کی رقم واپس کرنے کا اعلان کر دیا ہے جس میں بارش کی وجہ سے ٹاس بھی نہ ہو سکا تھا۔
پی سی بی کے اعلامیہ میں کہا گیا ہے کہ ٹاس سے قبل ختم ہونے والے میچ کے تمام انکلوژرز کے ٹکٹوں کی رقم ان کے خریداروں کو واپس کی جائے گی۔
تاہم ہاسپٹلیٹی باکسز کے ٹکٹ (باکس اور پی سی بی گیلری) کے ٹکٹ ہولڈرز رقم کی واپسی کے اہل نہیں ہوں گے۔
پاکستان کرکٹ بورڈز نے مذکورہ میچز کے ٹکٹ ہولڈرز شائقین کو کہا ہے کہ وہ 10 سے 14 مارچ تک کوریئر کمپنی کی منتخب آؤٹ لیٹس پر اپنی رقم کی واپسی کا دعویٰ کر سکتے ہیں۔ تاہم شائقین کو رقم کی واپسی کے لیے اصل اور بغیر نقصان زدہ ٹکٹ پیش کرنا ہوگا۔
واضح رہے کہ آئی سی سی چیمپئنز ٹرافی کے راولپنڈی اسٹیڈیم میں شیڈول دو میچز بارش کی نذر ہوئے تھے۔ ان میں 25 فروری کو آسٹریلیا اور جنوبی افریقا جب کہ 27 فروری کو بنگلادیش اور پاکستان کے مابین میچز شامل ہیں۔ ان میچز میں بارش کی وجہ سے ٹاس بھی نہیں ہو سکا تھا۔