انڈیا کی ریاست کرناٹک میں اسرائیلی خاتون سیاح اور ہوم سٹے آپریٹر کو مبینہ طور پر اجتماعی زیادتی کا نشانہ بنایا گیا ہے۔این ڈی ٹی وی کے مطابق پولیس نے سنیچر کو بتایا کہ یہ واقعہ جمعرات کی شب پیش آیا اور اس میں ملوث دو ملزمان کو گرفتار کر لیا گیا ہے۔یہ واقعہ اس وقت پیش آیا جب یہ خواتین تین اور سیاحوں کے ہمراہ بینگلورو شہر سے 350 کلومیٹر فاصلے پر واقع کوپال میں ایک جھیل کے کنارے موجود تھے۔ملزمان نے خواتین کو زیادتی کا نشانہ بنانے سے قبل ان کے ساتھ تین سیاحوں کو جھیل میں دھکیل دیا تھا۔نہر میں گرائے جانے والے امریکی سیاح ڈینیئل اور مہاراشٹر سے تعلق رکھنے والے پنکج تیر کر نکلنے میں کامیاب ہو گئے جبکہ اڑیسہ کے بیباش ڈوب گئے۔ڈوب جانے والے انڈین سیاح کی لاش سنیچر کو ملی ہے۔کوپال کے سپرنٹنڈنٹ پولیس رام ایل اراسدی نے بتایا کہ ’تین میں سے دو ملزمان گرفتار کر لیے گئے ہیں جبکہ تیسرے کی گرفتاری کے لیے کوششیں جاری ہیں۔
ملزمان نے خواتین کو زیادتی کا نشانہ بنانے سے قبل ان کے ساتھ تین سیاحوں کو جھیل میں دھکیل دیا تھا (فوٹو: کرناٹک پولیس)
پولیس کا کہنا ہے کہ زیادتی کا نشانہ بننے والی خواتین ہسپتال میں زیرعلاج ہیں۔
ایس پی رام ایل اراسدی نے مزید بتایا کہ ’پانچ افراد (جن میں دو خواتین اور تین مرد تھے) پر سناپور کے قریب حملہ کیا گیا۔ ان میں سے دو غیرملکی تھے، ایک کا تعلق امریکہ جبکہ دوسری خاتون اسرائیل سے ہیں۔‘’خاتون نے اپنی درخواست میں کہا کہ ان کے ساتھ مار پیٹ کی گئی اور ملزمان نے انہیں جنسی زیادتی کا نشانہ بنایا۔‘29 سالہ ہوم سٹے آپریٹر نے اپنی شکایت میں کہا کہ وہ ڈنر کے بعد اپنے چار مہمانوں کے ساتھ ستاروں کا نظارہ کرنے تُنگابھدرا لیفٹ بینک کینال پہنچیں تو بائیک سوار ملزمان وہاں آ گئے۔
پولیس کے مطابق ملزمان کے خلاف ریپ، اجتماعی زیادتی اور ڈکیتی کی دفعات کے تحت مقدمہ درج کیا گیا ہے (فوٹو: کرناٹک پولیس)
پولیس رپورٹ کے مطابق ملزمان نے پہلے سیاحوں سے پیٹرول کے لیے 100 روپے مانگے۔ جب سیاحوں نے انکار کیا تو انہوں نے حملہ کرتے ہوئے مرد سیاحوں کو جھیل میں دھکیل دیا اور خواتین کے ساتھ جنسی زیادتی کی۔
اس کے بعد ملزمان موٹرسائیکل پر سوار ہو کر فرار ہو گئے۔واقعے کے بعد پولیس ڈاگ سکواڈ اور فائر بریگیڈ کے عملے نے جھیل میں ڈوب جانے والے سیاح کی تلاش شروع کر دی اور سنیچر انہیں ہلاک سیاح کی لاش مل گئی۔پولیس کے مطابق ملزمان کے خلاف ریپ، اجتماعی زیادتی اور ڈکیتی کی دفعات کے تحت مقدمہ درج کیا گیا ہے اور اس کیس کی تحقیقات دو خصوصی ٹیمیں کر رہی ہیں۔