لاہور: امیر جماعت اسلامی حافظ نعیم الرحمان نے کہا ہے کہ حکومت کی جانب سے 70 روپے فی لیٹر پیٹرول لیوی کو مسترد کرتے ہیں۔
امیر جماعت اسلامی حافظ نعیم الرحمان نے اپنے ایک بیان میں کہا ہے کہ حکومت فوری طور پر پیٹرول کی قیمتوں میں کمی اور بجلی کے بلوں میں عوام کو ریلیف دینے کا اعلان کرے۔
انہوں ںے کہا کہ ملک کے معاشی حالات دن بدن بگڑ رہے ہیں۔ اور حکومت کی پالیسیوں کی وجہ سے عوام کو مزید مشکلات کا سامنا ہے۔
یہ بھی پڑھیں: ایک سال میں 50 ارب روپے کا قرضہ اتار دیا، علی امین گنڈاپور کا دعویٰ
حافظ نعیم الرحمان نے کہا کہ جب قوم کے مینڈیٹ پر ڈاکہ ڈالا جائے تو عوام حکمرانوں سے یکجہتی کا مظاہرہ کیسے کر سکتے ہیں؟ جب تک فارم 47 کے مطابق حکومتیں مسلط کی جاتی رہیں گی۔ ملک میں استحکام نہیں آسکتا۔
کراچی کے سیاسی حالات پر گفتگو کرتے ہوئے انہوں نے کہا کہ وہاں کے عوام اچھی طرح جانتے ہیں کہ ایم کیو ایم کو جعلی طریقے سے مسلط کیا گیا ہے۔ حکومت کی ذمہ داری ہے کہ عوام کو سستی اور معیاری تعلیم اور صحت کی سہولیات فراہم کرے۔
انہوں نے کہا کہ حکمران طبقہ خود کو تعلیم یافتہ ظاہر کرتا ہے۔ مگر عملی طور پر قوم کے بچوں کو جاہل بنانے کی کوشش کر رہا ہے۔ ریاست کا فرض ہے کہ عوام کو بنیادی سہولیات فراہم کرے اور ملک میں امن و امان کو یقینی بنایا جائے۔ مگر بدقسمتی سے عوام کو ریلیف دینے کے بجائے مزید بوجھ ڈالنے کی کوشش کی جا رہی ہے۔
حافظ نعیم الرحمان نے کہا کہ حکومت سے مطالبہ ہے کہ عوامی مسائل کو حل کرنے کے لیے فوری اقدامات کیے جائیں۔ ورنہ جماعت اسلامی عوامی سطح پر شدید احتجاج کرنے پر مجبور ہو گی۔