میٹروپولیٹن پولیس نے اس بات کی تصدیق کی ہے کہ آگ کے پس پشت کوئی مشکوک وجہ نہیں۔ اس کے بعد اب تحقیقات میں ’بجلی کی تقسیم کے آلات‘ پر توجہ مرکوز کی جائے گی۔
کئی ایئر لائنز نے اعلان کیا ہے کہ وہ ہیتھرو پر اترنے اور وہاں سے اڑان بھرنے والی پروازیں دوبارہ شروع کریں گیجمعے کے روز ہیتھرو ہوائی اڈے کو مغربی لندن کے بجلی گھر میں میں آگ لگنے کی وجہ سے بند کر دیا گيا تھا لیکن اب اسے بحال کر دیا گیا ہے۔ اطلاعات کے مطابق اس بندش سے ہونے والے نقصان کے بعد سنیچر کو ہیتھرو ایئرپورٹ پر مکمل سروس متوقع ہے۔
برٹش ایئرویز نے اعلان کیا ہے کہ اس کی طویل فاصلے کی آٹھ پروازوں کو جمعے کی شام ہی ہیتھرو سے پرواز کے لیے کلیئرینس دے دی گئی اور وہ ’صارفین سے فوری طور پر رابطہ کر رہے ہیں اور انھیں اپ ڈیٹ کر رہے ہیں۔‘
کئی دیگر ایئر لائنز نے بھی اعلان کیا ہے کہ وہ ہیتھرو پر اترنے اور وہاں سے اڑان بھرنے والی پروازیں دوبارہ شروع کریں گی۔ ان میں برٹش ایئرویز کے ساتھ ایئر کینیڈا اور یونائیٹڈ ایئر لائنز بھی شامل ہیں۔
واضح رہے کہ مغربی لندن کے علاقے ہیز میں الیکٹرک سب سٹیشن میں پہلے دو دھماکے سُنے گئے اور پھر وہاں آگ لگ گئی جس کے سبب تقریباً 5000 گھر بجلی سے محروم ہو گئے۔ آتشزدگی کے باعث قریبی مکانات سے 150 افراد کو بھی کہیں اور منتقل کیا گیا۔
سوشل میڈیا پر گردش کرنے والی ویڈیو میں سب سٹیشن سے آگ کے شعلے اُٹھتے ہوئے دیکھے گئے۔
میٹروپولیٹن پولیس نے اس بات کی تصدیق کی ہے کہ آگ کے پس پشت کوئی مشکوک وجہ نہیں۔ اس کے بعد اب تحقیقات میں ’بجلی کی تقسیم کے آلات‘ پر توجہ مرکوز کی جائے گی۔
یاد رہے کہ اس سے قبل لندن پولیس نے کہا تھا کہ آگ لگنے کے واقعے پر انسداد دہشتگردی کمانڈ کی سربراہی میں تحقیقات شروع کی گئی ہیں تاہم اب تک کوئی ایسے شواہد نہیں ملے جن سے آگ لگنے کو دہشتگردی سے جوڑا جا سکے۔
اس واقعے کے سبب تقریباً دو لاکھ مسافر متاثر ہوئے کیونکہ جمعے کے روزہیتھرو ایئرپورٹ سے پروازوں کی آمدورفت معطل رہی اور جہازوں کو یورپ کے دیگر ہوائی اڈوں کی طرف موڑ دیا گیا۔
ایئرپورٹ کے چیف ایگزیکٹیو تھامس وولڈبائی نے متاثرہ مسافروں سے معذرت کی۔ انھوں نے اپڈیٹ دیتے ہوئے کہا کہ ایک بیک اپ ٹرانسفارمر فیل ہو گیا تھا جس کی وجہ سے حفاظتی اقدامات کے تحت سسٹم کو بند کرنا پڑا تاکہ ہوائی اڈے کو بجلی فراہم کرنے کے لیے باقی دو سب سٹیشنوں سے بجلی کی سپلائی کو دوبارہ ترتیب دیا جا سکے۔
دوسری جانب لندن فائر بریگیڈ کا کہنا ہے کہ ہیز میں لگنے والی آگ بجھا دی گئی تاہم آتشزدگی کی وجہ تاحال واضح نہیں ہو سکی۔
سوشل میڈیا پلیٹ فارم ایکس پر نیشنل گرڈ کا کہنا ہے کہ ان کی جانب سے 62 ہزار صارفین کی بجلی بحال کر دی گئیاور اب صرف چار ہزار 900 گھر بجلی سے محروم ہیں۔
برطانیہ کے وزیرِ توانائی ایڈ ملیبینڈ نے بی بی سی ریڈیو فور کو بتایا کہ مغربی لندن میں آتشزدگی ایک بڑا واقعہ تھا جس کے سبب ’نہ صرف سب سٹیشن خراب ہوا بلکہ بیک اپ جنریٹر بھی خراب ہو گیا۔‘
فلائیٹ ٹریڈر 24 ویب سائٹ کے مطابق ایئرپورٹ بند ہونے کی وجہ سے 1300 سے زیادہ پروازیں متاثر ہوئی ہیں۔
یہاں یہ سوال اُٹھتا ہے کہ برطانیہ کے مصروف ترین ایئرپورٹ پر بجلی کی معطلی کی صورت میں کوئی بیک اپ نظام کیوں موجود نہیں؟
اس بندش سے ہونے والے نقصان کے بعد سنیچر کو ہیتھرو ایئرپورٹ پر مکمل سروس متوقع ہےبی بی سی سمجھتا ہے کہ ایئرپورٹ کا نظام چلانے کے لیے وہاں بیک اپ سسٹم موجود ہے لیکن بجلی کے اس متبادل نظام کو سٹارٹ ہونے میں کچھ وقت لگتا ہے۔
ایک ذریعے نے بی بی سی کو بتایا کہ بجلی منقطع ہونے کی صورت میں ایئرپورٹ کا بیک اپ سسٹم فوری طوری پر سٹارٹ کرنا ممکن نہیں ہوتا۔
جب ایئرپورٹ کی بجلی بحال ہو جاتی ہے تو وہاں نصب متعدد سسٹمز ری بوٹ ہوتے ہیں اور انھیں چیک کیا جاتا ہے کہ وہ معمول کے مطابق کام کر رہے ہیں یا نہیں۔
حکام کا کہنا ہے کہ ایئرپورٹ جمعے کو بند رہے گا لیکن اس کے اثرات آنے والے دنوں میں سامنے آتے رہیں گے۔
ٹریول جرنلسٹ سائمن کالڈر کہتے ہیں کہ سنہ 2010 کے بعد پہلی مرتبہ ایسا ہوا کہ ہیتھرو ایئر پورٹ بند ہوا ہو۔
ان کا کہنا تھا کہ ’ہم نے 15 برس قبل آخری مرتبہ ہیتھرو ایئرپورٹ کے اوپر آسمان کو خالی دیکھا تھا۔‘
مسافروں کو درپیش مشکلات
ایئرپورٹ بند ہونے کے سبب لندن آنے والے ہزاروں مسافر بھی دیگر ممالک میں پھنس گئے۔
بی بی سی کے صحافی تھامس میک انٹاش سکاٹ لینڈ اور یونان کے درمیان فُٹبال میچ دیکھنے ایتھنز گئے تھے اور ان کی پرواز کو جمعے کی صبح ہیتھرو ایئرپورٹ پر اُترنا تھا۔
تھامس اور دیگر افراد سکیورٹی کاؤنٹر پر چیکنگ کے بعد ناشتہ کر رہے تھے کہ وہاں موجود ایک افسر نے آواز لگائی کہ ’ہیتھرو ایئرپورٹ جانے والی تمام پروازیں منسوخ ہو گئی ہیں۔‘
ایلکس منی کو بھی آج لندن آنا تھا لیکن ہیتھرو ایئرپورٹ کی بندش کے سبب ان کی پرواز کا رُخ کیپ ٹاؤن سے بارسلونا موڑ دیا گیا۔
سوشل میڈیا پر گردش کرنے والی ویڈیو میں سب سٹیشن سے آگ کے شعلے اُٹھتے ہوئے دیکھے جا سکتے ہیںانھوں نے بی بی سی کو بتایا کہ ’آج میری سالگرہ ہے اور میں نے نہیں سوچا تھا کہ یہ ایسے گزرے گی۔‘
ٹوری ڈنزیلو کو اپنے والد کی آخری رسومات کی ادائیگی کے لیے لندن پہنچنا تھا لیکن اچانک دورانِ پرواز ان کے جہاز نے ’یوٹرن‘ لیا اور انھیں عملے نے بتایا کہ ہیتھرو ایئرپورٹ بند ہونے کے سبب ان کا جہاز کینیڈا میں اُتر رہا ہے۔
انابیل کِف کو اپنا جنم دن نیویارک میں منانا تھا لیکن ہیتھرو ایئرپورٹ بند ہونے کے سبب وہ اب لندن میں ہی ہیں۔
انھوں نے بی بی سی کو بتایا کہ وہ اور ان کے پارٹنر میکس کو برطانوی وقت کے مطابق صبح چار بجے ایئر پورٹ جانا تھا لیکن اب انھوں نے برائٹن میں واقع اپنے گھر میں ہی رہنے کا فیصلہ کیا۔
’ہماری چھٹیاں منسوخ ہو گئیں۔ میں بہت بُرا محسوس کر رہی ہوں۔‘
