ٹوبہ ٹیک سنگھ میں غیرت کے نام پر اپنی ہی بیٹی کو بے دردی سے قتل کرنے والے باپ اور بھائی کو عدالت نے عبرتناک انجام تک پہنچانے کا فیصلہ سنادیا۔ ڈسٹرکٹ اینڈ سیشن کورٹ نے 22 سالہ ماریہ کے اندوہناک قتل میں ملوث والد اور بھائی کو سزائے موت دینے کے ساتھ ساتھ 10،10 لاکھ روپے جرمانہ بھی عائد کردیا۔
مقتولہ کا دوسرا بھائی اور بھابھی بری
دل دہلا دینے والے اس کیس میں مقتولہ کے ایک اور بھائی، جس نے سفاکانہ قتل کی ویڈیو بنائی تھی، اور قتل کے وقت کمرے میں موجود بھابھی کو عدالت نے عدم ثبوت کی بنیاد پر بری کردیا۔
قتل کیسے ہوا؟ لرزہ خیز تفصیلات سامنے آگئیں
یہ خونی واقعہ 17 اور 18 مارچ 2024 کی درمیانی شب پیش آیا تھا، جب 22 سالہ ماریہ کو مبینہ طور پر غیرت کے نام پر اس کے اپنے ہی بھائی جا لے لی۔ اس خوفناک لمحے کو دوسرے بھائی نے موبائل فون میں قید کر لیا، جبکہ بھابھی نے دعویٰ کیا کہ اسے اور اس کے کمسن بچوں کو جان سے مارنے کی دھمکیاں دی گئی تھیں۔
ویڈیو لیک ہونے کے بعد کیس نے نیا رخ اختیار کرلیا
ماریہ کے سفاکانہ قتل کے بعد خاموشی سے اس کی تدفین کردی گئی، مگر جب لرزہ خیز ویڈیو سوشل میڈیا پر وائرل ہوئی تو پولیس نے فوری کارروائی کرتے ہوئے ملزمان کو گرفتار کر لیا۔