"یہ منافقت کی انتہا ہے! ساحر حسن اپنے اعترافی بیان میں کہتا ہے کہ وہ نہیں چاہتا کہ اس کے اپنے بچے منشیات استعمال کریں، مگر دوسروں کے بچوں کو یہ زہر بیچنے میں اسے کوئی شرم محسوس نہیں ہوتی؟ یہ لوگ ایک طے شدہ حکمت عملی کے تحت کام کرتے ہیں۔ پہلے مفت میں نشہ فراہم کرتے ہیں، اور جب ایک شخص عادی ہو جاتا ہے، تب اسے باقاعدہ خریدار بنا کر اس کی زندگی تباہ کر دیتے ہیں۔ یہ کاروبار نہیں، بلکہ نسلوں کو برباد کرنے کی سازش ہے!"
اداکارہ اور میزبان نادیہ خان نے اپنے شو میں کراچی کے بدنام زمانہ مصطفیٰ عامر قتل کیس پر کھل کر بات کی، جہاں تحقیقات کے دوران منشیات فروشوں کا ایک پورا نیٹ ورک بے نقاب ہو چکا ہے۔ انکشافات کا سلسلہ ابھی جاری تھا کہ اچانک ایک اور حیران کن موڑ آیا—مشہور اداکار ساجد حسن کے بیٹے ساحر حسن کے اس گھناؤنے کاروبار میں ملوث ہونے کی خبر نے سب کو ہلا کر رکھ دیا۔
نادیہ خان نے سخت الفاظ میں ساحر حسن پر تنقید کرتے ہوئے کہا کہ یہ کیس نہ صرف ایک قتل کا معاملہ ہے بلکہ اس کے پیچھے چھپی منشیات مافیا کی پوری کہانی کو بے نقاب کر رہا ہے۔ انہوں نے ساحر حسن کے اس اعترافی بیان پر بھی کڑی تنقید کی، جس میں اس نے اقرار کیا کہ وہ چرس اور آئس فروخت کرتا تھا اور اس کے گھر میں لاکھوں روپے مالیت کی منشیات موجود تھی۔
انہوں نے مزید کہا کہ یہ صرف ایک شخص کا جرم نہیں بلکہ ایک پورا نیٹ ورک ہے جو نوجوان نسل کو منشیات کے دلدل میں دھکیل رہا ہے۔ نادیہ خان نے والدین کو بھی خبردار کیا کہ وہ اپنی اولاد پر نظر رکھیں اور انہیں ان عناصر کے چنگل میں پھنسنے سے بچائیں۔