پاکستان شوبز انڈسٹری کے معروف اداکار احد رضا میر نے محبت کے بارے میں اپنے خیالات کا اظہار کرتے ہوئے کہا ہے کہ محبت میں عمر کا فرق اہمیت نہیں رکھتا۔
احد رضا میر نے حال ہی میں ایک ویب شو کو انٹرویو دیا جہاں ان سے یہ سوال پوچھا گیا کہ آپ کے خیال میں محبت میں عمر کے فرق کی اہمیت ہے؟ اُنہوں نے اس سوال کا جواب دیتے ہوئے کہا کہ نہیں، میرے خیال میں محبت میں عمر کا فرق اہمیت نہیں رکھتا، عمر صرف ایک نمبر ہے۔ اداکار نے مزید کہا کہ ایسے کوئی سخت قوانین موجود نہیں ہیں کہ محبت کرنے کے لیے کسی کی کتنی عمر ہونی چاہیے یا پھر کسی کو کتنا جوان ہونا چاہیے۔
اُنہوں نے کہا کہ جب دو لوگ ایک دوسرے کے قریب آتے ہیں، ایک دوسرے کو سمجھتے ہیں اور دونوں کے درمیان محبت ہوتی ہے تو اس سے کوئی فرق نہیں پڑتا کہ دونوں کی عمروں میں کتنا فرق ہے۔ احد رضا میر نے کہا کہ ہم نے بہت سارے ایسے شادی شدہ جوڑے دیکھے ہیں جن کی عمروں میں 6، 8، 10 یا 15 سال کا فرق ہے۔
اُنہوں نے یہ بھی کہا کہ جب دو لوگ ایک دوسرے کو سمجھتے ہوں اور ایک دوسرے سے محبت کرتے ہوں تو پھر دونوں کے درمیان عمر کے فرق کی اہمیت ہونی بھی نہیں چاہیے۔