امریکی ریاست نیویارک میں چھ افراد کو لے جانے والا ایک چھوٹا جہاز گر کر تباہ ہو گیا ہے اور مقامی میڈیا کے مطابق تمام افراد ہلاک ہو گئے ہیں۔فرانسیسی نیوز ایجنسی اے ایف پی کے مطابق نیشنل ٹرانسپورٹ سیفٹی بورڈ کے ایک افسر ٹوڈ انمین نے ہلاکتوں کی تعداد بتائے بغیر کہا کہ ادارہ واقعے کی تحقیقات کر رہا ہے۔مٹسوبشی ایم یو ٹو بی 40 جہاز اتوار کو کولمبیا کاؤنٹی سے 16 کلومیٹر دور ایک کھیت میں گر کر تباہ ہوا۔نیویارک ٹائمز کے مطابق جہازمیں سوار تمام چھ افراد ہلاک ہو گئے ہیں۔ مرنے والوں میں پائلٹ اور نیورو سرجن مائیکل گروف، ان کی اہلیہ اور بچے شامل ہیں۔ٹوڈ انمین نے کہا کہ کریش سے قبل ویزیبیلیٹی کم تھی، لیکن پائلٹ ماہر تھا اور کاک پٹ کو حال ہی میں اپ ڈیٹ کیا گیا تھا۔اس حادثے سے ایک ہفتہ قبل ہڈسن دریا میں ایک ہیلی کاپٹر گر کر تباہ ہو گیا تھا جس میں چھ افراد مارے گئے تھے۔جنوری میں واشنگٹن میں ایک جنگی اور مسافر طیارے میں ٹکراؤ سے 67 افراد مارے گئے تھے۔ جمعے کو فلوریڈا میں تکنیکی خرابی کے باعث ایک چھوڑا جہاز تباہ ہوا تھا جس میں سوار تین افراد ہلاک ہوئے تھے۔