اسلام آباد پولیس کے 15 اہلکاروں کو اختیارات سے تجاوز اور جرائم پیشہ عناصر کے خلاف موثر کارروائی نہ کرنے پر ملازمت سے برطرف کر دیا گیا ہے۔ پاکستان کے سرکاری خبر رساں ادارے اے پی پی کے مطابق اسلام آباد پولیس کے ایک عہدیدار نے کہا ہے کہ سپرنٹنڈنٹ آف پولیس (ایس پی) کی نگرانی میں محکمانہ انکوائری کی گئی تھی۔’پانچ ہیڈ کانسٹیبلز اور سات کانسٹیبلز سمیت 15 اہلکاروں کو فرائض میں غفلت اور اختیارات کے ناجائز استعمال پر ملازمت سے برطرف کر دیا گیا ہے۔‘اسلام آباد پولیس کے عہدیدار کے مطابق اہلکاروں کو اپنے اختیارات سے تجاوز، عوام کی خدمت میں ناکامی اور جرائم پیشہ عناصر کے خلاف موثر کارروائی نہ کرنے پر سزا دی گئی۔انہوں نے کہا کہ ’جو لوگ عوامی خدمت کے اصولوں کو برقرار رکھنے میں ناکام رہتے ہیں، اپنے اختیارات کا غلط استعمال کرتے ہیں یا اپنے فرائض سے غفلت برتتے ہیں، تو ان کے لیے پولیس فورس میں کوئی جگہ نہیں ہے۔‘ان کا مزید کہنا تھا کہ ناقص کارکردگی، بدعنوانی، اختیارات کے ناجائز استعمال اور شہریوں کے جان و مال کے تحفظ میں ناکامی پر سخت محکمانہ سزائیں دی جائیں گی۔برطرف کیے گئے افسران میں سب انسپکٹر قاسم ضیاء، سب انسپکٹر طلعت محمود اور اسسٹنٹ سب انسپکٹر ظہیر احمد شامل ہیں۔ہیڈ کانسٹیبل الماس حیدر، محمد اسحاق، وقاص ادریس، نوید بٹر اور ساجد محمود بھی برطرف ہونے والوں میں شامل ہیں۔
کانسٹیبل محمد ندیم، محمد عمران، ناظم عباس، زاہد خان، احسن فاروق، عمران احمد اور قاضی اظہر کو بھی انکوائری کے بعد ملازمت سے ہٹا دیا گیا ہے۔