اس اتحاد میں برطانیہ، عراق، ترکی، پاکستان اور ایران شامل تھے جس کا مقصد خطے کے دفاع کو مضبوط بنانا اور مشرق وسطیٰ میں سوویت یونین کے داخلے کو روکنا تھا۔
جب آپ بغداد، عراق کے دارالحکومت، کا نام سنتے ہیں تو ذہن میں ہارون الرشید اور عباسی خلافت کے دارالحکومت سے لے کر صدام حسین تک بہت سے خیالات آتے ہیں۔
تاہم شاید یہ بات آپ کے ذہن میں نہ آئے کہ یہ نام ایک زمانے میں، 1950 کی دہائی میں، مغربی مشرق وسطیٰ کے فوجی اتحاد کا حوالہ بھی ہوا کرتا تھا جس کے خاتمے نے مشرق وسطیٰ میں برطانوی اثر و رسوخ کے خاتمے کا بھی آغاز کیا۔
بغداد پیکٹ یا معاہدہ 1955 میں ہوا تھا جس میں برطانیہ، عراق، ترکی، پاکستان اور ایران شامل تھے۔
انسائیکلوپیڈیا برٹانیکا میں کہا گیا ہے کہ یہ ایک سکیورٹی تنظیم تھی جس کا صدر دفتر عراقی دارالحکومت بغداد میں تھا۔ بغداد میں سوویت مخالف بادشاہت کے خاتمے کے بعد عراق نے اس معاہدے سے دستبرداری اختیار کر لی تھی اور پھر تنظیم کا صدر دفتر ترکی کے دارالحکومت انقرہ منتقل کر دیا گیا۔ اس کا نام بھی بدل کر سنٹرل ٹریٹی آرگنائزیشن یعنی سیٹو رکھ دیا گیا۔ 1979 میں ایران بھی اسلامی انقلاب اور شاہ کے زوال کے بعد پیچھے ہٹ گیا اور اسی سال یہ تنظیم تحلیل ہو گئی۔
تو اس معاہدے کی کہانی کیا ہے؟
’کمیونسٹ لہر کا مقابلہ‘
دوسری جنگ عظیم کے بعد دو بڑی عالمی طاقتیں ابھریں: امریکہ اور سوویت یونین۔ ان کے درمیان تنازع نے سرد جنگ کا فریم ورک تشکیل دیا، کیونکہ دونوں طاقتوں نے دنیا بھر میں اپنے سیاسی اور فوجی اثر و رسوخ کو بڑھانے کی کوشش کی۔
امریکہ اور برطانیہ دونوں مشرق وسطیٰ کو اپنے مفادات کے لیے اہم سمجھتے تھے۔ تاہم دوسری عالمی جنگ کے بعد برطانیہ کا اثرورسوخ زوال پذیر ہو رہا تھا۔
1950 کی دہائی کے اوائل میں، ریاست ہائے متحدہ کی حکومت نے تیل پیدا کرنے والے اہم خطوں میں سوویت کمیونسٹ توسیع کے خطرے کا مقابلہ کرنے کے لیے مشرق وسطیٰ میں ایک فوجی اتحاد بنانے میں دلچسپی ظاہر کی اور واشنگٹن نے کمیونزم پر مشتمل علاقائی اتحاد بنانے کی کوشش کی۔
بغداد معاہدہ اسی حکمت عملی کا حصہ تھا جس کا مقصد اتحادی ریاستوں کی ایک دیوار کو ترکی سے پاکستان تک پھیلانا تھا۔
ایران میں فوجی مشقوں کے دوران شاہ ایران ایک فوجی جیپ میں، عراق کے شاہ فیصل دوم ان کے ساتھ ہیںبغداد معاہدہ نیٹو اور جنوب مشرقی ایشیا معاہدہ تنظیم کے طور پر ایک ہی وقت میں تشکیل دیا گیا تھا۔ تینوں اتحاد کا خیال امریکی وزیر خارجہ جان فوسٹر ڈولز کے مئی 1953 میں مشرق وسطیٰ کے دورے سے واشنگٹن واپس آنے کے بعد سامنے آیا جب انھوں نے کمیونزم کے خلاف یوریشیا میں پھیلے ہوئے ممالک کی دفاعی تشکیل کی تجویز پیش کی۔
مشرق وسطیٰ کی اہمیت کئی مختلف عوامل میں مضمر ہے:
سب سے پہلے، مشرق وسطیٰ کے بہت سے ممالک میں تیل کی موجودگی کا مطلب یہ تھا کہ مغربی یورپ کی معیشتیں، اور کچھ حد تک امریکی معیشت، توانائی کے ذرائع کے طور پر اس خطے پر منحصر تھی، اور برطانیہ نے اپنی تیل کی سپلائی کا تقریباً 90 فیصد خلیج سے حاصل کیا۔
دوم، مشرق وسطیٰ مشرق بعید تک جانے والے متعدد ٹرانزٹ راستوں کے اندر واقع ہے، اور مصر، عراق اور اردن سے گزرنے والے آبی اور فضائی راستوں نے برطانیہ کو مشرق بعید کے ساتھ مواصلات اور تجارت کے لیے خطے کے ممالک کے ساتھ اچھے تعلقات پر بہت زیادہ انحصار کیا تھا۔
تیسرا، یہ خطہ سٹریٹجک اہمیت کا حامل ہے۔ ایک طرف، یہ نیٹو کے جنوبی حصے سے متصل ہے، اور دوسری طرف، یہ اڈے فراہم کر سکتا ہے جہاں سے سوویت یونین پر جنوب سے حملہ کیا جا سکتا ہے۔ برطانیہ کے عراق اور قبرص کے جزیرے میں اڈے تھے۔
بغداد معاہدہ عراق کے آخری بادشاہ فیصل دوم کے دور میں وجود میں آیا1950 کی دہائی میں مشرق وسطیٰ میں جاری کشیدگی، جیسا کہ عرب اسرائیل تنازع اور مصر کی قیادت میں بڑھتی ہوئی نوآبادیاتی مخالفت نے ایک ایسا اتحاد بنانا مشکل بنا دیا جس میں عرب اور اسلامی ریاستوں کے ساتھ اسرائیل اور مغربی طاقتیں شامل ہوں۔
اس کے بجائے امریکہ نے اپنی توجہ شمالی پٹی کی طرف منتقل کر دی۔ خیال یہ تھا کہ نیٹو کے سب سے جنوبی رکن ترکی کو جنوب مشرقی ایشیائی اتحاد، سینٹو، کے مغربی رکن، پاکستان کے ساتھ جوڑنے والا اتحاد قائم کیا جائے۔
ترکی اور پاکستان نے 1954 میں خطے میں سلامتی اور استحکام کو بڑھانے کے لیے ایک معاہدے پر دستخط کیے تھے۔
برطانیہ اور امریکہ کے کہنے پر بغداد معاہدے کی تشکیل 24 فروری 1955 کو شروع ہوئی جب عراق اور ترکی نے بیرونی جارحیت کے خلاف مزاحمت کے لیے بغداد میں ’باہمی تعاون کے معاہدے‘ پر دستخط کیے، جس سے خطے کے دیگر ممالک کے لیے راستے کھل گئے۔
اپریل میں، برطانیہ نے شمولیت اختیار کی، اس کے بعد یکم ستمبر کو پاکستان، اور پھر ایران، شاہ محمد رضا پہلوی کی قیادت میں، نومبر 1955 میں شامل ہو گیا۔
اس طرح ’بغداد معاہدہ‘ قائم ہوا جس میں برطانیہ، عراق، ترکی، پاکستان اور ایران شامل تھے۔ یہ عراق کے آخری بادشاہ فیصل دوم اور وزیر اعظم نوری السید کے دور میں ہوا تھا۔ اس معاہدے کا مقصد خطے کے دفاع کو مضبوط بنانا اور مشرق وسطیٰ میں سوویت یونین کے داخلے کو روکنا تھا۔
عراقی وزیر اعظم نوری السید نے مصر اور شام کو بغداد معاہدے میں شامل ہونے پر آمادہ کرنے کی ناکام کوشش کیامریکی پوزیشن
برطانیہ تیسرا ملک تھا جس نے بغداد معاہدے میں شمولیت اختیار کی۔ اس کے برعکس، امریکہ اس معاہدے میں مکمل طور پر شامل نہیں ہوا۔
1955 میں برطانیہ کے شامل ہونے کے بعد توقع کی جا رہی تھی کہ امریکہ بھی اس اتحاد میں شامل ہو جائے گا۔ جون 1955 میں برطانوی وزارت دفاع اور وزارت خارجہ کے مشترکہ مطالعے نے اس نظریے کی تائید کی کہ خطے کا دفاع صرف امریکی مدد سے ہی محفوظ ہو سکتا ہے۔
برطانیہ اور دیگر رکن ممالک نے اپنے آغاز سے ہی بغداد معاہدے میں امریکہ کی شمولیت کے لیے لابنگ کی تھی جو ناکام رہی۔
برطانیہ نے تنظیم میں شمولیت کے لیے اپنے سب سے طاقتور اتحادی پر دباؤ ڈالنا جاری رکھا۔ یہ دباؤ اس وقت شدت اختیار کر گیا جب مارچ 1956 میں برطانوی افسر جنرل گلوب کو اردنی عرب لشکر کی کمان سے برطرف کرنے پر اتحاد کو بحران کا سامنا کرنا پڑا۔
تاہم، امریکہ نے مبصر کی حیثیت کو ترجیح دیتے ہوئے اتحاد میں شامل ہونے سے مکمل انکار کر دیا جس کی ایک وجہشاید یہ تھی کہ واشنگٹن اسرائیل، مصر یا سعودی عرب کو بھی مطمئن رکھنا چاہتا تھا۔
اتحاد کو کمزور کرنے والے عوامل
شروع سے ہی، بغداد معاہدہ مشرق وسطیٰ کی ریاستوں سے وسیع حمایت حاصل کرنے میں ناکام رہا، جن میں مشترکہ شناخت کی کمی تھی۔ ترکی کی قوم پرست جمہوریہ، ایران کی بادشاہت، پاکستان کی ابھرتی ہوئی جمہوری ریاست، اور عراق جو حال ہی میں نوآبادیاتی نظام حکومت سے نکلا تھا۔
اس وقت کے عراقی وزیر اعظم نوری السعید کی کئی عرب ممالک، خاص طور پر مصر اور شام کو اتحاد میں شامل ہونے پر آمادہ کرنے کی کوششیں ناکام ہو گئیں۔ ان ممالک کو یقین تھا کہ سوویت یونین - جو اسرائیل کا سامنا کرنے والے عرب ممالک کو ہتھیار اور ساز و سامان کا واحد فراہم کنندہ بننا شروع ہو گیا تھا، ان کے لیے کوئی خطرہ نہیں تھا۔
امریکی وزیر خارجہ جان فوسٹر نے کمیونزم پر قابو پانے کے لیے دفاعی اتحاد کی تجویز پیش کی تھیتاہم، برطانیہ نے امید ظاہر کی کہ شام اور اردن بعد کے مرحلے میں اس اتحاد میں شامل ہو جائیں گے۔ شام نے اس میں شامل ہونے سے انکار کر دیا جبکہ اردن کے شاہ حسین نے ابتدائی طور پر ہچکچاہٹ کا اظہار کیا۔
بالآخر، شاہ حسین نے اپنے لوگوں سے اتفاق کیا، جو اس اتحاد کی مذمت کرنے اور اس میں شامل ہونے سے انکار کرنے کے لیے بڑی تعداد میں سڑکوں پر نکل آئے۔
2003 میں، بی بی سی کے مشرق وسطیٰ کے تجزیہ کار جیرالڈ بوٹ نے لکھا: ’اس وقت، میں نے مظاہرین کو برطانوی بینک کی کھڑکیوں کو توڑتے ہوئے دیکھا جہاں میرے والد اردن کے دارالحکومت عمان میں کام کرتے تھے، اور بچپن میں مظاہرین کو ہمارے باغ میں توڑ پھوڑ کرتے ہوئے دیکھ کر میں پریشان ہو گیا۔‘
لبنان کے صدر نے بغداد معاہدے کی حمایت کی، کیونکہ ان کے عراق کے شاہ فیصل اور ایران کے شاہ محمد رضا پہلوی کے ساتھ اچھے تعلقات تھے، لیکن ملک کے اندر وسیع پیمانے پر مخالفت کی وجہ سے وہ اس معاہدے میں شامل نہیں ہوئے۔
ادھر مصر نے کسی بھی ایسے اتحاد کی مخالفت کی جو ’یورپی سامراجیت‘ کی نئی توسیع ہو سکتی ہے اور سعودیوں نے عراق کے ہاشمی حکمرانوں پر عدم اعتماد کیا۔
مصری رہنما جمال عبدالناصر اور اردن کے شاہ حسین 1955 میں مصر کے بعد کے دورے کے دوراناتحاد کے قیام کے بعد کے سالوں میں مشرق وسطیٰ میں ہونے والی پیش رفت نے اسے اور کمزور کر دیا۔
1956 میں مصری رہنما جمال عبدالناصر نے نہر سویز کو قبضے میں لے لیا۔ اسرائیل نے جزیرہ نما سینائی پر حملہ کرکے جواب دیا، اور برطانوی اور فرانسیسی افواج نے بھی مداخلت کی جس کے نتیجے میں برطانیہ خطے میں اپنا وقار کھو بیٹھا اور بغداد معاہدے میں اس کی پوزیشن کو نقصان پہنچا۔
1957 کے اوائل میں، ’آئزن ہاور نظریے‘ کا اعلان کیا گیا، جب امریکی صدر نے مشرق وسطیٰ کی صورت حال کے بارے میں کانگریس کو خصوصی پیغام دیا تھا۔ آئزن ہاور کے مطابق، کوئی بھی ملک امریکہ سے اقتصادی یا فوجی مدد کی درخواست کر سکتا ہے اگر اسے خطرہ لاحق ہو، یعنی سوویت خطرہ۔ اس طرح مشرق وسطیٰ میں امریکی فوجی امداد کی درخواستوں کا نیٹو کی رکنیت سے کوئی تعلق نہیں رہا۔
خطے میں واقعات کی رفتار 1958 میں تیز ہوئی، جس نے بغداد معاہدے کو مزید کمزور کر دیا۔
فروری 1958 میں مصر اور شام نے متحدہ عرب جمہوریہ کے قیام کا اعلان کیا۔ پھر 14 جولائی 1958 کو عراق میں بادشاہت کو ایک پرتشدد اور خونریز فوجی بغاوت کے ذریعے ختم کر دیا گیا۔ بغداد معاہدہ اس بغاوت کے اسباب میں سے ایک تھا۔
اس کی وجہ سے خطے میں کشیدگی میں اضافہ ہوا، جس سے امریکہ اپنے اتحادیوں کے اثر و رسوخ کو بڑھانے کے لیے اردن میں فوج بھیجنے پر مجبور ہوا۔
آئزن ہاور کے نظریے کو مدنظر رکھتے ہوئے، لبنانی صدر نے امریکہ سے کہا کہ وہ مداخلت کرے اور ناصر اور شام پر لبنان میں حزب اختلاف کو مسلح کرنے اور ان کی حمایت کرنے کا الزام لگایا۔
15 جولائی 1958 کو امریکی میرینز لبنانی دارالحکومت بیروت پہنچے۔ امریکہ نے کہا کہ اس مداخلت کا مقصد لبنان میں خونریزی کو روکنا ہے۔
لبنان میں اپوزیشن کے حامی سڑکوں پر نکل آئے، اور صدر کے استعفے کا مطالبہ کرنے والے احتجاج شروع ہو گئے۔ بعد ازاں اپوزیشن اور حکومتی حامیوں کے درمیان رکاوٹیں کھڑی کر دی گئیں اور جھڑپوں کا دائرہ وسیع ہو گیا۔
اس وقت کے آرمی کمانڈر نے فوجی اسٹیبلشمنٹ کے اندر فرقہ وارانہ تقسیم کی حساسیت کی وجہ سے مسلح افواج کو کسی بھی فریق کی حمایت کرنے کی اجازت دینے سے انکار کر دیا۔
امریکہ نے ایک ایلچی رابرٹ مرفی کو اس بحران کا پرامن حل تلاش کرنے کے مقصد سے بھیجا۔ صدر کی میعاد میں توسیع نہ ہونے اور ان کے دوسری مدت کے لیے انتخاب میں حصہ نہ لینے پر بحران کا خاتمہ ہوا۔ آرمی کمانڈر کو ان کا جانشین منتخب کیا گیا۔
لبنان میں یہ تمام پیش رفت بغداد معاہدے سے باہر ہوئی۔
24 مارچ 1959 کو عراق کے نئے رہنما عبدالکریم قاسم نے اس اتحاد سے عراق کی دستبرداری کا اعلان کیا جس کا ابھی چوتھا سال بھی مکمل نہیں ہوا تھا۔ اس کا نام بدل کر سیٹو رکھ دیا گیا اور اس کے دفاتر ترکی منتقل کر دیے گئے۔
عبدالکریم قاسم نے بغداد معاہدے سے عراق کی دستبرداری کا اعلان کیدرحقیقت، اس اتحاد نے اپنے ارکان کے اجتماعی دفاع کو یقینی بنانے کا کوئی ذریعہ فراہم نہیں کیا، نہ ہی اس نے مستقل فوجی کمانڈ ڈھانچہ یا مشترکہ مسلح افواج قائم کیں۔
آئزن ہاور انتظامیہ کے اختتام تک، یہ واضح ہو گیا تھا کہ یہ فوجی اتحاد کے مقابلے میں سیاسی ہم آہنگی اور اقتصادی تعاون کا ایک بہتر ذریعہ ہے۔
1965 میں پاکستان نے انڈیا کے خلاف جنگ میں اپنے اتحادیوں کی مدد لینے کی کوشش کی لیکن جب اقوام متحدہ کی سلامتی کونسل نے 20 ستمبر کو قرارداد 211 منظور کر کے دونوں متحارب فریقوں کو ہتھیاروں کی فراہمی بند کر دی تو امریکہ اور برطانیہ نے قرارداد کی حمایت کی۔
1971 میں انڈیا کے ساتھ ایک نئی جنگ شروع ہونے کے بعد، پاکستان نے اتحاد سے مدد حاصل کرنے کی ایک بار پھر ناکام کوشش کی، لیکن اسے صرف محدود امریکی فوجی مدد ملی، جو کہ سینٹوکے دائرہ کار میں نہیں تھی۔
1974 میں، برطانیہ نے قبرص پر ترکی کے حملے کے خلاف احتجاجاً اس اتحاد سے علیحدگی اختیار کر لی اور اس کی حمایت ختم کر دی، جس کے نتیجے میں جزیرے کے شمال پر ترکی کا قبضہ ہو گیا۔
1979 میں ایرانی انقلاب نے شاہ کا تختہ الٹ دیا اور ایران اتحاد سے نکل گیا۔ پاکستان نے بھی اسی سال یہ فیصلہ لیا کہ تنظیم نے اس کی سکیورٹی بڑھانے میں کوئی کردار ادا نہیں کیا، اور اسی سال تنظیم کو باضابطہ طور پر تحلیل کر دیا گیا۔
