وزیراعظم شہبازشریف اور ایرانی صدر کے درمیان ٹیلی فونک رابطہ ہوا جس میں امریکی حملوں اور اسرائیل کی بلااشتعال اور بلاجواز جارحیت کی شدید مذمت کی گئی ۔
وزیراعظم نے قیمتی جانوں کے ضیا ع پر تعزیت کااظہار کیا اور زخمیوں کی جلد صحت یابی کی دعا کی ، شہبازشریف نے ایران کے برادر عوام اور حکومت کےساتھ غیر متزلزل یکجہتی کااعادہ کیا۔
وزیراعظم نے امن کیلئے فوری طور پر مذاکرات اور سفارت کاری کی ضرورت پر زور دیتے ہوئے کہا کہ مذاکرات ہی آگے بڑھنے کا واحد قابل عمل راستہ ہے،کشیدگی کو کم کرنے کیلئے فوری اجتماعی کوششیں کی جائیں۔
ایرانی صدر مسعود پزشکیان نے کہا ہے کہ امریکا نے اسرائیل کی بے بسی دیکھ کر خود میدان میں قدم رکھ دیا ہے۔ وزیرِ اعظم پاکستان شہباز شریف سے ٹیلی فون پر گفتگو میں ایرانی صدر نے کہا کہ امریکی حملہ واضح ثبوت ہے کہاسرائیلی حملوں کے پیچھے اصل محرک امریکا ہے۔انہوں نے مزید کہا کہ ایران سے مقابلے میں اسرائیلی بے بسی دیکھ کر امریکا نے خود میدان میں قدم رکھ دیا ہے۔مسعود پزشکیان نے یہ بھی کہا کہ ایرانی قوم بارہا ثابت کرچکی کہ وہ اپنی سر زمین کے تحفظ کے لیے کسی بھی قربانی سےدریغ نہیں کریں گے۔