Kisi Buzurg Ka Waqea Hey Keh
Log Inki Khanqah Mein Apni Aaqebat Ko Behter Bananey Aur Allah Allah Kerney Key
Liye Aatey They. Ek Din Ek Sahib Khanqah Mein Dakhil Huwey, Sheikh Key Haath Per
Bait Ki Takeh Apney Qalb Ki Islah Ker Sakein. Shaikh Key Haan Tareeqa Yeh Tha
Keh Aam Murideen Ka Khana Unkey Ghar Pakta Tha Aur Ek Bandi Mu Qarrar Thi Jo
Khana Tayyar Honey Key Baad Hujra Der Hujra Mureedein Key Paas Pohnchati Thi.
Hasb-E-Mamool Jab Bandi Khana Taqseem Kerney Key Liye Aaii Aur Naey Mureed Ki
Nazer Iss Khoobsurat Bandi Per Pari Tau Yeh Uskey Husn-O-Jamal Ko Dekh Ker Us
Per Farefta Ho Gaey. Ab Inn Sahib Ka Mamool Ban Gaya Keh Jab Bhi Wo Bandi Khana
Deney Aati Tau Yeh Usko Ghoortey Rehtey, Inki Iss Harkat Ki Ittela'a Sheikh Ko
Bhi Hogai Keh Khanqah Mein Anewaley Naey Sahib Jis Maqsad Ko Leker Aaeey They
Usko Tau Bhool Gaey Aur Bandi Key Ishq Mein Mubtila Hogaey, Chunacha Sheikh Ney
Unkey Merz Ka Ilaaj Kerney Ka Faisla Kerlia Aur Aisi Tadbeer Ikhtiar Ki Keh Unka
Ishq Foran Kafoor Hogaya.
Shaikh Ney Bandi Key Liye Aisi Dawa Mangwai Keh Usko Dast Lag Gaey Aur Faraghat
Key Liye Usey Ek Silafchi (WC Numa Bartan) Dedia Keh Jab Bhi Dast Aaein Tau Isi
Silafchi Mein Kerna Chunacha Subh Sey Shaam Tak Wo Silafchi Bher Gai Udher Bandi
Ko Daston (Loose Motions) Ki Wajah Sey Kamzori Lahaq Hogaii Aur Uska Sara
Rang-O-Roop Jata Raha Aur Wo Kafi Kamzoar Hogaii.
Ab Sheikh Ney Bandi Ko Un Sahib Key Paas Khana Deney Ko Bheja Aur Saath Yeh Bhi
Keh Dia Key Jo Bhi Mamla Paish Aaeey Tau Mujhey Uski Ittelaa Kerna. Jab Bandi
Khana Leker Gai Aur Us Mureed Ney Bandi Ki Shakal Dekhi Tau Ghorney Key Bajaey
Be-Tawajjahi Ka Muzahira Kia Jiski Ittelaa Bandi Ney Sheikh Ko Kerdi, Sheikh Ney
Fermaya Al-Hamdulillah; Ilaaj Ho Gaya.
Thori Deir Baad Shaikh Us Mureed Key Paas Tashreef Laey Aur Uski Ungli Paker Ker
Wahan Legaey Jahan Bandi Key Daston Wali Silafchi Rakhi Huwi Thi, Uski Taraf
Ishara Kerkey Sheikh Ney Kaha Keh Ghor Sey Daikh Yeh Hey Tera Mashooq, Isey Leja
Aur Apney Paas Hifaazat Sey Rakh Kiyoon Keh Tujhey Bandi Sey Ishq Nahi Tha
Balkeh Iss Sey Tha Jab Tak Yeh Najasat Iskey Pait Mein Rahi Too Iska Aashiq Raha
Aur Jab Yeh Najasat Iskey Pait Sey Nikal Gaei To Tu Ney Issey Nazrein Phair Lein
Yani Tujhey Iss Bandi Sey Nahi Balkeh Iss Najasat Sey Mohabbat Thi. Shaikh Ki
Batein Sunker Wo Bohot Sharminda Huwey Aur Aainda Key Liye Taubah Kerli Keh Ab
Kisi Per Gandi Nigaah Na Rakkheingey.
FAEDA:
Insaan Ko Jab Bhi Kisi Sey Mohabbat Hoti Hey Tau Char Bina Ki Wujooh Per Hoti
Hey; Maal, Jamaal, Itsaal Aur Kamaal, Yani Insaan Ya Tau Kisi Key Paas Maal O
Daulat Dekh Ker Ussey Muhabbat Kerta Hey Ya Kisi Key Husn-O-Jamaal Per Faraifta
Hoker Iskey Ishq-O-Mohabbat Mein Giriftaar Hojata Hey Ya Kisi Ta'alluq Ki Bina
Per Mohabbat Kerney Per Majboor Hota Hey Jaisey Baap Aur Baitey Ki Mohabbat,
Ustaad Aur Shagird Ki Mohabbat, Peer Aur Mureed Ki Mohabbat, Waghera, Ya Phir
Kisi Key Paas Koi Hunar Ya Kamal Dekh Ker Insaan Uski Mohabbat Mein Giriftar
Hota Hey; Tau Phir Kiyoon Na Aisey Shakhs Sey Mohabbat Ki Jaey Keh Jis Mein Yeh
Charon Khoobian Na Sirf Mojood Hon Balkeh Ba Derja-E-Atam Pai Jaein?
Hamarey Nabi Hazrat Muhammad Mustafa Sallallahu Alaihe Wasallam, Dunya Key Wo
Wahid Insaan Hein Keh Jinmein Yeh Charon Khoobian / Sifaat Ba
Derja-E-Kamal-O-Bulandi Pai Jati Hein, Chunacha Dunya Ki Jhooti Mohabbaton Ko
Chhor Ker Huzoor-E-Akram (S.A.W.) Sey Mohabbat Kerney Ka Azm Karein Takeh Dunya
Mein Bhi Kamiabi Hasil Ker Sakein Aur Aakhirat Ki Da'emi Kamiabian Bhi Apka
Muqaddar Banein.
Dunya Key Napaak Ishq Mein Mubtila Hoker Insaan Apni Na Sirf Dunyawi Zindagi Ko
Berbaad Kerta Hey Balkeh Apni Aakhirat Ki Hamesha Hamesha Rehney Wali Zindagi Ko
Bhi Kharaab Kerta Hey.
Aqalmand Wohi Hey Keh Jo Apni Dunya Bhi Banaley Aur Aakherat Bhi.
Allah Pak Ham Sab Musalmano Ko Iski Taufeeq Ata'a Fermaein, Aameen.