مغفرت کا عشرہ……!
(Rana Aijaz Hussain, Multan)
ماہ رمضان کے عشرہ رحمت کے اختتام کے
بعد ثانیہ ’’عشرہ مغفرت ‘‘ کا آغاز ہونے کو ہے جوکہ اپنے اندر پہلے عشرے سے
زیادہ اجر و ثواب سموئے ہوئے ہے۔ اس عشرے میں مسلمان روزہ داروں کی مغفرت
کی جاتی ہے۔ یہ وہ مبارک مہینہ ہے کہ جس میں نفل نماز کا ثواب فرض کے برابر
اور فرض کا ثواب ستر گنا تک بڑھا دیا جاتا ہے۔ نہ جانے آئندہ سال اس ماہ
مبارک کے ایام ہمیں نصیب ہوں یا نہیں،خوش قسمت ہیں وہ لوگ جو اس ماہ میں
زیادہ سے زیادہ نیکیاں سمیٹ کر اﷲ ربّ العزت کی رضا اور خوشنودی حاصل کرنے
میں کامیاب و کامران ہورہے ہیں۔ حضرت موسیٰ کلیم اﷲ ، اﷲ ربّ ذوالجلال سے
ہم کلام ہوتے ، زمان و مکان اورراز و نیاز کی باتیں ہوتیں ۔ ایک دن حضرت
موسیٰ علیہ السلام نے اپنے خالق سے سوال کیا کہ اس وقت کائنات میں ، میں
واحد بندہ ہوں جسے آپ سے بات کرنے کا شرف حاصل ہے۔ بتائیے یہ اعزاز کسی اور
کو بھی نصیب ہو گا۔ خالق کائنات نے ارشاد فرمایا، اے موسیٰ ! اس دنیا میں
ایک ایسی بھی امت آنے والی ہے جب میرے اور ان بندوں کے درمیان کوئی پردہ
حائل نہیں ہو گا۔ حضرت موسیٰ علیہ السلام حیران ہوئے ، باری تعالیٰ ! وہ
کیسے،اﷲ تعالیٰ نے فرمایا ! یاد رکھ موسیٰ ! تیرے اور میرے درمیان کلام اور
ملاقات کی صورت بے شمار پردے حائل ہیں جبکہ آمدہ امت کے ساتھ یہ معاملہ
ہرگز نہیں ہو گا۔ اس پر موسیٰ علیہ السلام کی حیرت میں مذیداضافہ ہو گیا،
انہوں نے عرض کیا ، کائنات کے مالک ! بتائیے وہ کون خوش نصیب ہوں گے۔ اﷲ
تعالیٰ نے ارشاد فرمایا وہ امت محمدی ہو گی، ان میں سے وہ لوگ جو ماہ رمضان
کے ایام پا کر صرف میری رضا و خوشنودی کیلئے روزے رکھیں گے اورپھر وقت
افطارنڈھال جسم ،خشک زبان اور منہ کی مہک کے ساتھ جو دعا مانگیں گے ، میں
قبول کروں گا کیونکہ اس لمحے ان کے اور میرے درمیان کوئی پردہ ، کوئی فاصلہ
نہ ہو گا‘‘۔ روزے دار کے متعلق اﷲ تعالیٰ کا ارشاد ہے کہ روزہ خاص میرے لئے
ہے ، اور میں ہی ( جس طرح چاہوں گا ) اس کا اجر و ثواب دوں گا۔ میرا بندہ
میری رضا کے واسطے اپنی خواہش نفس اور اپنا کھانا پینا چھوڑ دیتا ہے ( پس
میں خود ہی اپنی مرضی کے مطابق اس کی اس قربانی اور نفس کشی کا صلہ دوں گا
)۔ روزہ دار کے لئے دو مسرتیں ہیں ایک افطار کے وقت اور دوسری اپنے مالک
الملک کی بارگاہ میں حاضری اور شرف ملاقات کے وقت ،اور روزہ دار کے منہ کی
بو اﷲ تعالیٰ کے نزدیک مشک کی خوشبو سے بھی بہتر ہے ، یعنی انسانوں کیلئے
مشک کی خوشبو جتنی اچھی اور جتنی پیاری ہے اﷲ تعالیٰ کے ہاں روزہ دار کے
منہ کی بو اس سے بھی اچھی ہے، اور روزہ دنیا میں شیطان و نفس کے حملوں سے
بچاؤ کیلئے اور آخرت میں آتش دوزخ سے حفاظت کیلئے ڈھال ہے۔ رمضان المبارک
خیر وبرکت ، ہمدردی و اخوت کا مہینہ ہے، اس ماہ کی راتوں میں اﷲ تعالیٰ کی
جانب سے تین مرتبہ اعلان کیا جاتا ہے کہ کوئی ہے توبہ کرنے والا میں جس کی
توبہ قبول کروں۔ کوئی ہے مانگنے والا مجھ سے تو میں اس کو دوں۔ کوئی ہے
معافی مانگنے والا کہ اس کو معاف کردوں‘‘۔
اگر کوئی مسلمان عشرہ ثانیہ میں اپنے پچھلے تمام کبیرہ گناہوں سے سچے دل سے
توبہ کرلے تو اس کے صغیرہ گناہ روزے کی برکت سے معاف فرمادیے جاتے ہیں اور
وہ شخص گناہوں سے ایسا پاک ہوجاتا ہے جیسے اس کی ماں نے اسے ابھی جنم دیا
ہو۔ بلاشبہ جس کسی کو اﷲ تعالیٰ کی مغفرت مل گئی اسے سب کچھ مل گیا۔ حق
تعالیٰ شانہ تو اپنے بندوں کو معاف کرنے کے بہانے ڈھونڈتے ہیں۔ جب کسی بندے
سے کوئی گناہ سرزد ہوجائے تو اﷲ تعالیٰ کی جانب سے اسے مہلت دی جاتی ہے کہ
شاید اب بھی یہ معافی مانگ لے، شاید اب بھی یہ میری طرف رجوع کرلے۔حدیث
مبارکہ ہے کہ جب بندہ کوئی گناہ کرتا ہے تو آسمان اﷲ تعالیٰ سے عرض کرتا
ہے’’اے اﷲ! تو مجھے اجازت دے کہ میں اس پر ٹوٹ پڑوں۔‘‘ زمین کہتی ہے’’اے
اﷲ، تو مجھے اجازت دے کہ میں اسے اپنے اندر دھنسالوں۔‘‘ اس موقع پر مالک
الملک کا ارشاد ہوتا ہے’’اگر یہ تمہاری مخلوق ہے اور تم اس کے خالق ہو تو
تمہیں اجازت ہے۔ اور اگر یہ میرے بندے ہیں اور میں ان کا خالق ہوں تو میرے
بندے کا معاملہ مجھ پر چھوڑ دو، میں اس بات کا انتظار کروں گا کہ یہ مجھ سے
رجوع کرلے اور اپنے گناہوں کی معافی مانگ لے‘‘۔حضرت عبداﷲ بن عمرو رضی اﷲ
تعالیٰ عنہ روایت کرتے ہیں کہ نبی کریم صلی اﷲ علیہ وسلم نے ارشاد فرمایا
’’روزے اور قرآن دونوں بندے کے لیے شفاعت (سفارش) کریں گے۔ روزے عرض کریں
گے ’’ اے پروردگار! میں نے اس بندے کو کھانے پینے اور نفس کی خواہش پورا
کرنے سے روکے رکھا تھا، آج میری سفارش اس کے حق میں قبول فرما، اور قرآن
کہے گا کہ ’’ میں نے اس بندے کو رات کو سونے اور آرام کرنے سے روکے رکھا
تھا، آج اس کے حق میں میری سفارش قبول فرما، چنانچہ روزہ اور قرآن دونوں کی
سفارش بندے کے حق میں قبول فرمائی جائے گی‘‘ ( مشکوٰۃ)۔ حضرت ابو ہریرہ رضی
اﷲ تعالیٰ عنہ سے روایت ہے کہ آنحضرت صلی اﷲ علیہ وسلم نے ارشاد فرمایا کہ
’’تین آدمیوں کی دعا رد نہیں ہوتی، ایک روزہ دار کی افطار کے وقت، دوسرے
عادل بادشاہ کی اور تیسری مظلوم کی ‘‘۔
رسول اﷲ صلی اﷲ علیہ وسلم کا ارشاد ہے کہ رمضان کی جب پہلی رات ہوتی ہے تو
شیاطین کو بند کردیا جاتا ہے اور مضبوط باندھ دیا جاتا ہے اور سرکش جنوں کو
بھی بند کردیا جاتا ہے اور دوزخ کے دروازے بند کردیئے جاتے ہیں اس کا کوئی
بھی دروازہ نہیں کھولا جاتا اور بہشت کے دروازے کھول دیئے جاتے ہیں اور اس
کا کوئی بھی دروازہ بند نہیں کیا جاتا اور ایک آواز دینے والا آواز دیتا ہے
اے نیکی کے طالب آگے بڑھ کہ نیکی کا وقت ہے اور اے بدی کے چاہنے والے بدی
سے رک جا اور اپنے نفس کو گناہوں سے باز رکھ کیونکہ یہ وقت گناہوں سے توبہ
کرنے اور ان کو چھوڑنے کا ہے۔ حضرت سہل بن سعد ساعدی رضی اﷲ عنہ سے رویت ہے
کہ سرکار دو عالم صلی اﷲ علیہ وسلم کا فرمان عظیم ہے کہ’’ جنت کے دروازوں
میں ایک خاص دروازہ ہے جس کو ’’باب الریان‘‘ کہا جاتا ہے۔ اس دروازے سے
قیامت کے دن صرف روزہ داروں کا داخلہ ہو گا، ان کے سوا کوئی اس دروازے سے
داخل نہیں ہو سکے گا۔ اس دن پکارا جائے گا کہ کدھر ہیں وہ بندے جو اﷲ کیلئے
روزے رکھا کرتے تھے اور بھوک پیاس کی تکلیف اٹھایا کرتے تھے؟ وہ اس پکار پر
چل پڑیں گے،جب وہ روزہ دار اس دروازے سے جنت میں پہنچ جائیں گے تو یہ
دروازہ بند کر دیا جائے گا، پھر کسی کا اس سے داخلہ نہیں ہو سکے گا۔‘‘ ریان
کے لغوی معنی ہیں ’’پورا پورا سیراب‘‘ یہ بھرپور سیرابی تو اس روزہ دار کی
صفت ہے جس سے روزہ داروں کا داخلہ ہو گا۔آگے جنت میں پہنچ کر جو کچھ اﷲ
تعالیٰ کے انعامات ان پر ہوں گے ان کا علم تو بس اﷲ تعالیٰ کو ہی ہے۔ اس
مبارک ماہ کی ان تمام فضیلتوں کو دیکھتے ہوئے مسلمانوں کو اس مہینہ میں
عبادت کا خاص اہتمام کرنا چاہیے اور کوئی لمحہ ضائع اور بے کار نہیں جانے
دینا چاہیے، بالخصوص رمضان کا دوسرا عشرہ ہمارے لیے بڑی برکات کا حامل اور
قیمتی ہے جس میں ہم اپنے تمام صغیرہ و کبیرہ گناہوں سے معافی مانگ کر اﷲ
تعالیٰ کے حضور پاک و صاف پیش ہوسکتے ہیں۔ اﷲ پاک ہم سب کو عمل کی توفیق
عطاء فرمائے، اور اپنے نفس کا تذکیہ کرکے تقویٰ اختیار کرنے کی توفیق عطاء
فرمائے، آمین ۔ |
|