پچھلے دو گھنٹے سے گاڑی گھر کے باہر کھڑی ہے ۔۔۔انڈسٹری کے لیٹ لطیف

پاکستانی ستاروں میں سے اکثر نے خود کو لیٹ لطیف کا ٹائٹل دلوا ہی لیا ہے۔۔۔یہ نا صرف دیر سے آتے ہیں بلکہ ان میں سے کچھ تو باقاعدہ نخرے دکھاتے ہیں۔۔۔اور اگر آپ کرتے ہیں ان سے سوال تو یہ الٹا آپ کا ہی کردیتے ہیں برا حال۔۔۔

ہمایوں اشرف
کہتے ہیں جب آپ کے نخرے عروج پر پہنچنے لگ جائیں تو بس وہیں سے شروع ہوتا ہے آپ کے زوال کا سفر اور یہی کچھ ہوا ہمایوں اشرف کے ساتھ۔۔۔میرے خدا، عشق ہماری گلیوں میں اور کئی ڈراموں میں اداکاری کے جوہر دکھانے والے اس اداکار نے تو خود کو لیٹ لطیف کی فہرست میں سب سے اونچا مقام دیا ہے۔۔۔کئی شوز میں چینل کی گاڑی ان کو لینے کے لئے پہنچتی لیکن یہ اس وقت بھی سو رہے ہوتے اور فیصل قریشی کے ایک عید شو کی ریکارڈنگ کے دوران قریب دو گھنٹے جب انہوں نے گاڑی اور ڈرائیور کو کروایا انتظار تو شو کی ٹیم نے ان کو اسی وقت کردیا مہمان بنانے سے انکار۔۔۔اور ایسا ہوا ہے بار بار۔۔۔مارننگ شوز نے تو انہیں اسی لئے بلانا چھوڑ دیا ہے۔۔۔

ندیم جعفری
یوں تو ندیم جعفری جب کسی شو کا حصہ بنتے ہیں تو اس میں اپنی مزیدار باتوں سے جان ڈال دیتے ہیں لیکن یہ صرف اسی وقت ممکن ہے جب وہ وقت پر پہنچیں۔۔۔جی ہاں ندیم جعفری نے تو لیٹ لطیف ہونے کے ریکارڈ قائم کئے ہیں اور ان کو شو میں بلانے کے لئے اگر آپ نے گاڑی بہت دیر پہلے بھی بھیجی ہے تب بھی ندیم جعفری اپنے ہی حساب سے پہنچیں گے۔۔۔ان کے ساتھ صبح دیر سے اٹھنے کا مسئلہ بھی ہے اور ان کی تیاری بھی کافی وقت لیتی ہے۔۔۔اکثر مارننگ شو میں وہ اس وقت پہنچتے تھے جب شو اختتام پزیر ہونے والا ہوتا تھا۔۔۔اور صبح اٹھ کر اگر آپ نے بار بار انہیں کال کی تو یہ فون بھی اٹھانا بند کردیتے ہیں ۔۔۔کیونکہ لیٹ لطیف اپنے کانوں کو اکثر بند ہی رکھتے ہیں-

صنم بلوچ
یوں تو صنم بلوچ کافی اچھی اداکارہ اور میزبان ہیں لیکن اپنے ہی مارننگ شو میں میزبانی کے لئے ان کی آمد میں دیر ہوجاتی تھی۔۔۔صنم اے آر وائی مارننگ شو کے دوران تو اکثر اتنی دیر سے پہنچتی تھیں کہ شو کسی مہمان سے ہی شروع کروانا پڑجاتا تھا اور اتنا بھی وقت نہیں ملتا تھا کہ وہ اپنا میک اپ بھی صحیح سے کر سکیں۔۔۔اس معاملے میں صنم جنگ سب سے بہترین میزبان ہیں جو اپنے مارننگ شو میں کبھی بھی دیر سے نہیں پہنچیں۔۔۔

کچھ ایسے نام بھی ہیں جو آغاز میں تو وقت کے بڑے ہی پابند تھے لیکن جیسے جیسے شہرت اور کام میں اضافہ ہوا ، تو ان کی مصروفیات نے بھی لیٹ لطیف بنا دیا۔۔۔وقت پر پہنچنا انہیں ایسا لگتا جیسے یہ ان کے اسٹارڈم کے لئے نقصان دہ ہے۔۔۔ان میں زیادہ تر آرٹسٹ نئے ہیں جن کی آمد کو کچھ سال ہی ہوئے ہیں۔۔۔ تو جس نے وقت کو کھویا اس نے سب کچھ کھودیا۔۔۔کیونکہ ٹی وی کی دنیا میں جو وقت پر نا آسکا اس نے اپنی اسکرین کو کھو دیا۔۔۔