مشرقی پاکستان سے بنگلہ دیش تک-آٹھویں قسط

ایک دن میں نے مولانا طیب صاحب سے اسرار کر کے پوچھا کہ جس روز آپ کے گاؤں میں کھانے گئے تھے اس روز کیا بات تھی جس کی وجہ سے آپ گھبرائے ہوئے تھے اور جلدی میں آپ نے کھانا بھی ٹھیک سے نہیں کھایا ۔ میری بات کا جواب دینے سے پہلے انہوں کلمہ شُکر پڑھا پھر بولے لطیف بھائی آپ بڑے خوش نصیب ہیں کہ اس دن ہم لوگ صحیح سلامت آ گئے، ہمارے جانے سے پہلے ” دو مکتی باہنی“ کے آدمی جو ہمارے رشتہ دار بھی ہوتے ہیں گاﺅں میں موجود تھے ان کو جب پتہ چلا کہ کوئی پنجابی میرے ساتھ آیا ہے تو وہ لوگ وہاں سے ہٹ گئے جبکہ میں پریشان اس لیے تھا کہ وہ لوگ کہیں اپنے ساتھیوں کے ساتھ واپس آ کر ہم پر حملہ نہ کر دیں اور میں اپنے مہمان کے لیے کچھ بھی نہ کر سکوں، مگر اللہ کا لاکھ لاکھ شکر کہ وہ لوگ واپس نہیں آئے ، اسی لیے میں جلدی میں آپ کو لے کر وہاں سے نکل آیا۔یہ سن کر میں مطمئین سا ہو گیا اور اس دن میرے دل میں مولانا کے متعلق جو بد گمانی سی پیدا ہوئی تھی وہ بھی دور ہو گئی۔

لاہوری دوستوں کے ساتھ مل کر دن تو اچھے گزرنے لگے مگر کام کی ابھی تک کوئی شکل بنتی دکھائی نہیں دے رہی تھی ،اگست کا پورا مہینہ بارشوں کی نذر ہو گیا ،آخر خدا کر کے ستمبر میں کچھ برسات میں کمی ہوئی تو میں نے مولانا طیب صاحب سے فون کر کے جنگل جانے کا پروگرام بنایا ، وہاں جا کر معلوم ہوا کہ ابھی اور آٹھ دس روز کے بعد بانس کی کٹائی شروع ہو گی،دل پر یہ بات گراں تو گزری مگر پھر یہی سوچ کر خاموش رہا کہ جہاں اتنے دن گزرے ہیں دس دن اور سہی ، اور ہم بذل سوداگر کو تاکید کر کے واپس آ ئے کہ آئندہ کوئی بہا نہ نہیں چلے گا۔

کچھ فوجی بھائیوں سے دوستی ہو گئی تھی اس لیے ہر چھُٹی کے دن ہم کچھ دوست مل کر چٹاگانگ کینٹ میں فوجی دوستوں کے ساتھ گپ شپ کرنے چلے جاتے ، میں حیران تھا کہ بس میں کرایہ لینے کوئی نہ آتا ،ایک دفعہ میں نے دینا بھی چاہا تو کنڈیکٹر ہنس کر آگے بڑھ گیا، دوپہر کا کھانا بھی کینٹ میں کھاتے غرض کہ سارا دن ہنستے کھیلتے اچھا گزر جاتا ۔ایک لطیفہ جو فوجی محمد خاں نے سنایا ، مجھے آج بھی جب یاد آتا ہے تو ہنسی آنے لگتی ہے ۔انہوں نے جس انداز سے سنایا تھا وہ تصور کر کے ہی ہنسی چھوٹ جاتی ہے۔ انہوں بتایا کہ ایک بنگالی درزی سے میں کپڑے سلوانے گیا ،درزی بنگالی لہجے میں اردو بولتا تھا مجھے دیکھ کر سلام کیا تو میں نے پوچھا ،کیا کرہے ہو بھئی، درزی جو ہاتھ میں قینچی لیے کپڑے کاٹنے کی ٹیبل پر جھُکا ہوا تھا، سیدھا ہوتے ہوئے بولا”پنجابی کاٹ رہا ہے شاب“ یاد رہے کہ کُرتے کو بنگالی زبان میں ’پنجابی‘ کہتے ہیں۔ محمد خان کو اس بات کا علم نہیں تھا ، ان کا منہ حیرت سے کھلا کا کھلا رہ گیا، انہوں بندوق درزی پر تان کر غُصے سے بولا ، کون ہے جو پنجابی کو کاٹ رہا ہے تو ؟ درزی بیچارے نے سہم کر ٹیبل پر پڑے کپڑے کی طرف اشارہ کرتے ہوئے کہا ”شاب یہ کپڑے سے پنجابی بنا رہا ہے“ ادھر ایک صاحب جو اس درزی کا مطلب سمجھتے تھے انہوں نے محمد خان کو جب سمجھایا تو وہ خوب ہنسے اور کہنے لگے ، بھئی میں تو یہ سمجھا کہ کہیں یہ بھی مکتی باہنی کی طرح پنجابیوں کو کاٹنے کی باتیں کر رہا ہے۔