لڑکی اچھی ہے بس وزن زیادہ ہے، ایک ایسا جوڑا جس نے لوگوں کے اس نظریے کو غلط ثابت کر کے لاک ڈاؤن میں شادی کر لی

image


ہمارے معاشرے میں لڑکیوں کا رشتہ اس وقت کا ایک بڑا مسئلہ ہے ہر گھر میں نوجوان لڑکیاں رشتوں کے انتظار میں بیٹھی ہیں مگر لڑکے والوں کی خواہشات اور ڈیمانڈز کے سبب وہ اپنے ماں باپ کے در پر بیٹھی بیٹھی بوڑھی ہو رہی ہیں ۔ ہر لڑکے کو اپنے جیون ساتھی کے طور پر ایسی لڑکی کی خواہش ہوتی ہے جو کم عمر ہونے کے ساتھ ساتھ خوبصورت اور اسمارٹ ہو- اس کے بعد تعلیم یافتہ بھی ہو اور بڑا جہیز اپنے ساتھ لے کر آئے اتنی بہت ساری شرائط کو پورا نہ کر سکنے کے باعث لڑکیوں کے رشتے مشکلات کا شکار ہو جاتے ہیں- ایسے حالات میں اگر لڑکی کا وزن زیادہ ہو تو پھر تو اس کی شادی جوۓ شیر لانے کے مترادف ہوتی ہے اور بہت کم لڑکے ہوتے ہیں جو کسی ایسی لڑکی کو قبول کرتے ہیں جس کا وزن زیادہ ہو-

ایسی ہی ایک لڑکی کراچی کی رہائشی طوبیٰ بھی تھیں جن کا وزن شروع سے کافی زیادہ تھا اور ان کو دیکھتے ہی ہر کوئی یہ کہنے پر مجبور ہو جاتا کہ آخر اس سے شادی کون کرے گا؟ مگر ایسے ہی حالات میں طوبیٰ کو فراز ملا جس نے اس کو اس کے موٹاپے کے باوجود قبول کیا-
 

image


طوبیٰ کا اس حوالے سے یہ کہنا تھا کہ لوگوں کا مجھے دیکھ کر یہ کہنا تھا کہ تم اچھی ہو مگر موٹی ہو ، طوبیٰ نے یہ بھی بتایا کہ ہر لڑکی کو لوگ صرف اس نظر سے دیکھتے ہیں کہ اس لڑکی کا رشتہ کس طرح ہو سکتا ہے اگر یہ موٹی ہے تو اس کو اپنا وزن کم کرنا چاہیے-

جب کہ اس حوالے سے فراز کا یہ کہنا تھا کہ لوگ جب ہمیں باہر ایک دوسرے کے ساتھ دیکھتے تو اکثر تنقید کا نشانہ بناتے یہاں تک کہ میرے ایک دوست نے تو مجھے یہاں تک کہہ دیا کہ تم ہر وقت اس موٹی لڑکی کے ساتھ کیوں گھومتے رہتے ہو- اس پر فراز نے ان کو بتایا کہ وہ اس لڑکی سے شادی کر رہے ہیں تو اس پر سب چپ ہو گئے فراز کے مطابق رشتے کے لیے موٹا پتلا ہونا اہم نہیں ہوتا ہے بلکہ سب سے زیادہ اہمیت اس بات کی ہوتی ہے کہ آپ دونوں کا باہمی تعلق کیسا ہے ؟
 

image


طوبیٰ فراز کی شادی 19 اپریل کو 2020 میں لاک ڈاون کے دوران سادگی سے ہوئی جس میں ان کے قریبی لوگوں نے شرکت کی- شادی کے انتطامات کے حوالے سے ان کا کہنا تھا کہ درزی ، حلوائی سب کے بند ہونے کی وجہ سے انہیں کافی مشکلات کا سامنا کرنا پڑا مگر انہوں نے ان سب چیزوں کو کسی نہ کسی طرح مینیج کر لیا-

اس جوڑے کو سوشل میڈیا پر آج کل بہت شہرت مل رہی ہے اور فراز کے اس عمل کی ہر جانب سے تعریف کی جا رہی ہے اور اس جوڑے کو ان تمام لڑکوں کے لیے ایک مثالی جوڑا قرار دیا جا رہا ہے جو کہ اندر کی خوبصورتی کے بجائے ظاہری خوبصورتی کو زيادہ اہمیت دینے کے قائل ہیں-
 

YOU MAY ALSO LIKE: