جنتی نوجوانوں کے سردار……!

(Rana Aijaz Hussain, Multan)

 روز ازل سے ہی اﷲ تبارک و تعالیٰ کا ضابطہ رہا ہے کہ محبوبان الٰہی کو امتحان اور آزمائش کی سخت ترین منزلوں سے گزرنا پڑتا ہے، اور جاں نثاری ،تسلیم ورضا کا مظاہرہ کرنا پڑتا ہے۔ اور پھر کبھی اپنی قربانی دینے والے کو ذبیح اﷲ کا لقب ملتا ہے تو کبھی باطل کے سامنے کلمہ حق بلند کرتے ہوئے شہادت کے عظیم رتبے پر فائز ہونے والے کو جنتی نوجوانوں کی سرداری ملتی ہے۔ حضرت امام حسین رضی اﷲ تعالیٰ عنہ کی شہادت نے ہمارے ضمیروں کو بیدار کیا، دلوں کو بدلا،ذہنی انقلاب کی راہیں ہموار کیں اور انسانی اقدار کی اہمیت کو متعارف کروایا ہے ۔ حضرت حسین رضی اﷲ تعالیٰ عنہ کی ولادت ہوئی تو اس خوشخبری کو سن کر آپ صلی اﷲ علیہ وسلم تشریف لائے، حسین رضی اﷲ تعالیٰ عنہ کو گود میں لیا، داہنے کان میں اذان اور بائیں میں اقامت کہی اور اپنی زبان منہ میں دی، پیغمبر علیہ السلام کا مقدس لعاب دہن حضرت حسین رضی اﷲ تعالیٰ کی غذا بنا،ساتویں دن عقیقہ کیا گیا۔ آپ کی پیدائش سے خاندان میں انتہائی خوشی اور مسرت محسوس کی جاتی تھی۔ خاتم النبیین حضرت محمد صلی اﷲ علیہ وسلم اپنے دونوں نواسوں کیساتھ انتہائی محبت فرماتے ، کبھی سینہ پر بیٹھاتے ، کبھی کاندھوں پر چڑھاتے ، نماز میں سجدہ کی حالت میں حضرت حسین رضی اﷲ تعالیٰ عنہ پشت مبارک پر چڑھ جاتے تو سجدہ طویل کردیتے یہاں تک کہ بچہ خود سے پشت پر سے علیحدہ ہوجاتا۔اور جب حضرت حسین رضی اﷲ تعالیٰ مسجد کے دروازے سے داخل ہوتے ہوئے زمین پر گر گئے تو رسول اﷲ صلی اﷲ علیہ و سلم نے خطبہ پڑھتے ہوئے اپنا خطبہ قطع کردیا منبر سے اتر کر بچے کوزمین سے اٹھایا اور پھر منبر پر تشریف لائے اور مسلمانوں کو تاکید فرماتے ہوئے کہادیکھو یہ حسین ہے اسے خوب پہچان لو اور ان سے محبت رکھو۔ رسول اﷲ صلی اﷲ علیہ وسلم نے فرمایا ’’ حسین مجھ سے اور میں حسین سے ہوں، جو شخص حضرت حسین سے محبت کرے اﷲ تعالیٰ اس کے ساتھ محبت فرمائے گا‘‘۔ حضرت انس بن مالک رضی اﷲ عنہ سے روایت ہے کہ رسول اﷲ صلی اﷲ علیہ وسلم سے عرض کیا کہ اہل بیت میں سے آپ کو سب سے زیادہ محبوب کو ن ہے ؟ تو آپ صلی اﷲ علیہ وسلم نے فرمایا حضرت حسن رضی اﷲ عنہ اور حضرت حسین رضی اﷲ عنہ اور آپ صلی اﷲ علیہ وسلم حضرت عائشہ صدیقہ رضی اﷲ عنہ سے کہا کرتے تھے میرے بیٹوں کو میرے پاس لے آؤ اور آپ صلی اﷲ علیہ وسلم ان کو سینے سے لگا لیتے۔حضرت ابن عباس رضی اﷲ عنہ سے روایت ہے کہ رسول اﷲ صلی اﷲ علیہ وسلم نے حضرت حسن ابن علی رضی اﷲ عنہ کو کندھے پر اٹھایا ہوا تھا کہ ایک شخص نے کہا ’’کیا ہی اچھی سواری ہے، جس پر آپ صلی اﷲ علیہ وسلم نے ارشاد فرمایا کہ’’ سوار کتنا اچھا ہے‘‘۔

مگر جب آنے والے حالات کا آپ صلی اﷲ علیہ وسلم کو علم ہوا تو آپ کی آنکھوں سے آنسو برس پڑے، آپ صلی اﷲ علیہ وسلم نے فرمایا میرے پاس جبرائیل امین آئے اور مجھے بتایا کہ میری امت میرے اس بیٹے کو قتل کر دے گی، جبرائیل اس جگہ کی سرخ مٹی بھی میرے پاس لائے جہاں اسے قتل کیا جائے گا۔ اور پھر جب اسلامی خلافت کے بعد بادشاہت کا دور آیا تو حضرت سیدنا امیر معاویہ کے فرزند نے اپنے عظیم والد گرامی کے مشن سے باغی ہوکر اسلامی حکومت کو قیصر وکسریٰ کی طرز پر ملوکیت سے بدلنا چاہا اور اس پر امام حسین رضی اﷲ تعالیٰ عنہ سے بیعت چاہی، یہی وہ موڑ ہے جو تاریخ اسلامی میں واقعہ کربلا کا سبب بنا۔ اسلامی نظام شریعت کے روشن چہرے کو یزید شہنشاہی کے زعم میں مسخ کرنا چاہتا تھا۔جس دین کی اکملیت فخر موجدات صلی اﷲ تعالیٰ علیہ وسلم کی آمد کے ساتھ ہو گئی تھی۔ اسی دین کے اصول حرام و حلال میں یزید اپنے نفس کے فیصلے نافذ کرنا چاہتا تھا۔ اس کے سامنے دو نمونے تھے، اسلامی نظام حکومت کا نمونہ اور کسریٰ کے استبداد کا نمونہ۔ اس نے اسلامی نظام حکومت کا نمونہ نہیں اپنایا بلکہ اس نے کسریٰ کی آمریت کو نمونہ عمل بنایا۔ اسی کی تصدیق کیلئے اس نے نواسہ رسول حضرت حسین رضی اﷲ عنہ کو مجبور کرنا چاہا، وہ چاہتا تھا کہ شراب و شباب کی اجازت دیدی جائے، زنا و سود کی اجازت دیدی جائے ، اسلامی تعزیرات میں رد و ترمیم کر دی جائے، شریعت کو طبیعت کے مطابق ڈھال لیا جائے اور ان سب کے باوجود امام حسین رضی اﷲ تعالیٰ عنہ بیعت یزید کرکے یزیدی قوانین کو تسلیم کر لیں۔ معاملہ چونکہ اسلامی قوانین کی حفاظت کا تھا، یزید شریعت اسلامی میں تحریف چاہتا تھا، حضرت حسین رضی اﷲ تعالیٰ عنہ کا بیعت کر لینا مثال بن جاتا، یزیدی فتنے پر مہر تصدیق ثبت کرنے کا ذریعہ بن جاتا، اسلام کا وہ روشن چہرہ باقی نہ رہتا جس کیلئے خاتم الانبیا ء محمد صلی اﷲ علیہ وسلم تشریف لائے تھے۔

حضرت حسین رضی اﷲ تعالیٰ عنہ نے مستقبل کیلئے ایک مثال قائم کر دی کہ یزید کی بیعت دراصل باطل کی توثیق ہے اس لئے آپ نے بیعت یزید سے صاف انکار کرکے دنیا کو صدق و وفا کا وہ عظیم درس دیدیا کہ ہر باطل کے مقابل حضرت حسین رضی اﷲ تعالیٰ عنہ حق کی علامت بن چکے ہیں۔ باطل چاہے اسلامی کلمے کے ساتھ آئے یا صیہونیت کی شکل میں، ایک مسلمان کیلئے سچے اسلامی احکام ہی کافی ہیں، انہیں کی پیروی میں اس کیلئے نجات ہے۔ اس دنیائے فانی میں اپنے مکرو فریب اور جبروتشدد سے حاصل کی ہوئی قوت کے بل بوتے پر کسی کا بظاہر کامیاب نظر آنا اور اقتدار حاصل کرلینا، اصل کامیابی نہیں۔ بلکہ حقیقی اوردائمی کامیابی یہ ہے کہ انسان کو تخت ملے یا تختہ وہ دنیاوی جاہ وحشمت کے لئے اﷲ تعالیٰ اوراس کے رسول صلی اﷲ علیہ وسلم کی اطاعت کا دامن ہرگز نہ چھوڑے۔ حضرت امام حسین رضی اﷲ تعالیٰ عنہ اکثر فرمایا کرتے تھے کہ’’ بادشاہوں کی بدترین صفات یہ ہیں کہ دشمنوں سے ڈریں، بے سہارا اور ناداروں پر رحم نہ کریں اور عطا و بخشش کے وقت بخل سے کام لیں‘‘۔ حضرت حسین رضی اﷲ تعالیٰ عنہ کی عظیم شہادت ہمیں یہ درس دیتی ہے کہ باطل کو ترک کرکے حق پر ڈٹا جائے۔ ہمیشہ دین حق کا علم بلند کیا جائے، چاہے اس کے لئے بڑی سے بڑی قربانی کیوں نہ دینی پڑے۔ اپنی اور اپنے عزیزوں کی جان راہ خدا میں نچھاور کرکے حضرت حسین رضی اﷲ تعالیٰ عنہ نے بتا دیا کہ جب بھی اسلام کے مقابل یزیدیت سر ابھارے میری شہادت سے درس لے کر استقلال کی تاریخ رقم کر لینا، باطل کے آگے سرنگوں نہ ہونا۔ جان دیدینا مگریزیدیت کی اطاعت قبول مت کرنا۔ تاریخ انسانی میں ایسے خونی سانحہ کی مثال نہیں ملتی، جان دینا آسان نہیں، عزیزوں کو قربان کرنا بڑا مشکل کام ہے ۔ یہ سب صرف اﷲ تعالیٰ کی خوشنودی اور دین حق کی سربلندی کیلئے امام حسین رضی اﷲ تعالیٰ عنہ نے قبول کیا۔ اور امت محمدیہ کو بتا دیا کہ خودداری یہ نہیں کہ اسلام سے جدا راہ قبول کر لی جائے ،خودداری تو یہ ہے کہ راہ حق پر چلا جائے چاہے اس کیلئے اپنے لہو سے ہی چمن کی آبیاری کرنی پڑے۔ حضرت حسین رضی اﷲ تعالیٰ عنہ نے اپنے لہو سے ایک درخشاں تاریخ لکھ دی ہے جس کی سرخی آج بھی ہویدا ہے۔
اک پل کی تھی بس حکومت یزیدکی
صدیاں حسین ؓ کی ہیں زمانہ حسین ؓ کا
 

Comments Print Article Print
 PREVIOUS
NEXT 
About the Author: Rana Aijaz Hussain

Read More Articles by Rana Aijaz Hussain: 750 Articles with 307082 views »
Journalist and Columnist.. View More
30 Aug, 2020 Views: 134

Comments

آپ کی رائے

مزہبی کالم نگاری میں لکھنے اور تبصرہ کرنے والے احباب سے گزارش ہے کہ دوسرے مسالک کا احترام کرتے ہوئے تنقیدی الفاظ اور تبصروں سے گریز فرمائیں - شکریہ