کامیاب افراد کے کچھ ایسے راز جانیں جن کو آزمانے سے آپ بھی کامیاب بن سکتے ہیں

کامیابی کا حصول تو ہر فرد کی خواہش ہوتی ہے مگر ہر انسان کے نصیب میں کامیابی نہیں ہوتی ۔ کامیاب ہونے کے لیے ایک جانب تو شدید محنت کی ضرورت ہوتی ہے مگر اس کے ساتھ ساتھ اس کی کچھ عادات بھی اس کی کامیابی میں اہم کردار ادا کرتی ہیں جن کے بارے میں ہم آپ کو آج بتائيں گے--
 
1: جلد معاف کر دیتے ہیں
کامیاب لوگوں کی سب سے اہم خاصیت یہ ہوتی ہے کہ وہ کسی بھی بات کو اپنے سر کا وبال نہیں بناتے ہیں بلکہ ان کو زندگی میں آگے بڑھنے کی خواہش ہوتی ہے- اس وجہ سے وہ ان لوگوں کو بھی جلد معاف کر کے آگے بڑھ جاتے ہیں جو کہ ان کو تکلیف دینے کا باعث بنتے ہیں دوسرے لفظوں میں وہ سانپ کے گزر جانے کے بعد لکیر پیٹنے کا قائل نہیں ہوتا ہے-
 
2: صرف اپنی کامیابی کا خواہشمند نہیں ہوتا
کامیاب انسان جوکچھ اپنے لیۓ سوچتا ہے وہی دوسروں کے لیے بھی سوچتا ہے وہ دوسروں کی کامیابی سے جلن محسوس نہیں کرتا ہے بلکہ اس کی کوشش یہی ہوتی ہے کہ وہ کچھ ایسا کریں کہ ان کے ساتھ ساتھ دوسرے لوگ بھی کامیابی کے سفر میں ان کے شریک ہو سکیں-
 
3: مقصد پر نظر رکھتا ہے
کامیاب انسان ہمیشہ مقصد پر نظر رکھتا ہے اس کو اپنی منزل کا پتہ ہوتا ہے اور اسی وجہ سے وہ راستے کی مشکلات پر ہمت ہار کر نہیں بیٹھتا ہے بلکہ اپنی تمام توانائياں اپنے مقصد کے حصول پر خرچ کرتا ہے جب کہ اس کے مقابلے میں ناکام انسان ایک وقت میں بہت سارے کام شروع کر لیتا ہے اور ان میں سے کسی کو بھی پایہ تکمیل تک نہیں پہنچا سکتا ہے-
 
4: غصے سے پرہیز
ناکام لوگوں کی ناکامی کی بڑی وجہ ان کا جلدی غصے میں آجانا ہوتا ہے جب کہ اس کے مقابلے میں کامیاب لوگ اپنے جذبات کے اظہار میں عجلت سے کام نہیں لیتے ہیں بلکہ اپنے جذبات پر کنٹرول کرتے ہیں اور وقت کا انتظار کرتے ہیں تاکہ جذبات ظاہر کر سکیں-
 
5: معلومات کے دروازے کھلے رکھتے ہیں
کامیاب لوگ اپنی زندگی میں کبھی بھی خود کو عقل کل نہیں سمجھتے ہیں بلکہ وقت کے ساتھ ساتھ خود کو اپ ڈيٹ کرتے رہتے ہیں اور ان میں اتنی لچک ہوتی ہے کہ وہ وقت کے ساتھ خود کو تبدیل کر سکیں- جب کہ ناکام لوگ اپنے اندر لچک نہیں رکھتے ہیں اور نہ ہی خود کو اپ ڈیٹ کرتے ہیں جس کے سبب وہ ایک جگہ پر آکر رک جاتے ہیں اور بدلتے وقت کا ساتھ نہیں دے سکتے ہیں -
 
6: مطالعہ کرتے ہیں
مطالعے کی عادت کسی بھی انسان کی کامیابی میں اہم کردار ادا کرتی ہے نت نئی کتابوں کا مطالعہ نہ صرف ان کی ذہنی صلاحیتوں میں اضافے کا باعث بنتا ہے بلکہ ان کو کامیاب بنانے کے لیے اہم ہوتی ہے ۔ کتاب ان کے فارغ وقت کا وہ رفیق ہوتی ہے جو ان کی ذہنی صلاحیتوں کو جلا بخشتی ہے جب کہ ناکام لوگ اس وقت کو ٹیلی وژن دیکھنے میں اور دوسرے بے مقصد مشاغل میں ضائع کرتے ہیں-
Most Viewed (Last 30 Days | All Time)
10 Jan, 2021 Views: 3976

Comments

آپ کی رائے