نمک کے محل میں رہنا ہے تو اس ہوٹل میں وقت گزاریں، دنیا کے کچھ ایسے انوکھے ہوٹل جہاں پر ہر کوئی ٹھہرنے کی خواہش کرے

 
سفر کی خواہش انسان کے لاشعور میں چھپی ہوتی ہے ہر انسان کے اندر یہ خیال ہوتا ہے کہ وہ سال بھر میں اپنا کچھ وقت حالت سفر میں گزارے تاکہ وہ ذہنی طور پر فریش ہو سکے- اس کے علاوہ نت نئے تجربات کی مدد سے دنیا کے بارے میں نئی نئی باتیں سیکھ سکے-
 
دنیا کے عجیب و غریب ہوٹل
دنیا میں سیاحت ایک بہت اہم صنعت بن گئی ہے جہاں پر لوگ نہ صرف پیسہ لگاتے ہیں بلکہ بڑی مقدار میں منافع بھی کماتے ہیں- لوگوں کو متوجہ کرنے کے لیے نئے نئے انداز اختیار کیے جاتے ہیں تاکہ دنیا بھر کے لوگ ان کی طرف آسکیں- سیاحت کے شعبے میں قیام کے لیے لوگ ہوٹلز کا انتخاب کرتے ہیں اور کچھ ہوٹل ایسے بھی ہیں جو کہ اپنے نت نئے اور انوکھے انداز کے سبب لوگوں کو اپنی جانب راغب کرتے ہیں ایسے ہی کچھ ہوٹل کے بارے میں ہم آپ کو بتائيں گے-
 
پانی کے اندر ہوٹل
سطح زمین پر تو قیام سب ہی کرتے ہیں مگر ایک ہوٹل ایسا بھی ہے جو کہ اپنے پاس آنے والوں کو ایسے کمرے پیش کرتے ہیں جو کہ پانی کے اندر ہوتے ہیں اور اس کمرے کے شیشے کی دیواروں سے آپ مچھلیاں تیرتے دیکھ سکتے ہیں- رات کے وقت اس کمرے میں لگی ہوئيں اسپاٹ لائٹس ارد گرد کے جانوروں کو اپنی جانب متوجہ کرتے ہیں جس سے وہ جانور شیشے کی دیواروں کے پاس آجاتے ہیں اس ہوٹل کا نام مینٹا ریزارٹ ہے جو پیمبلا آئی لینڈ زنزيبار کے مقام پر واقع ہے-
 
برفانی اگلو نما ہوٹل
برفانی اگلو کے اندر رہائش ایک خواب کی طرح ہوتا ہے اور اگر اس اگلو میں پورے خاندان کے ساتھ رہنے کا موقع مل جائے تو ہر کوئی اس خواب کی تعبیر حاصل کرنا چاہے گا اس وجہ سے فن لینڈ میں گولڈن کراؤن اگلو کے تقریبا 18 اگلو بنائے گئے ہیں-جن میں کچن باتھ روم بیڈروم سب موجود ہے اور برف کے ریگزار میں اس جگہ پر رہنا ایک خواب جیسا ہے-
 
کتابوں کے شوقین افراد کے لیے ہوٹل
جس طرح کچھ افراد ہوٹل میں قیام کرتے ہیں اور گھومنے پھرنے کے شوقین ہوتے ہیں ایسے ہی کچھ افراد ایسے بھی ہوتے ہیں جن کی خواہش ہوتی ہے کہ وہ کسی ایسی پر سکون جگہ پر قیام کر سکیں جہاں پر ان کو آرام کے ساتھ ساتھ ڈھیر ساری کتابیں بھی میسر ہوں- ایسا ہی ایک ہوٹل بک اینڈ بیڈ کے نام سے ٹوکیو میں قائم کیا گیا ہے جس کے کمرے میں بک شیلف موجود ہے- اس کے علاوہ ایسی لائٹ موجود ہے جس میں سکون سے بیٹھ کر اور لیٹ کر مطالعہ کیا جا سکتا ہے- اس کے علاوہ کسی بھی قسم کی کتاب چاہیے ہو تو وہ بھی مںگوائی جا سکتی ہے-
 
نمک کا بنا ہوٹل اور کمرے
برف سے بنائے گئے ہوٹل اور عمارات کے بارے میں تو سب ہی نے سنا ہو گا مگر اس بار بات برف کی نہیں بلکہ نمک کی ہے۔ یہ ہوٹل نمک سے نہ صرف بنایا گیا ہے بلکہ اس ہوٹل کے کمروں کے ساتھ ساتھ ہر ہر چیز نمک سے بنی ہوئی ہے-یہ ہوٹل بولیویا کے مقام پر پیلاسیو ڈي سال کے نام سے ہے یہ ہوٹل صحرائے بولیوین کے کنارے پر واقع ہے اس ہوٹل میں تقریبا 30 کمرے ہیں جہاں کی دیواروں سے لے کر فرنیچر تک نمک ہی کا بنا ہوا ہے-
 
یہ تمام ہوٹل اپنی اقسام کے اعتبار سے منفرد اہمیت کے حامل ہیں اور یہی سبب ہے کہ لوگ ان علاقوں میں ان ہوٹلوں میں رہائش اختیار کرنے کے لیے آتے ہیں-
Most Viewed (Last 30 Days | All Time)
09 Jan, 2022 Views: 2405

Comments

آپ کی رائے