مالم جبہ سکی ریزورٹ، خوبصورت پہاڑوں کے درمیان ایک شاہکار

یہ انسانی فطرت ہے کہ جب جب وہ دنیا کے ہنگاموں سے گبھرا جاتا ہے تو فطرت کی آغوش میں ہی پناہ اور سکون پاتا ہے۔ ایسا ہی قلبی اطمینان سوات کے سیاحتی مقام مالم جبہ پہنچ کر حاصل ہوتا ہے۔ جہاں یہ مقام قدرتی نظاروں سے مالا مال ہے وہیں تمام سہولیات سے آراستہ مالم جبہ سکی ریزورٹ سیاحوں کو بار بار آنے پر مجبور کرتا ہے۔

جب آپ سوات کی بل کھاتی، اٹھلاتی سڑکوں سے ہوتے اور سحر انگیز نظاروں سے محظوظ ہوتے ہوئے مالم جبہ سکی ریزورٹ پہنچتے ہیں تو تھکن کا رفوچکر ہوجانا لازم ہے کیونکہ یہاں سیاحوں کے آرام اور آسائش کے لئے نہ صرف تمام انتظامات موجود ہیں بلکہ ایڈونچر سے بھرپور تفریحی سرگرمیاں سرد موسم میں بھی خون کو گرما دیتی ہیں۔ پھر چاہے وہ بات ہو چئیر لفٹ کی یا پھر زِپ لائن، ہیومن سلنگ شاٹ ہو یا پھر جائینٹ سوئنگ۔آپ یہاں ہر طرح کی سرگرمی سے لطف اندوز ہو سکتے ہیں۔

خوش قسمتی یہ ہے کہ آپ کسی بھی موسم میں مالم جبہ آسکتے اور اپنے لمحات کو یادگار بنا سکتے ہیں۔ موسمِ سرما میں یہاں خاص طور پر آئس سکیٹںگ، سکینگ ، سنوبورڈنگ، سنو سائیکلنگ، سنو شو واک، سنو بائیک ،سنو ٹیوبنگ اور دیگر تفریحی سرگرمیوں کا اہتمام کیا جاتا ہے۔ جس سے بچے اور بڑے نیز ہر عمر کے افراد لطف اندوز ہو سکتے ہیں۔

یہاں اس بات کا ذکر کرنا بھی انتہائی ضروری ہے کہ مالم جبہ سکی ریزورٹ میں تمام رائیڈز نہ صرف جدید ترین میٹیریل سے تیار کی گئی ہیں بلکہ سیاحوں کی حفاطت کو اولین ترجیح دیتے ہوئے غیر ملکی ماہرین اور انجنئیرز کی ایک ٹیم بھی تشکیل دی گئی ہے جو گاہے بگاہے ان رائیڈز کی جانچ کرتی رہتی ہے۔ لہٰذا عوام بلا خوف وخطر یہاں تشریف لاسکتے ہیں اور چئیر لفٹ کے ذریعے پوری وادی کا نظارہ کر سکتے ہیں۔ قوی ہیکل پہاڑوں کے درمیان زپ لائین کے ذریعہ کسی آزاد پرندے کی مانند قدرت کی خوبصورتی کو سراہ سکتے ہیں۔ جائینٹ سوئنگ سے اپنے اندر کے خوف کو چیلنج کرتے ہوئے آسمان کو چھو سکتے ہیں۔

اب کچھ بات ہوجائے ان تمام سرگرمیوں کے ساتھ ساتھ مزیدار کھانوں کی کیونکہ جب آپ اپنے پیاروں کے ساتھ تفریحی مقامات پر تشریف لاتے ہیں اور وہاں آپکی پسند کے کھانے بھی موجود ہوں تو سیر کا لطف دوبالا ہوجاتا ہے۔

مالم جبہ سکی ریزورٹ کی اپنی حدود میں نہ صرف آپکو سنیکنگ اور منچنگ کے لئے تمام اشیا فراہم کی جاتی ہیں بلکہ ساتھ ہی آپکی من پسند ڈشز بھی تیار کی جاتی ہیں۔ اسکے علاوہ یہاں آپ لذیذ ریسٹورنٹ کے لذیذ کھانوں کے ذائقے سے بھی محظوظ ہو سکتے ہیں۔

مالم جبہ سکی ریزورٹ کی انتظامیہ جہاں سیاحوں کے لئے تمام سہولیات کی دستیابی کو ممکن بناتی ہے وہیں ہر سال فیملی فیسٹیولز ، ریلیز اور کھیلوں کے مقابلوں کا بھی انعقاد کرتی ہے۔ جس کے ذریعہ ہر سال ہزاروں ایتھلیٹس کو اپنا ہنر اور ٹیلنٹ دکھانے کا موقع ملتا ہے۔

یہی وجہ ہے کہ اب ریزورٹ کی انتظامیہ نے سکی اور سنو بورڈنگ کے لئے تربیتی کورسز کا بھی اہتمام کیا ہے جس کے لئے بین الاقوامی شہرت یافتہ اساتذہ کی خدمات حاصل کی گئی ہیں۔لہٰذا اب آپ مالم جبہ سکی ریزورٹ میں اپنی من پسند سرگرمیوں کو زیادہ بہتر انداز سے انجوائے کر سکتے ہیں۔ضرورت اس امر کی ہے کہ ہم اپنے ملک میں سیاحت کو زیادہ سے زیادہ فروغ دے کر نہ صرف دنیا کو امن و آشتی کا پیغام دیں بلکہ ملکی معیشت اور اقتصاد کو بھی تقویت بخشیں۔

مکمل تفصیلات کے لیے ان لنکس پر کلک کریں

Instagram: https://www.instagram.com/malamjabbaskiresortofficial/

Facebook: https://www.facebook.com/MjSkiResort

< Previous سفر کیسے ہماری دنیا کو نقصان پہنچا رہا ہے؟ سیاحت کے شوقین یہ ضرور جانیں NEXT > چار خواتین اور وہ سنسان جزیرہ جہاں نلکے میں پانی ہے نہ دنیا سے رابطے کے لیے انٹرنیٹ