یکم جنوری سال کا پہلا دن کیسے بنا؟

دنیا بھر میں یکم جنوری کو سالِ نو کا آغاز ہوتا ہے لیکن یہ ہمیشہ سے سال کا پہلا دن نہیں تھا۔ کیلنڈر میں جنوری پہلا مہینہ اور اس کی یکم تاریخ سال کا پہلا دن کیسے بنے؟ اس سوال کا جواب قدیم روم کی تاریخ سے ملتا ہے۔

آج دنیا کے اکثر ممالک میں گریگورین تقویم یا کیلنڈر رائج ہے۔ اس کیلنڈر کو پہلی مرتبہ کیتھولک پوپ گریگوری نے اکتوبر 1582 میں متعارف کرایا تھا۔ اس تقویم میں سورج کے گرد زمین کے چکر مکمل ہونے کی مدت کو ایک سال قرار دیا گیا ہے۔

گریگورین کیلنڈر 46 قبل مسیح میں رومن فرماں روا جولیئس سیزر کے بنائے گئے ’جولین‘ کیلنڈر سے بہت ملتا جلتا ہے۔ اس میں اکثر مہینوں کے نام بھی رومی اساطیر کے کرداروں پر ہیں۔ لیکن آج کے برخلاف ابتدائی رومن دور میں سال میں 10مہینے اور 304 دن ہوتے تھے اور سال کا آغاز موسم بہار کی آمد کے ساتھ مارچ میں ہوتا تھا۔

وقت اور تاریخ سے متعلق معلومات فراہم کرنے والی ویب سائٹ ’ٹائم اینڈ ڈیٹ‘ کے مطابق روم کے بانی تصور ہونے والے داستانی کردار روملس نے روم میں رائج اس کیلنڈر کا آغاز کیا تھا۔ بعد ازاں آٹھویں صدی قبلِ مسیح میں نوما پومپولیئس نامی رومی شہنشاہ نے سال میں جنوری اور فروری کے مہینوں کا اضافہ کیا لیکن جنوری میں 29 دن مقرر کیے تھے۔

ایک ایسا دور بھی آیا جب صدیوں سے رائج یہ کیلنڈر سورج کی گردش کے ساتھ ہم آہنگ نہیں رہا۔ اس میں موسموں کی تبدیلی اور فصلوں کی کاشت وغیرہ کے اوقات کا درست اندازہ لگانے میں مشکل پیش آنے لگی۔

رومی فرماں روا جولیئس سیزر نے ریاضی اور فلکیات کے ماہرین سے مشورہ کرکے 46 قبل مسیح میں اس کیلنڈر میں تبدیلیاں کیں اور جولین کیلنڈر متعارف کرایا۔ جولیئس سیزر نے اس کیلنڈر میں جنوری کے ایام 31 کردیے اور لیپ ایئر کا نظام بھی متعارف کرایا۔

آغاز کا دیوتا
مختلف تاریخی حوالوں سے معلوم ہوتا ہے کہ 150 قبلِ مسیح ہی میں سلطنت روم میں انتظامی وجوہ کی بنا پر رائج کیلنڈر میں جنوری کو سال کا پہلا مہینہ مقرر کیا گیا۔

تاہم بعض مؤرخین کے مطابق جولیئس سیزر نے کسی بھی کام کے آغاز کے دیوتا ’جینس‘ کے نام سے موسوم مہینے جنوری کو سال کا پہلا مہینہ اور یکم جنوری کو سال کا پہلا دن قرار دیا۔

رومی اساطیر میں دیوتا جینس کے دو چہرے ہیں جن میں سے ایک کا رخ آگے اور ایک پیچھے کی جانب ہے۔ یعنی یہ بیک وقت مسقبل اور ماضی کی جانب دیکھ رہا ہے۔

رومی، سال کے آغاز پر دیوتا جینس کے چڑھاوے کے لیے جانوروں کی قربانی اور تحائف کا تبادلہ کیا کرتے تھے۔

البتہ پانچویں سے پندرھویں صدی عیسوی کے دوران یورپ میں جنوری کے بجائے مسیحی روایات کے مطابق اہم تاریخوں 25 دسمبر اور 24 مارچ کی تاریخوں کو نئے سال کا جشن منایا جانے لگا۔ تاہم 1582 میں کیتھولک چرچ کے سربراہ پوپ گریگوری نے یکم جنوری کو ایک بار پھر سال کا پہلا دن قرار دیا۔

جشن کا آغاز
دنیا میں بھلے ہی اکثر ممالک میں رائج گریگورین کیلنڈر کے مطابق یکم جنوری سے نئے سال کا آغاز ہوتا ہے۔ لیکن دنیا کی مختلف تہذیبوں میں تقویم اور نئے سال کے آغاز کی دیگر روایات کی صدیوں پرانی تاریخ ہے۔

انسائیکلو پیڈیا آف بریٹنیکا کے مطابق معلوم تاریخ میں چار ہزار سال قبلِ مسیح میں عراق میں بابل کی تہذیب میں سب سے پہلے سالِ نو کا جشن منانے کے آثار ملتے ہیں۔

سال کے آغاز کا یہ جشن موسم بہار کے آغاز کے بعد پہلا چاند نظر آنے پر منایا جاتا تھا۔ اس تہوار کو ’اکیتو‘ کہا جاتا تھا۔ گریگورین کیلنڈر کے حساب سے یہ مارچ کے وسط کا دور بنتا تھا۔

دو ہزار سال قبلِ مسیح میں عراق کے شمال میں آشوری سلطنت میں موسم خزاں کے آغاز پر (ستمبر) میں نئے سال کا آغاز کیا جاتا تھا۔