|
اس وقت دنیا بھر کے بہت سے ممالک اڑنے والی کاروں یا کم
بلندی والی معیشت کی جدت طرازی اور اطلاق کو تیز کر رہے ہیں۔اس ضمن میں،
کچھ کمپنیاں روایتی مکینیکل ایوی ایشن سے اسمارٹ الیکٹرک ایوی ایشن میں
منتقل ہو رہی ہیں. کچھ کاروبار اسمارٹ الیکٹرک گاڑیوں سے آگے بڑھ کر اسمارٹ
الیکٹرک ایوی ایشن میں قدم رکھ رہے ہیں۔ اڑنے والی کاروں کی بنیاد رکھنے
والی صنعتی چین کا تقریباً 85 فیصد اسمارٹ الیکٹرک کاروں کے ساتھ قریبی طور
پر منسلک ہے ، جو اڑنے والی کار ٹیکنالوجیز کے لئے ایک مضبوط بنیاد فراہم
کرتا ہے۔ کچھ ایسے ادارے بھی ہیں حو ملٹی روٹر ڈرونز سے اسمارٹ الیکٹرک
ایوی ایشن کی جانب بڑھ رہے ہیں۔ ملٹی روٹر ڈرونز نے اسمارٹ الیکٹرک ایوی
ایشن کے لئے فلائٹ کنٹرول ٹیکنالوجی میں ایک بنیاد قائم کی ہے۔
کم بلندی والی معیشت کے حوالے سے دنیا میں ایک اہم کھلاڑی کی حیثیت سے چین
اس شعبے کی ترقی کو فروغ دینے کے لیے قانونی فریم ورک وضع کر رہا ہے۔اس ضمن
میں تحقیق و ترقی اور مینوفیکچرنگ سے لے کر آپریشنز تک صنعت کی صلاحیتوں کے
استحکام پر توجہ مرکوز کی جا رہی ہے۔ ضابطے کے تحت حفاظت کو ایک اور اہم
نکتہ قرار دیا گیا ہے، اور اس بات پر زور دیا جا رہا کہ قانونی ضابطے کے
تحت طیاروں کی ترقی، پیداوار، آپریشن اور دیکھ بھال کی حفاظت کو یقینی
بنانے میں ذمہ دار حکام کا کردار انتہائی اہم ہے۔ اس خاطر اعلیٰ درجے کی
کمپنیوں کو پروان چڑھانے کے لیے قانونی فریم ورک کا استعمال کم بلندی والی
معیشت کی پائیدار ترقی کو فروغ دینے اور عالمی مسابقت کو یقینی بنانے میں
بھی مددگار ہے۔
یہ بات قابل ذکر ہے کہ چین کی کم بلندی والی معیشت 2025 تک تقریباً 1 کھرب
یوآن (139.11 ارب امریکی ڈالر) کے حجم تک پہنچنے کی توقع ہے۔ "چائنا لو
الٹی ٹیوڈ اکانومی الائنس" کے مطابق، 2030 تک یہ صنعت 3 کھرب یوآن سے تجاوز
کرنے کا تخمینہ ہے، جس میں ڈرونز کا شیئر ایک کھرب یوآن سے زیادہ ہو جائے
گا۔
انہی حقائق کو مدنظر رکھتے ہوئے چینی حکام کی جانب سے شہری ہوابازی کی
مینوفیکچرنگ کے لیے تجویز کردہ اقدامات میں ایسے شقیں شامل کی جا رہی ہیں
جو اداروں کی قیادت میں، مارکیٹ پر مرکوز اور صنعت، تعلیم اور تحقیق کے
مربوط نظام کے ذریعے شہری ہوابازی کی مینوفیکچرنگ کے لیے جدت کے نظام کو
بہتر بنائیں گی۔ اس میں اہم ٹیکنالوجیز کی تحقیق اور ترقی کو سہارا دینا،
بڑے طیاروں اور جدید انجنوں کی ڈیزائن صلاحیتوں کو بہتر بنانا، اور شہری
ہوابازی کی مینوفیکچرنگ شعبے کو فروغ دینے کے لیے اختراعات کی صنعتی
پیداوار کو فروغ دینا بھی شامل ہے۔
کم بلندی والی معیشت کو آگے بڑھانے کے حوالے سے اقدامات میں ملک کے لیے کم
بلندی والے ہوائی علاقوں کے وسائل کی مختص کاری کو بہتر بنانے، کم بلندی
والی پروازوں کی خدمات کے لیے ریگولیٹری پلیٹ فارم کی ترقی کو فروغ دینے،
کم بلندی والی معیشت کی ضروریات کے مطابق فضائی اہلیت کی تصدیق اور پرواز
کے انتظامی نظام قائم کرنے، اور صنعتی ترقی کو فروغ دینے کے لیے اطلاقی
خدمات کو وسعت دینے کے طریقے شامل ہیں۔
یہ اقدامات سیول ایوی ایشن ایکٹ میں ترمیم کے دوسرے جائزہ مسودے میں "ترقی
کی ترویج" کے عنوان سے ایک نئے باب کے تحت شامل کیے گئے ہیں۔ یہ تفصیلات
ایسے سوالات کے جواب میں سامنے آئی ہیں جو اس بات پر مرکوز تھے کہ آیا
ترمیمی مسودہ چین کی طیارہ سازی، فضائی اہلیت کی تصدیق، اور کم بلندی والی
معیشت کے بنیادی ڈھانچے میں رپورٹ شدہ خامیوں کو دور کرنے کے لیے مخصوص
بہتری لائے گا، خاص طور پر سی919 جیسے ملکی ساختہ بڑے طیاروں کی کامیاب
مینوفیکچرنگ اور آپریشنز اور کچھ شہروں میں ابھرتی ہوئی کم بلندی والی
معیشت کے تناظر میں ، یہ امور نہایت اہم ہیں۔
ملک میں بڑے طیاروں کی پیداوار میں جدت کا بنیادی مقصد اس شعبے میں چین کی
تکنیکی اور صنعتی صلاحیتوں کو بڑھانا ہے۔ ماہرین کے خیال میں اگرچہ چین بین
الاقوامی تعاون بھی کر رہا ہے، لیکن جغرافیائی سیاسی غیر یقینیت کے پیش نظر
ملکی تحقیق و ترقی اور پیداوار کو خاص طور پر انجنوں اور اہم نظاموں میں
مضبوط بنانے کی ضرورت ہے تاکہ ہوابازی کی پائیدار ترقی کو یقینی بنایا جا
سکے۔ ملکی ساختہ بڑے طیاروں کے منصوبوں کی کامیابی کے ساتھ، طویل مدتی
مسابقت کے لیے مقامی سپلائی چینز کے ساتھ ساتھ وسائل کی مختص کاری اور
آزادانہ اختراع کو بھی بہتر بنانے کی ضرورت ہے۔
وسیع تناظر میں کم بلندی والی نقل و حمل نئی توانائی، مصنوعی ذہانت، بگ
ڈیٹا، اور 5 جی مواصلات جیسی نئی ٹیکنالوجیوں کے اطلاق کے لئے ایک بنیادی
پلیٹ فارم اور منظر نامے کے طور پر کام کرتی ہے. یہ کم بلندی والی معیشت کی
ترقی کے لئے ایک اسٹریٹجک سمت کی نمائندگی کرتی ہے اور عالمی اقتصادی ترقی
کے منظر نامے کو نئی شکل دے رہی ہے۔
|