مبارک ہو عامر بھائی بہت بہت
مبارک ، راؤ آزاد کی پیدائش ! اپنے گوشہ جگر کے ساتھ ”آزاد“ جوڑنے میں آپ
کی جو خواہش یا خواب ہے خداکرے وہ شرمندہ تعبیر ہو۔ باری تعالیٰ آپ کے
نورنظر کو مولانا آزادؒ کا پیکر و پرتو بنائے ۔ وہی افکار وتخیلات ،وہی
تجسسات واحساسات ، وہی بیباکی و اولو العزمی ، وہی نکتہ سنجی ودقیقہ رسی ،
وہی حب الوطنی و اخوت وجانثاری ، وہی آگہی ومعرفت الہی آپ کے عزیز ازجان
لخت جگر میں پیداہوجائے،جومولانا آزادمیں بدرجہ اتم موجودتھے ۔ اللہ کرے اس
کے شجر ِ مستقبل پر ملک وقوم کی نمائندگی کا پھل آئے ۔ (آمین )
عبقری اورنابغہ روزگار شخصیات سے انتساب یا ان سے قرابتداری کا اظہار کوئی
عجب نہیں ، بلکہ مستحسن ہے ، باعث افتخار ہے ۔ یہ انتساب ازروئے شرع بھی
غلط نہیں ۔ خودآقاءدوجہاں ﷺ نے بھی اپنی ذات کو حضرت ابراہیم علیہ السلام
کی ذات سے تشبیہ دی ہیں ،حنفیت میں بھی ان کی جانب اپنے کو منسوب کیا ہیں ۔
یہی وجہ ہے کہ شیدائے حرم بھی اپنے نام سے قبل ”محمد“لگاتے ہیں ۔ مولانا
آزادؒ(1888-1958)بھی نابغہ روزگار تھے ، اپنی مثا ل آپ تھے ، ایک طرف وہ
آسمانِ صحافت پر محوپروازتھے تو دوسری طرف فہم وفراست کے سمندرکے غواص و
شناور ۔ معرفت الہی کے پیکر تھے ، علم کے بحرذخار تھے ،سیاسی بصیرت اورنکتہ
سنجی کے امام تھے ، اسی طرح علم دوست اورسچے محب وطن ہی نہیں مجاہد آزادی
بھی تھے ۔ ایسی شخصیت سے انتساب ظاہر ہے باعث صد افتخار ہے ۔ یہی وجہ ہے کہ
مولانا آزاد ؒ سے قرابتداری اور رشتہ داری بھنانے کی سیاست ہمہ زمانہ تیز
تر رہی ہے ۔ چونکہ مولانا کی کوئی کی اولاد بقید ِحیات نہیں رہ سکی ،اس لئے
ان کے ہر رشتہ دار ان سے قریب ترین ہونے کا اظہار کرکے سیاسی مراعات اور
عہدہ کے حصول میں سرگرداں ہیں ۔ ان کا لیبل چسپاں کرکے اپنی ناک اونچی کرنے
میں جٹے ہیں ۔ یوں تو کئی دہائیوں سے ہی یہ سلسلہ چل پڑا ہے ۔جناب نورالدینؒ
و جناب فیروز بخت احمد اور جناب نجمہ ہپت اللہ کے درمیان کافی دنوںسے اسی
کو لے کر کشیدگی ہے ۔ نجمہ صاحبہ اپنے آپ کو مولانا کی قریبی رشتہ ثابت
کرنے کی ہر ممکن کو شش کررہی ہے، ایڑی چوٹی کا زور لگارہی ہے اوربسااوقات
کذب بیانی کی بھی نوبت آجاتی ہے ، ان کے اس عمل سے مولانا آزادؒ کے
ثناخواؤں اورمداحوں کو کفت بھی ہوئی ہے ۔ ادھر چنددنوں قبل عامر خان نے بھی
اپنے لخت جگر کے نام کے ساتھ ”آزاد“جوڑ کر لوگوں کو سوچنے پر مجبور کردیا
ہے، عامر خان نے مولانا کو پردادا قراردیا ہے ۔ ان کے اس اقدام یااعلان کے
بعد ملک کے بیشتر باشندگان کوتعجب ہوا کہ مولانا عامر خان کے کیسے
پرداداہیں ؟ کیونکہ ماقبل میں انہوں نے کبھی بھی مولانا کو بھولے سے بھی یا
د نہیں کیا تھا ۔نجمہ صاحبہ کی کذب بیانی نقل کرنے سے قبل مناسب معلوم
پڑتاہے کہ جناب فیروز بخت احمد ، جناب نجمہ ہپت اللہ اور جناب عامر خان کا
مولاناآزاد ؒسے کیا رشتہ ہے، پر گفتگوکی جائے ۔
فیروربخت احمد :
مولانا ابوالکلام آزادؒ کے بڑے بھائی کا نام مولاناابوالنصر آہ غلام یٰسینؒ
تھا ۔ ان دونوں کی شادی ایک ہی گھرانہ میں ہوئی تھی ،دونوں مولانا(دونوں
بھائیوں) کی بیوی نصبی بہن تھیں ، گویا وہ دونوں ہم زلف تھے ۔ مولانا آزاد
ؒ کی رفیقہ حیات کانام زلیخا اوران کے بھائی کی بیوی کا نام حفیظہ تھا ،
جوکہ آفتاب الدین کی صاحبزادی تھیں ۔ جیساکہ چندسطور قبل عرض کیا گیا کہ
مولاناآزادؒ کی کوئی بھی اولا دبقید ِحیات نہ رہی ، البتہ ایک لڑکا حسین کا
ذکر ملتا ہے کہ وہ کچھ دنوں تک باحیات رہے، مگر جلد ہی دارفانی سے رحلت
کرگئے ۔ مولانا کے بڑے بھائی مولانا ابوالنصر آہ غلام یٰسین کی صرف ایک ہی
اولاد تھی ، یعنی جناب نورالدین ؒ۔ حیات کا رشتہ بڑے مولانا سے کچھ زیادہ
نہیں رہا اور کوئی 23بر س کی ہی عمر میں ان کی سانسوں کی ڈور ٹوٹ گئی ۔چونکہ
مولانا آزادؒ نورالدین احمدکے خالو تھے ، اس لئے انہوں نے ان کی پرورش
وپرداخت اپنے بچے کی طرح کی ۔ مولانا آزادؒ کی بیو ی زلیخا ان کی خالہ تھی
۔ان دونوں (نورالدین اور اس کی ماں حفیظہ)کی کفالت کی پوری ذمہ داری مولانا
آزاد ؒ کے ہی ذمہ ہی تھی ۔ جناب نورالدین ؒکی طبیعت میں لاابالی پن تھا ،
انہوں نے پرانی دہلی احاطہ کالے صاحب کی ایک خاتون نازک جہاں بیگم سے
مولانا آزادؒ کی غیر موجودگی میں نکا ح کرلیا ، جب مولانا آزادؒ(نورالدین
کے چچا یعنی خالو)نے اس نکاح پر خفگی کااظہار کیا تو بغیر طلاق ان سے انہوں
نے علاحدہ گی اختیار کرلی ۔ خیر جو بھی ہوا ،ان کے یہاں 1957میں ایک اولاد
کی پیدائش ہوئی ، جسے مولانا آزاد ؒ نے اپنا تاریخی نام ”فیروز بخت“دیا ۔
فیروز بخت کے والد جناب نورالدینؒ (جومولانا آزادؒکے بڑے بھائی کے لخت جگر
تھے )کی وفات 1993میں ہوئی ۔یعنی فیروزبخت احمد مولانا آزاد ؒ کے بڑے بھائی
کے پوتے ہیں ۔
عامرخان:
مولاناآزادؒ کی ایک ہمشیرہ کا نام فاطمہ بیگم آرزو تھا ، جن کا نکاح سید
معین الدین عرب سے ہواتھا ، ان کے یہاں پانچ اولادہوئیں ، آمنہ بیگم، یوسف
علی ، حامد علی ، رقیہ بیگم اورصفیہ بیگم ۔ آمنہ بیگم (جو مولانا آزاد ؒکی
بھانجی تھی)کا عقد جعفر علی خان شاہ آبادی سے ہوا ۔ ان کے بھی پانچ بچے تھے
، باقر حسین ، انیس جہاں ، بلقیس جہاں ، ناصر حسین اورطاہر حسین ۔ طاہر
حسین کے ہی بیٹے مشہور ادارکار عامر خان ہیں ۔ یعنی مولانا آزادؒ کی بھانجی
(آمنہ )عامر خان کی دادی تھی ،چنانچہ آمنہ کی ماں( فاطمہ) ان کی پردادی
ہوئی اور مولانا آزاد ؒ عامر کی پردادی کے بھائی ،گویا مولانا ان کے پردادا
۔
نجمہ ہپت اللہ:
یوسف علی (جو آمنہ کے بھائی یعنی مولانا آزاد کے بھانجے تھے)کا عقد فاطمہ
بنت محمد قاسم سے ہوا تھا ، ان کی تین اولاد ہوئیں ، اختر علی، نجمہ ہپت
اللہ اورعظمی ۔ نجمہ کے والدیوسف علی مولانا آزاد کے بھانجے تھے ،
گویامولانا آزادؒ نجمہ کے ممیرے داداتھے ۔
مولانا آزاد کو حکومت کی جانب سے اب کوئی اعزاز یا ان کے قریبی رشتہ
دارکوکوئی جاہ و منصب دیاجائے توا س اعزاز یا منصب کا مستحق کون ہوگا؟ اس
کافیصلہ حکومتی افراد یا پھر علماءدین شرع متین ازروئے شرع اسلام کریں ۔ اس
کے لئے ضروری ہوگا کہ ان کے سامنے مولانا آزادؒ کا صحیح شجرہ نصب موجود ہو۔
تاہم سوال یہ ہوتا ہے کہ جو لو گ مولانا آزادؒکی خدمات یاان سے رشتہ داری
کے سہارا کچھ یا بہت کچھ حاصل کرنا چاہتے ہیں ، انہوں آزاد ؒ کے کارنامے کو
زندہ وتابندہ لکھنے اور ان کے نقش قدم پر چلنے کے لئے کیا کچھ کیا ہے ۔ان
کی حیات و خدمات پر روشنی ڈال کر انہیں کس نے زندہ رکھا ہے ؟ اس سوال پر
ذرابھی توجہ دینے سے یہ حقیقت سامنے آتی ہے کہ آزادؒ سے محبت کا دم بھرنے
یا رشتہ داری بھنانے والوں میں صرف فیروزبخت احمدہی نمایاں ہیں ۔ ان کی
حیات و خدمات اورکارہائے نمایاں کا ذکر گرشتہ تین دہائیوں سے صرف وہی کررہے
ہیں ۔ چونکہ موصوف تعلیم وتعلم کے ساتھ ساتھ صحافتی دنیا سے بھی وابستہ ہیں
، اس لئے یہ کہنا بے جا نہیں ہوگا کہ مولانا آزاد کا خمیر ان کے اندر ہے ۔
کسی نہ کسی حد تک ان کے خیالات مولاناآزادؒ سے ہم آہنگ ہیں ۔ موصوف یہ نہ
صرف کہ اردو کی زلف کو ہی سنوارتے ہیں بلکہ ہندی اورانگریزی کے بھی دلدادہ
ہیں ۔ اردو کے ساتھ ساتھ ہندی انگلش اخبارات بھی ان کے مضامین بڑے شوق سے
نرالے انداز میں چھاپتے ہیں ، جن سے آزاد کے افکار وخیالات ٹپکتے نظر آتے
ہیں ۔ فیروز بخت احمد کی یہ قناعت پسندی بھی قابل دادوتحسین ہے کہ ایک
اسکول میںدرس و تدریس کا فریضہ بحسن وخوبی انجام دے رہے ہیں ۔ انہوں نے
کبھی مولانا آزاد ؒ کا نام غلط طریقہ پر استعمال کرکے بڑے مقام تک
پہونچامناسب نہیں سمجھا ، حالانکہ فی الوقت وہ ملک کے انگلیوں پر گنے چنے
چند ماہرتعلیم میں سے ایک ہےں۔ ہاں ! یہ بہت دکھ کی بات ہے کہ گزشتہ دنوں
کسی نامور قلم کار اور محب اردو نے فیروز بخت احمد کی تعریف میں زمین
وآسمان کے قلابے ملاتے ہوئے انہیں مولانا آزادؒ سے بھی دو قدم آگے بڑھادیا
۔ راقم ان کی صحافتی اور تدریسی خدمات کا منکر نہیں ، مگر وہ آزادؒ کے شانہ
بہ شانہ ہی نہیں بلکہ دو قدم آگے ہیں ، قطعی اس کا قائل نہیں ۔
اب رہی بات جناب نجمہ ہپت اللہ کی تو ان کے کارنامے کچھ ایسے ہیں جہیں سپرد
ِ قلم وقرطاس کرتے بھی شرم وعار محسوس ہورہی ہے ۔63ویں یوم آزادی کے موقع
پر نیشنل آرکائیوز آف انڈیا کی جانب سے انٹر نیشنل سینٹر میں مولاناآزادؒ
کی خدمات کو سراہانے کے لئے ایک پروگرام منعقد کیاگیا تھا ، جس کا افتتاح
چیف الیکشن کمشنر ایس وائی قریشی نے کیا ، ان کی نظر جب مولانا آزاد کے
شجرہ نصب پر پڑی تو نجمہ کا نام تھا اورفیروز بخت احمدکا نہیں ۔ انہوں نے
افسر راجامنی سے اس بابت دریافت کیا توانہوں نے کہا ان کا نام مولانا آزاد
ؒ کے رشتہ دارہونے میں متنازع ہے ،چنانچہ حکومت نے ان کا نام تسلیم نہیں
کیا ہے۔ سوال یہ ہے کہ شجرہ نصب کیسے تیار کیاگیا ،جس میں اتنے قریبی رشتہ
کو برطرف کردیاگیا ۔یہ بھی یاد رکھنے کی بات ہے کہ مولاناکا بھارت رتن
فیروزبخت احمد کے والد کو ملا ، وہ وارث اورفیروز صاحب نہیں ، آخر کیسا
تضاد ہے یہ ؟اس ایوارڈ کوحاصل کرنے میں نجمہ نے بڑی چالاکی دکھائی ،
مگرانہیں منہ کھانی پڑی۔1988میں ”انڈیا فریڈم“کے آخری 30صفحات کی رائلٹی
مولانا آزاد کے قریبی رشتہ دارکو ملنے والی تھی ، اس کے لئے بھی نجمہ ہپت
اللہ نے سبک روی دکھائی مگرناکامی ہی ان کے ہاتھ آئی ۔ یہ بھی فروز بخت
احمد کے والد جناب نورالدین ؒ کو ملی۔فی الواقع نجمہ کا یہ کردار ہر اعتبار
سے قابل گرفت ہیں ، ملک کی شرمساری ہے ، مولانا کے مداحوں کی بے عزتی ہے ،
مسلمانوں کی جگ ہنسائی ہے ۔ کیااس مدعے پر دانشمندوں اور حکومت کو نہیں
سوچنا چاہئے ؟۔
اب رہیں جناب ِ عامر (بھائی خان صاحب )جو اب بیدار ہوئے ہیں ، مولاناآزاد
کی اب انہیں یادآئی ہے اور اپنے لخت جگر کے نام کے ساتھ ”آزاد“جوڑا ہے ،
بہت اچھی بات ہے یہ ۔ مگریہ سوال ہوتا ہے کہ کیاکبھی انہوں نے کچھ ایساکیا
جو آزاد کے کارنامے کو اجاگر کرے ؟کیاکبھی ان کی حیات و خدمات پر مبنی کوئی
مضمون لکھایا ایسا کوئی بیان دیا ہے؟کیا کبھی ان کے افکار وخیالات کو پیش
کر کے ملک کوسالمیت کے سایہ میں آنے کی دعوت دی ہے ؟ان کی خبر پڑھ کر ملک
کے بیشتر قارئین کو تعجب ہواکہ آخر مولانا آزاد ؒ ان کے پردادا کیسے ہیں
؟عامرخان کو چاہئے تھا کہ پہلے بھی مولانا آزادؒ سے رشتہ داری کا اظہار
کرتے، مگر اب مولانا آزادؒ انہیں یاد آئے ہیں ، اس میں کیا راز پوشیدہ ہے ،
وہ ان کے دیگر رشتہ دار جانیں ۔ ہمیں صرف عامر صاحب سے یہ کہنا ہے کہ آپ
بھی مولاناکی حیات وخدمات کوزندہ وتابندہ بنانے کے لئے کچھ کریں ۔
یہ بہت افسوس کی بات ہے کہ مولاناآزادؒ سے قریبی ہونے کی سیاست زور وںپر ہے
، مگر کوئی بھی ان کا سچا جانشیں نہیں ، ان کے خاندان کا کوئی قدآور سیاست
داں نظر نہیں آتا ، کوئی جید عالم نہیں ، حالانکہ مولانا جو کچھ بھی تھے
پہلے جید عالم تھے ، کیا ان سے رشتہ داری کا دعوی کرنے والے اپنے بچوں کو
مدارس میں پڑھا رہے ہیں ، کیا نہیں ہے یہ سوچنے کا موضوع؟۔ |