Hum Sach Sy Chehra Kyun Chupaate Hain (Part 1)

Sach ALLAH Ki Aik Aesi Nemat Hy K Agar Hum Is Ka Saamna Krna Seekh Lain To Hum Musalsal Behtri Ki Jaanib Gaamzan Rehte Hain Or Agar Hum Is Sy Muun Chura Lain To Shayad Hum Apne Dil Ko Mutmain Kr Lain Lekin Humara Zameer Hamesha Hamain Us Cheez Py Malamat Krta Rehta Hy Or Ye Jhoot Hamesha Aik Bojh Ki Trha Hamare Saath Chipka Rehta Hy. Is Liye Ye Boht Zaruri Amar Hy K Hum Sach Ka Saamna Krna Seekh Lain Kyun K Hamara Mazhab Hamain Is Hi Ki Talqeen Krta Hy. Meri Aage Di Gayi Raaye Sy Ho Skta Hy Mere Boht Sy Qaraeen Mujh Py Barham Ho Jayen Lekin Un K Liye Mein Itna Hi Kahuun Ga K Ap Jo Marzi Raaye Dain Apni Lekin Meri Baat Ko Aik Baar Thanday Dil O Dimagh Sy Sochiye Ga Zaruur.

Hum Log Najaane Kyun Apne Maashray Mein Jhoot Phelaane Or Baybunyaad Baatein Bana Kr Apne Ap Ko Gumrah Krne Ki Koshish Khud Hi Kr Rahe Hote Hain. Hum Log Us Baat Ko Jhoot Or Drama Bol Diya Krte Hain Jo Hamari Tabiyat K Mutabiq Na Ho Lekin Apne Ap Ko Masbat Torr Py Tabdeel Krne Ki Koshish Nahi Krte. Allama Iqbal Ka Ye Shair Humari Is Halat Py Bilkul Jamta Hy:
Huwe Faqeeh’aan E Haram Kitne Bay Tofeeq,
Khud Badalte Nahi Quran Ko Badal Dete Hain.

Aik Boht Mashahoor Jhoot Jo Na Jaane Kyun Or Kis Ny Bna Kr Phelaya Hy Or Jo Mein Ny Aksar Boht Sy Logon Sy Suna Wo Ye K Armstrong Ny Jb Chaand Py Qadam Rakha To Usay Wahan Awaz Sunayi Di Or Jb Wo Wapis Zameen Py Aaya Or Misar Gaya Tu Us Ny Us Awaz Ko Wahan Dobara Suna Or Pucha Ye Kis Cheez Ki Awaz Hy To Logon Ny Btaya K Ye Azan Ki Awaz Hy Or Phir Wo Musalman Ho Gya. Ye Baat Jb Armstrong Sy Kahe Gayi To Us Ny Kaha Mein To Kabhi Misar Gaya Hi Nahi. Ab Mera Nukta Ye Hy K Jis Shakhs Ny Ye Baat Bnayi Hogi Or Phelaya Hoga Us Sy Pucha Jaaye K Kya Armstrong K Wahan Awaz Na Suane Sy Kya Islam Ki Shaan Kam Ho Jaati Ya Is Jhoot Ko Bolne K Baad Barh Gayi. Or Uper Sy Reham Aata Hy Humari Quom Py K Is Baat Ki Tasdeeq K Baghair Hi Ye Baat Phela Daali Or Jo Jo Sunta Gya Aage Phelata Gya Yahan Tk K Ye Bat Ghalat Ul Aam Ho Gayi Or Quom K Jazbaat Ka To Ye Alam Hy K Is Ko Jhoot Bolna Na Mumkin Kr Diya Gya Kyun K Jo Is Jhoot Ko Jhoot Bole Wo Islam Ki Shaan Jese Kam Kr Rha Ho Ye Taasur Diya Jaata Hy. Chaliye Is Ko Choriye Aage Dekhte Hain K Hum Apne Ap Sy Kya Kya Jhoot Bolte Hain Ya Bolte Rahe Hain.

Aik Or Baat Jo Logon Mein Na Jaane Kyun Aam Kr Di Gayi Wo Ye Thi K Janab Abbotabad Operation Aik Dhoka Tha. Or Usama Bin Laden Sahib Ko To Pehle Hi Kaheen Shaheed Kiya Ja Chuka Tha Or Wo Wahan Nahi Reh Rahe Thay. Ab Mera Nukta Ye Hy K Mein Agar Is Baat Ko Ghalat Maan Bhi Luun (Kyun K Maalum To Mujhe Ya Ap Ko Us K Baare Mein Kuch Bhi Nahi) To American Foji Wahan Pr Usama Bin Laden K Bachon Or Biwi Ko Zinda Chor K Chale Gaye Or Unhon Ny Ye Btaya K Usama Bin Laden Sahib Wahan Hi Reh Rahe Thay To Phir Ap Hi Btayen K Kis Ki Baat Pr Yaqeen Kiya Jaaye Us Family Ki Baat Py Ya In Logon Ki Baaton Py Jin Ko Meri Trha Pta Wahan Ki Kisi Baat Ka Nahi Lekin Us Baat Ko Bilkul Baybunyaad Keh Dete Hain Baghair Kisi Sabuu K. Or Aik Or Baat K Hmare Mulk Ki Afwaaj Ny Bhi Usama K Bachon Sy Tehqiqaat Ki Or Agar Ye Jhoot Hota Sb To Sb Sy Pehle Wo Is Baat Ko Puri Dunya K Saamne Ly Kr Aate Kyun K Is Operation K Nateejay Mein Unhain Puri Dunya Mein Tanqeed Ka Saamna Krna Para.

Aik Or Jhoot Jo Hum Ny Ghalat Ul Aam Kiya Wo Ye K Jb India K Shehar Mumbai Mein 26 November 2008 Ko Kuch Logon Ny Attack Kiya Or Shehar K Chand Eham Muqamaat Py Qabza Kr Liya Or Jb India Ny Ye Kaha K Hamla Awaron Ka Taaluq Pakistan Sy Hy To Hum Ny Is Baat Ko Radd Kr Diya Or Humare Tv Channels Py Red Topi Pehn Kr Aane Wale Aik Sahib Ny To Aik Hamla Awar Ki Pic Dikha Kr Jis Ny Apne Hath Py Kuch Banda Hua Tha Ye Bhi Keh Daala K Ye To Hindu Intiha Pasand Tanzeem Sy Taaluq Rakhne Wala Shakhs Hy. Or Us Pr Sitam Ye K Hmari Awam Kya Or Government Kya Sb Ny Yehi Lakeer Pakar Kr Peetna Shuru Kr Di. Pehle Kaafi Din Hum Is Baat Ko Radd Krte Rahe Or Aakhir Kaar Phir Maan Bhi Gaye. Or Phir Puri Dunya Mein Ye Baat Bolne Lage K Haan Ye Chand Sir Phiray Log Thay Jinhon Ny Ye Harkat Ki Or In Ka Hakumat Sy Koi Taaluq Nahi Tha. To Baat Ye Hy K Hum Pehle Hi Din Sy Ye Baat Kehte To Hmain Baad Mein Wo Hazeemat Na Uthani Parti K Hum Pehle Jhoot Bolte Rahe K Us Ka Taaluq Pakistan Sy Hi Nahi.

ALLAH Ny Jb Quran Mein Khud Frma Diya Hy K Mein Sach Bolne Waalon Ko Pasand Krta Hun To Phir Sawal Ye Hy Is Trha K Jhoot Hum Log Kyun Bolte Hain Apne Ap Sy. Mere Aaj K Is Article Ka Next Jhoot Wo Hy Jo Hum Logon Ny Malala Yousafzai Wale Waqaye K Baare Mein Phelaya, Lekin Is Article Ki Tawalat K Bayis Us Ko Filhal Moakhir Kr Raha Hun Lekin Isi Article K Aglay Hissay (Part 2) Mein Us Pr Bhi Apne Khayalat Ka Izhaar Krun Ga. Agar Ap Ki Koi Bhi Raaye Ho Is Sy Mtaliq Chahe Haq Mein Ho Ya Mukhalif Ho To Ap Apni Raaye Sy Bhi Mujhe Aagah Kr Skte Hain Or Ye Ap Ka Haq Hy. Malala Sy Mutlaliq Is Article Ka Agla Hissa Boht Jald Likh Duun Ga.

******************* (JAARI HY) ********************